Miz haemh ndeu, duznou Mihmih bae ndaw singz ranz dahcej de guhcaemz.

Mihmih mienh byaij mienh ciengq:“Bae ranz beix gig angq, caeuq de caez gangjgoj, ninz geij haemh cij ma, ninz geij haemh cij ma……” “Mihmih! Mihmih!” Dahcej de heuh. Mihmih vad fwngz sing hung dwk dap:“Hei!” Seizhaenx, Yenzlaiz dwg dahcej Mihmih daeuj ciep de, de angq dwk buet gvaq loh hung, sawqmwh gyaq ci ndeu baez cung gvaqdaeuj, ca di gyanx deng Mihmih, de daengx ndang cungj saenzgywggywg dwk naeuz:“Dahcej, ndaw singz gij ci baenzneix lai, ngoenzlawz gvaq loh deng gyanx dai cungj mbouj rox ha?” Dahcej de hongz naeuz:“Rox gij gveihcwz gyauhdungh couh mbouj lau. Mwngz haxbaenh roemx daenghoengz lo. Mwngz yawj, lohcihcib, daeng- hoengz dingz, daengloeg byaij, daenghenj rongh couh daengx yaep he. Gvaq maxloh, yawj song mbiengj, mbouj miz ci cij ndaej byaij, yaek byaij hix deng byaij senbanhmaj.” Mihmih sim lij lau, dahcej youh gangj ndaej lai, de hix geiq mbouj ndaej geijlai, cij dwg itcig ngaekgyaeuj.

Gyoengqde doq byaij doq gangj, gig vaiq couh daengz ranz dahcej Mihmih lo, dahcej naeuz:“Mihmih, ndonj gvaq geh bakdou baihlaj haeujbae.” Haeuj ranz lo, Mihmih raen gij ranz ndongqmyanmyan, baez diuq hwnj gwnz congzdanzvangz, danz hwnj danz roengz, vaiqvued dwk naeuz:“Dahcej, mwngz haq ndaej deng dieg lo, gou lij ninz youq fuengznyungq ne!” Dahcej de naeuz:“Suenq maz ndei, mwngz dungxiek dingxlo, sien bae gwn caeuz gonq. Haeuj ranzdajcawj, gwnz daiz miz nohbit、nohgaeq, yiengyiengh cungj miz. Mihmih naeuz:“Dahcej, mwngz ninz ndei、gwn ndei, gou gvaq ndaej beij mwngz ca lai lo.” Dahcej de naeuz:“Neix mwngz couh lai gwn di, mbouj gangj baenzlai, vaiq gwn.”

Mihmih sikhaek gaemz hung gaemz hung gwn hwnjdaeuj, cingq gwn diemzswdswd seiz, sawqmwh ndaej nyi miz vunz hai dou, dahcej de naeuz:“Mihmih, miz vunz dauqma lo, mbouj gwn lo, vaiq buet.” Bouxcawj raen miz duznou, gaem faex couh yiengq Mihmih moeb daeuj. Mihmih buet doeng youh buet sae, yaep he ndoj haeuj ga daiz, yaep he ndoj haeuj yiemz cueng, buet ndaej hanh conh laeng、nyouh cungj yaet caez, gig gannanz cij buet daengz rog. Baez raen dahcej de couh daej dwk naeuz:“Dahcej ha, haxbaenh gou yaek deng moeb dai bae lo, haeuj ndaw singz daeuj, mbouj daengz ngoenz he, gou couh yaek yiemj dai song baez lo. Gou mbouj siengj riuj mbei gvaq saedceij, vanzlij youq lajmbanj ansim di. Haemhneix gou lienzhaemh ma ranz gou bae lo.”

Dahcej de dingq le naeuz:“Mihmih, mwngz mbouj ndaej dauqbae baenzneix vaiq, gou lij caengz caeuq mwngz gangjgoj guh- caemz ne! Dahcej mbouj hawj mwngz bae! Dahcej mbouj hawj mwngz bae!” Hoeng, Mihmih vanzlij dauqma ranz lo.