Ngoenznaengz laepmomj, youq suenva Bandauj Ganghcwngz Siujgih Namzningz Si, cungj cienz baenz raq baenz raq yaem’wenq goksadsad okdaeuj. Dingq sing muengh bae, yienzlaiz dwg miz bouxlaux cingq haeujsim ngod dizginz iq he. Sing- yaem ndei dingq、 ngod ndaej sug、 youh haeujsim, baenz hot baenz hot go mizmingz dizginz iq youq ndaw suenva goksasa. Baeznaengz sing gimz yiengj, gyoengq vunz ndaw siujgih cungj gag humx youq henzgyawj, dinghyouq dingq, lauheiq gauxca bouxlaux ngod gimz, cijmiz ngod liux diuz go he, caezgya cij bekfwngz haenh ndei. Bouxlaux ngod gimz haenx heuh Vangz Cwnghgvang, dwg fuyenzgiu gvanjyenz Namzningz Si Ginzcung Yisuzgvanj. Lajneix, raeuz caemh bae dingq Vangz Cwnghgvang gangj gij gojgaeq swhgeij caeuq yinhyoz gietcingz 48 bi de.

Gietcingz Yinhyoz Haenq Lienh Dinfwngz Cunz Yienj Doeklaeng Baenz Guzgan

Vangz Cwnghgvang daj iq couh gig gyaez yinhyoz, hoeng seizde mbouj miz ngaenzcienz, gij siengjfap maqmuengh miz gyonglaz gimzyienz swhgeij cij ndaej yo youq ndaw sim. Bi 1968, Vangz Cwnghgvang youq Vujdangz cap doih seiz haeuj le doih yienjheiq ndaw yangh, cungjsuenq ndaej gaem gyonglaz gimzyienz lo. Mbouj miz saek di giekdaej gyonglaz gimzyienz, ngamq hainduj de hag rag ngeihyienz, ndaejdaengz bouxwnq sonyinx, de ei lwggyoux veh beuz loengh aen ngeihyienz, hoeng mbouj geij nanz de yawjraen dizginz iq engq habngamj swhgeij.

Aenvih doiq yinhyoz miz gij gyaepgouz doxdoengz, Vangz Cwngh- gvang youq doih yienjheiq roxyiuj le Cinz Dunhdwz boux bienheiq 《Buekmingh Hoenx Daizwzcangh》 haenx, ndaejdaengz de gujli, ngoenz- naengz seiz mbouj guh hong cungj haenq lienh dinfwngz ngod dizginz iq. Ciemhciemh, gyoengqvunz yanghcin henzgyawj cungj rox doih yienjheiq miz bouxcoz he dizginz iq ngod ndaej mbouj loek. Aenvih Vangz Cwngh- gvang giendingh bae hag yinhyoz, youq bi 1971 ndaej Cungguek Yinzminz Gaijfangginh Guengjsae Ginhgih Swnghcanjswh buqgek ciusou.

Doengz bi ndwen 10, Vangz Cwnghgvang ndaej diuh bae doih senhconz vwnzyi swnghcanjswh, hainduj cienmonz guh hong senhconz vwnzyi. Dangguh vwnzyi guzgan, de ciengzseiz riengz doih senhconz youq henzgyaiq Guengjsae cunz yienj, binaengz yienjok 200 lai ciengz. Youq aen ginggvaq neix, yinhyoz suyangj Vangz Cwnghgvan ndaej daezsang haemq lai, hix vih gvaqlaeng cauxsij yinhyoz dwkroengz giekdaej.

Gag Caux Sonhag Fuengsik Moq Hagseng Mauhgvaq Fanh Boux

Bi 1978, Vangz Cwnghgvang cingqsik diuh haeuj Namzningz Si Ginzcung Yisuzgvanj. Doiq siminz guh goeng’iksingq vwnzyi beizyin seiz, dizginz iq de yienj haenx cungj ndaej daengz caezgya angqcoux, caezgya foenfoen iugouz hag dinfwngz ngod dizginz iq. Hoeng aenvih dingzlai vunz cungj mbouj miz giekdaej yinhyoz, gyoengqde gig hoj hag rox dinfwngz danz dizginz iq. Doiq gij cingzgvang neix, Vangz Cwnghgvang hainduj naemj gag caux le fap sonhag yinen, hawj boux ngamq hag yungh 10 ngoenz couh ndaej raen roen.

Bi 2105, 《Yienj Siengjmuengh Cungguek》geiq daihgouj, Vangz Cozbungz boux gyaep muengh daj Namzningz daeuj haenx baez hwnj daiz couh cingzcik yienhda, aenvih bingduzsing naujmozyenz louz roengz goek bingh, caizhag de ngamq lumj lwgnyez cib’it ngeih bi nei, yungh gij sing go lauxsaed de hawj daengx ciengz saenqdaenh liux, hawj boux- yawj yienhciengz gamjdoengh liux, lauxsae buqmoengz yinhyoz Vangz Cozbungz couhdwg Vangz Cwngh- gvang. Vangz Cwnghgvang lwnh gicej, Vangz Cozbungz 7 bi seiz, swhgeij ndaej ndaw gvanj anbaiz bae son Vangz Cozbungz hag yinhyoz, de yungh fap sonhag yinen haenx caenhsim son’gyauq, gikfat gij dungxcaiz yinhyoz Vangz Cozbungz, doeklaeng hawj de saedyienh aen siengjmuengh yinhyoz swhgeij.

Mboujdan baenzneix, seizneix Cezgyangh Swngj gyauhyangjyozdonz soujsiz dizginz iq Luz Vwnzgyangz, youq 4 bi seiz daj Liujcouh daengz Namzningz hag ngod dizginz iq seiz, hix ndaejdaengz Vangz Cwnghgvang bangcoh, seizneix Luz Vwnzgyangz okmingz haenx caeuq Vangz Cwngh- gvang couh lumj boh lwg nei. Vangz Cwnghgvang miz aen gimz Yidali okmingz he, daengz seizneix itcig hawj Luz Vwnzgyangz yienj ngod seiz yungh.

Vangz Cwnghgvang naeuz, geij- cib bi neix daeuj, hagseng riengz swhgeij hag yinhyoz gaenq mauhgvaq fanh lai boux.

Laemxsim Cauxsij Go Vahcuengh Boh Lwg Caez Caux 《Duznon Mbin》

Vangz Cwnghgvang mbouj dwg conhyez okndang, 48 bi daeuj mbouj caengz dingz yamq din gyaepgouz yinhyoz gvaq. De cauxsij go 《Cuengq Go Cib Fanh Byahung》 youq bi 2006 gaiq daihcaet “seizcin seiqgyaiq·go ndawbiengz minzcuz Cungguek yienj caux gaep ceiq sang senj ndei” ndaej ciengjgim minzgoh ndei Cungguek. Youq bi 2009 Cungguek boi gung- hozgoz 60 hopbi swz go、 canghfwen、 yozsouj maenhndei doxdax youq Baekging banh haenx, go 《Doxdax Ruzlungz》 de cauxsij haenx ndaej swz go cauxsij ciengjgim, ndaejdaengz cujveijvei baugvat Gyauz Yij、 Lij Guzyiz daengj lauxhangz yinhyozgyah okmingz nem daengx guek gak dieg bouxsij camgya doxdax haenx haenh ndei……

Vangz Cwnghgvang engq dwg laemxsim cauxsij go Vahcuengh, de youq bujcaz feihvuzciz vwnzva seiz, yawjraen sing hemq fwen liuzloz Yunghningz gig ndei dingq, couh miz gij lingzganj cauxsij go Vahcuengh aeu fwen liuzloz guh giekdaej, youq bi 2007 cauxsij hot damzraih lwgnyez coh heuh 《Lwg Ha Bae Liuh Lo》. Ndaejdaengz daxboh oenqnyuemx, dahlwg Vangz Cwnghgvang Vangz Yaujyen hix gig gyaez yinhyoz, de doenggvaq yungzhaeuj yinhyoz yenzsu daihneix vih hot damzraih lwgnyez neix sij buj baez moq, cauxsij le go 《Duznon Mbin》, aeu fwen liuzloz Bouxcuengh caeuq yinhyoz yenzsu daihneix ndeindei doxcomz hwnj- daeuj, yaem’wenq ndei dingq caeuq miz yinx gvaq gaxgonq, hawj vunz gij roxnyinh lwgda mbat hai. Bi 2008 aen gaihmusiz ciet yisuz minzgoh gozci Namzningz, youz Vah’wz Yozdui yienjciengq, haemq vaiq couh cienz daengz daengx guek gak dieg.

Riengzlaeng, song boh lwg youh caez cauxsij le 《Ce Lele》 《Sing Go Diemj Rongh Fwjhaet》 daengj lai hot damzraih lwgnyez moq caeuq go lwgnyez moq hawj gyoengq lwgnyez gyaez dingq haengj ciengq haenx. Ndawde, 《Ce Lele》 hot go neix youq bi 2017 youq Guengjsae Minzcuz Yinhyozdingh hawj lwg yinhyozgyah iq yienjciengq, diemjdawz gij yiedcingz cienz ciengq gyoengq lwgnyez. Go 《Duznon Mbin》song boh lwg cingsim cauxsij haenx engq dwg ndaej Cunghyangh Densidaiz souloeg youq ciendaezbenq “go ndei cienz ciengq byaij baihsae”, youq bi 2011 ndwen 4 ngoenz 23 youq binzdau lwgnyez CCTV boqcuengq.

Vangz Cwnghgvang seizneix gaenq 68 bi lij ngoenznaengz giendingh lienh gimz、 cauxsij. De naeuz: “Miz yinhyoz buenx, ciuhvunz gou engqgya gyaeundei, gou maq- muengh ndaej cauxsij engq lai go nyuenz miz Guengjsae, hawj gyoengqvunz roxyiuj gij yinhyoz vunz Guengjsae.”