Vih cienzmienh gvancez gij baijbouh vut gungz gunggeng canloz, Bingzgoj Yen Fung’vuz Cin giethab saedsaeh, youq bi 2016 yinxhaeuj Guengjsae Lenzsiengz Nungzyez Douzswh Youjhan Cwzyin Gunghswh youq Sanglinz Cunh caeuq Vaizdaz Cunh co dieg 500 moux ndaem makcauj heu.

Mboengqneix, ndaw suenmak miz haujlai vunz sou mak, lauxbanj ngoenznaengz cingj 20 lai boux gunghyinz daeuj ndaw suenmak sou mak. Gyoengq gunghyinz miz mbangj mbaetsou, miz mbangj dawz mak daeh bae dieg gvangq henz suen doxcomz dongcuengq, bang gunghyinz caez humx youq, leh mak faen gaep cangdaeh、 gvaq caengh hwnj ci, ndaw suenmak nyaengqnyinyi. Ciuq laux- banj gaisau, makcauj heu gizneix mak hung、 noh na ngveih iq、 yiengh gyaeu、 yingzyangj lai. Makcauj heu mbouj nit mbouj ndat, miz gij gunghyau liengz、 gaijdoeg、 hawj simdingh daengj, daegbied hab lwgnyez、 bouxlaux gwn. Ndaem makcauj heu gig miz diuz roen baihnaj ndei, dajndaem yungyiemj haemq iq, ndaem roengz bi ndeu couh ndaej sou mak, caemhcaiq seiz sou youq ndwencieng gonqlaeng, dwg cungj doxgaiq gwn saekloeg singjsien he.

Ciuq cam rox, aen suenmak neix dwg bi’gvaq ndwen 4 ndawnyieb hainduj ndaem, aenvih ndaem ndaej miz di laeng, ganj mbouj ndaej ndwencieng doekgonq sou gai, seiz- neix gyaq gaibued ngamq dwg moix gaen 1.3 maenz ngaenz. Daj ndwen gonq hainduj makcauj heu laebdaeb baenz gai, ngoenznaengz cungj miz lauxbanj daeuj daengz dieg soucawx, daeh daengz Guengjdoeng、 Gveicouh daengj dieg. Daengz seizneix, gaenq gai ok makcauj heu 15 fanh gaen, ndaw suenmak gujsuenq lij miz 10 fanh gaen baedauq.

Ndaejdaengz Lenzsiengz Nungz- cangz yingjyangj daiqdoengh, mbanj henzgyawj miz nungzhoh ndaem makcauj heu daengz 100 moux, ndaem makcauj heu yaek baenz cungj canjnieb youqgaenj Fung’vuz Cin vut gungz baenz fouq he.

(Cinz Yaujdanh/覃筱丹)