Binaengz baez daengz sam nyied, Mbanjdungzbanj Yazgyoz Cunh Dunghgij Yangh Yungzanh Yen 500 lai moux gomakmaenj、byaek- youzcai couh haiva hausak henjrwg, daengx aen mbanj cungj sieng youq ndaw doenghva, lumj yiengh diegsien youq nei, hekyouz cix boux heuh boux doxcaeh dwk caenx haeuj mbanj bin bya yawj va. Doengh bi neix daeuj, Yungzanh Yen doenggvaq hwnjguh lajmbanj gyaeundei, dawz aen mbanj neix ciuq AAAA gaep gingjgih biucinj bae haenqrengz hwnjguh, gyalai roengzngaenz guh diengzhaex goenggungh、diegdingzci doengh gij sezsih goekdaej neix, vunzmbanj doenggvaq reihnaz riuzcienj, comz ndaem gomakmaenj、gomakdauz、makitroeg daengj gomak, lij banh nungzgyahloz youq bakdou ranz canh ngaenz, daengx mbanj miz cib lai ranz banh bouqngaiz nungzgyahloz, moix bi ciepdaih hekyouz 4 fanh lai vunz, moix ranz bingzyaenz demsou 2 fanh lai maenz ngaenz.

Mbanjdungzbanj dieg youq ndaw luegbya, dwg aen mbanj gungzhoj ndeu gvaq, daengx mbanj miz 20 lai ranz bak lai vunz comzyouq, gaxgonq baengh ndaem di haeuxyangz caeuq geij go makmaenj gvaq saedceij. Aenvih reihnaz noix gungz lai, aen sigij gonq 90 nienzdaih co hainduj vunzmbanj couh daiq yah aemq lwg ok rog dajgoeng roxnaeuz senj okbae youq, ndaw mbanj bienqbaenz hoengqvangvang, seiz ceiq noix de ngamq miz roek caet boux vunzlaux gag youq, caemh deng lied haeuj ndaw yienh gij dajveh daengx mbanj senj dieg youq bae.

Bi 2012 daej, Lungz Siuhyij boux dayozswngh bizyez le bae aen gunghswh dajcaep ndaw yienh guhhong ndaej song bi neix, riengz daxboh de Lungz Feihyin caez dauqma daengz ndaw mbanj caux- nieb, youq ndaw yienh yenveij cwngfuj caeuq mizgven bumwnz haeujcoengh bangcoh lajde, laeb- baenz le “Dungzbanj Makbyasang Nungzminz Conhyez Hozcozse”, vunzmbanj aeu reihnaz haeujguj, baenz doengh ndaemganq gomak- maenj caeuq makitroeg, hwngfat yiengh lijyouz yawjgingj daegsaek. Gyoengqde cawz gij gomakmaenj、gomakleiz nyuenz ndaem miz haenx le, youh yinxhaeuj golanzmeiz、gomakit caeuq gomakdauz daengj gomak, dawz gyawj cien moux reihbya、reihnaz gaxgonq vutfwz haenx gvak gumz ndaem doh gomak, lij youq diegsang gok reih caep aenbingzdaiz yawj va yawj gingj, vanzlij doenggvaq hulenzvangj riuzlwnh gingjndei ndaw mbanj, guh dazroen yawjva、 iekiu yawjva fugsaeh, doigai lwgmak daengj gij doxgaiq daegsaek dangdieg ciuyinx hekyouz, ndaej baenz Yungzanh Yen gizdieg yawjva mizmingz ndawde aen ndeu. Yangh cwngfuj cix daj hozcozse baez laebbaenz couh daj cwngcwz caeuq gisuz bae haeujcoengh, baij gisuz yinzyenz daengz ndaw mbanj sonyinx hohleix gomak, yinxhaeuj makitroeg caeuq golanzmeiz daengj gomak moq, hawj caetliengh lwgmak engq ndei. Riengzdwk aenmbanj hwngfat, yangh cwngfuj lij okngaenz gaijgez le vunzmbanj gwnraemx hoj caeuq gaij roennamh baenz roen- suijniz daengj vwndiz, hawj vunz- mbanj saedceij ciemh ndei. Ciuq cam rox, bi 2009 ndaw mbanj moix vunz bingzyaenz souhaeuj 5000 maenz ngaenz baedauq, doenggvaq nungz- gyahloz、gai huq doj daengj hanghmoeg moq daiqdoengh, bi’gvaq daengx mbanj moix vunz souhaeuj gaenq dabdaengz 3 fanh maenz ngaenz, mbangj vunzmbanj hwnjguh le ranzlaeuz moq, mbangj ranz cawx le ciiq dem.

Seizneix, Mbanjdungzbanj gwnz bo ndaem doh gomakmaenj、gomak- leiz、gomakdauz、gomakit、golanzmeiz doengh gij gomak neix, guhbaenz yiengh hongsaeh lijyouz seizcin yawjva、seizhah seizcou mbaetmak seizseiz ndaej cimz feih byaekhom lajmbanj haenx, haujlai vunzmbanj hix caez dauqma ranzmbanj guh hong dajndaem caeuq lijyouz fugsaeh, vunz youq mbanj dauqfuk miz gyawj bak vunz, souhaeuj caemh bi beij bi lai, baenz Dunghgij Yangh gij mbanj guhyiengh lijyouz ndawde aen ndeu.