Ngoenzlwenz dwg ngoenzsingh- giz, gou daegdaengq ma ranzcoj yawj daxmeh, caeuq de gangjgoj baenz buenq ngoenz. Daxmeh baez daih’it lwnh aen mimiz iq de hawj gou nyi:

“Cibgeij bi gaxgonq, gou gaen mwngz youq ndaw singz swnghhoz. Miz ngoenz ndeu, gou caeuq meh Ah- wnh bae youz gai, raeuz moix boux yungh 3 maenz ngaenz, youq henz gai suenq mbat mingh ndeu. Goeng suenqmingh sienseng naeuz, diuz mingz gou mbouj suenq geng, lauheiq lix mbouj geij nanz lo, miz haujlai lwglan baujyou cij ndaej. Goeng suenqmingh sienseng lij naeuz, boux vunz gou miz lwglan lai, hoeng yaek dai seiz, ceiq lai ngamq miz saek song sam boux dawz dai.

Gou buenq saenq buenq ngeiz, itcig cungj siengj niemhcingq gij vah de. Gou daj caetcib、betcib lix daengz goujcib geij bi, seizneix lij lix ndaej ndeindei bae, mbouj rox dwg gou lwglan lai, heiqyiengz hung, goeng Yenzvangz baenzlawz rag gou cungj rag mbouj deuz, roxnaeuz dwg goeng suenqmingh suenq mbouj cinj?

Doenghbaez gou ceiq dawz haeuj sim couhdwg yaek dai seiz mbouj miz vunz soujhauq. Seizhaenx gou siengj, danghnaeuz itcig gaen mwngz youq ndaw singz swnghhoz, ranz mwngz vunz noix, cij miz mwngz、dahbawx、daeglan 3 boux vunz ndwi. Dangh- naeuz miz ngoenz ndeu gou laemx roengzbae mbouj hwnq lo, ngamq miz 3 boux sou vih gou soengq dai, gou roxnyinh daiq caem lai lo.

Ndigah, gou couh seizbienh yaeuh aen lijyouz ndeu, lizhai mwngz ma ranzcoj. Mwngz yawj, gou ma daengz ranzcoj, lwglan baenz bang, nauhyied dangqmaz, dwg mbouj dwg yienghneix couh lix daengz seizneix ne?”

Yienzlaiz, daxmeh nyengh yaek ma ranzcoj, dwg aenvih aen yienzaen neix. Gou mbouj miz saek coenz vah, raemxda conh okdaeuj. Danghnaeuz mbouj dwg daxmeh lwnh gou nyi, gou lij mbouj rox saekdi. Gaxgonq itcig nyinhnaeuz dwg mbouj dwg daxmeh gamjdaengz dou guh mbouj ndei, doiq de mbouj hauqswnh, roxnaeuz de laux lo, nyinhnaeuz youq ranzcoj ndawsim cij an’onj.

Gvaiq mbouj ndaej gou haujlai baez gouz daxmeh dauq ndaw singz caiq caeuq gou youq, de cungj mbouj haengj daeuj. Gou lij doiq de naeuz:“Mwngz lau byaij mbouj doengh lo, gou aemq mwngz hwnjroengz, mwngz yaek bae gizlawz, gou hai ci soengq mwngz bae.” Aenvih gou nyinhnaeuz ndaw singz diuzgen beij ranzcoj ndei, hawj de daeuj yiengjfuk, hoeng de dailix hix cungj mbouj dapwngq!

Dingq gij vah daxmeh ngoenz- neix, gou mingzbeg liux aen dauhleix: Bohmeh gaxgonq ganq raeuz baenz maj, lix daengz raeuz baenzvunz, seizneix ceiq youqgaenj couhdwg de sim’angq, cijaeu gij saeh mbouj famhfap, doiq mbouj hwnj bouxwnq， couh swnh de bae guh.