Miz ngoenz he haetcaeux 8 diemj cung, Hoz Baz guhcawj daiq 20 boux beixnuengx bae gwnz haw bwh dapci bae yienhsingz gwn laeuj. Sawqmwh, dahlwg Hoz Baz dwk denva naeuz:“Daxboh, cingj mwngz sikhaek bae cunhminzveij caeuq yangh cwngfuj banh ndei cwnggen……Ngoenzneix itdingh aeu soengq daengz yienhsingz hawj gou.” Hoz Baz ciep denva sat, gyau cienzci hawj beixnuengx le, couh dauq ranzmbanj dawz sinh- fwncwng、hugoujbwnj bae banh cwnggen lo.

Ranz Hoz Baz liz cunhminzveij miz cibgeij leix roen, liz yangh cwngfuj 20 geij leix loh. Hoz Baz buet bae buet dauq, banh ndei cwnggen gaenq dwg lajbyonghngoenz 4 diemj lai cung lo. Seizhaenx gwnz ndang de cij miz 5 maenz ngaenz. Hoz Baz byaij daengz cehcan gwnz haw, raen miz 5 aen ci Vujlingz caj aeu hek. Hoz Baz bae gouz 5 bouxhaici, naeuz bang dawz cwnggen bae yienhsingz. 5 boux de cungj naeuz hawj 10 maenz cij bang dawz bae. Hoz Baz caiq gouz gyoengqde naeuz:“Sou dawz daengz yienhsingz couh dwk denva hawj dahlwg gou, heuh de daeuj aeu, gou heuh de caiq hawj 10 maenz hawj sou, neix gou sien hawj 5 maenz hawj sou ndaej loba?” 5 bouxhaici nyengh naeuz hawj 10 maenz cij bang dawz bae. Hoz Baz fouzfap, byaij bae byaij dauq, ra mbouj raen boux vunz sug ndeu, de gip ndaej ndawsim lumj feiz coemh nei, gyangz naeuz:“Fouz cienz nanz banh saeh ha!”

Seizde, miz aen ci cunghbah he hai daeuj dingz youq baihlaeng 5 aen ci Vujlingz, daj gwnz ci byaij roengz boux hek he, youh miz geij boux hek hwnj ci. Hoz Baz vaiq byaij gvaqbae gouz bouxhaici. Byawz rox yahcoz bouxhaici haenx naeuz:“Gou laih- naeuz maz saeh hung, bang dawz di doxgaiq iq he bae, mbouj aeu cienz. Mwngz lau gou yaeuh vunz, gou hawj mingzben gou hawj mwngz.” Yahcoz bouxhaici gangj sat couh ndenq mingzben de hawj Hoz Baz. Hoz Baz ciep dawz le angq naeuz:“Docih mwngz, cienz sinhoj yaek aeu di, 5 maenz neix mwngz itdingh aeu……” “Mbouj aeu, mbouj aeu, gou bau lwgnyez mwngz haemhneix sou daengz cwnggen!” Yahcoz bouxhaici gangj sat couh haici byaij lo. Hoz Baz gikdoengh raixcaix, yawj ci de hai bae, cigdaengz yawj mbouj raen le, de cij naeuz:“Yah neix sim caen ndei ha……”

7 diemj cung seiz, Hoz Baz angqvauvau dauq daengz ndaw mbanj. Sawqmwh ci cunghbah haxbaenh couh hai daengz henz ndang Hoz Baz dingz lo. Gyoengq beixnuengx daj gwnz ci roengzdaeuj. Nuengx Hoz Baz raen Hoz Baz le, couh naeuz:“Gwn laeuj liux, lanmbwk daiq dou bae cehcan dapci, ngamq daengz, ci neix hix ngamq daengz. Bouxhaici dwk denva le, soujgih lanmbwk couh hongz lo. Gangj mingz le, bouxhaici couh dawz cwnggen hawj lanmbwk lo, lanmbwk hawj ngaenzyinh hix mbouj aeu. Yienznaeuz miz cibgeij boux vunzwnq daeuj beng dou bae dap ci gyoengqde. Hoeng lanmbwk gig angq gyau cienzci heuh yah bouxhaici neix, hawj dou naengh ci neix dauq.”

Hoz Baz riu dwk docih gvanbaz neix, heuh gyoengqde haeuj ranz gwn haeux. Yah bouxhaici haenx naeuz:“Ndaej la. Miz 20 boux hek, dou couh hai ci daengz ndaw mbanj, hix mbouj lai aeu cienz. Neix lau hix dwg, yaek aeu vunzwnq gingq swhgeij, swhgeij aeu sien gingq vunzwnq bw. 5 aen ci Vujlingz haenx aenvih mbouj ndaej hek, haxbaenh lij youq gwnz haw caj ne.”

Gyoengqvunz dingq le, caez sing angq naeuz:“Deng ha, gvaqlaeng raeuz aeu lai bang vunzwnq cij baenz! Baezlaeng, dou bae dapci, raen mwngz, dou itdingh naengh ci mwngz!”