旧貌换新颜的河尾屯

□ Dangz Yungjgen

Youq gwnz roen iq ndaw Mbanjhozveij menhmenh byaijcet, caenh raen diuz Dahdaengngoenz raemx sawyau con lae gvaq gyang mbanj, diuz haenzsuijniz ndeu lumj duzlungzhau nei ngutngeuj boemz henz dah, song hamq dah faexcuk heuswd gofaex baizlele dauqdingq ingj youq ndaw raemx, bithanq baenz bang baenz gyoengq youq ndaw dah loengh raemx, sing swenj duzroeg deihdeih daj ndaw ndoeng faexcuk cienz okdaeuj, hom va baenz raq baenz raq ci haeuj ndaeng vunzraeuz, aen dem aen ranzlaeuz daengj baiz youq song henz roen moqsupsup, gwnz naj vunzmbanj comz rim rizriu……

Mbanjhozveij dieg youq baihsae Daiyangzcunh Cin Liujnanz Gih Liujcouh Si, liz gyangsingz Liujcouh 14 goengleix gyae, roen doeng byaij bienh. Mbanjhozveij dwg youq byairieng Dahdaengngoenz cix ndaej aen coh mbanj neix, dwg Sangdwngj Cunh 3 aen mbanjswyenz ndawde aen ndeu, daengx mbanj 116 ranz 500 lai vunz, Bouxcuengh ciemq 90% doxhwnj. Mbanjhozveij youq hongsaeh cauxguh mbanj okmingz ndawde, guh le aenmbanj vanzging cunghab cingjceih baugvat rog ciengz bae moq、saunenzgungh ndaw mbanj、ranzsaw nungzgya daengj gungh 22 loih hanghmoeg aeu hwnjguh lajmbanj sezsih goekdaej caeuq sezsih goenggungh guh cujyau neiyungz haenx; bi 2011 youh guh gaij diengzhaex caeuq soengq raemx haeuj ranz gunghcwngz, caepguh le raemxuq cawqleix cungsim, mbouj caiq hawj raemxuq lae haeuj ndaw dah, gij gingj song hamq dah caemh bienq ndaej gyaeundei. Youq Swcigih goengbouh buek daih’it 13 aen “cin mizmingz mbanj mizmingz daegsaek Guengjsae” ndawde, Mbanjhozveij ndaej bingz guh “aenmbanj mizmingz yiengh swngh- dai (nungzyez) daegsaek”.

Mbanjhozveij daj aen sigij gonq goujcib nienzdaih couh hainduj baengh gohgi baenz doengh ndaem byaekgaphenj, gyoengqde gaijliengz le gij binjcungj byaepgephenj baenz binjciz engq ndei maj ndaej engq foengh, gai ndaej engq bieng; vunzmbanj laebbaenz le lajmbanj ginghgijyinz hezvei, ciuq gak dieg hawciengz gaicawx lainoix bae cujciz vunzmbanj miz giva dwk bae ndaem byaekgephenj, veq gvaq mboengq miz lai gai cienh, hawj byaekgephenj ndaem ndaej yinz gyaqcienz bingzonj; vunzmaenh ndaw mbanj lij banh gunghswh doiq byaekgephenj guh gyagoeng cangdaeh, hawj gyaqcienz gai ndaej lai bengz, cigsoh gai daengz Sinhcin、Yanghgangj、Aumwnz daengj hawsingz hung bae, saedyienh souhaeuj bi beij bi lai, bi 2012 daengx mbanj moix vunz cinghsouhaeuj couh mauhgvaq le 10000 maenz ngaenz.

Bi 2013, vunzlai aen mbanj neix gag doxiu comz ngaenz ok rengz, beuj boengz daeh nyapnyaj, hawj geij aen mboq henz mbanj gaenq dimzsaek baenz geijcib bi haenx dauqcungz nyoenx raemx sawyau okdaeuj, seizneix geij aen mboq aen hung aen iq doxlienz baenz daemz, vunzlai youq gyang daemz caep le gingjrin, roen henz daemz guh ndaej bingzbwd lij ndaem gofaex gova fuengbienh vunzlai youzcet, hawj aenmbanj engq gyaeundei engq yinx vunz, coicaenh le hong lijyouz hwngfat.

Seizneix, Mbanjhozveij guh miz aenlaeuz cunghab vwnzva gohgi hozdung、daizheiq gvangjcangz vwnzyi yienjok、roqluengq vwnzva senhconz caeuq lanzgiuzcangz ronghdaeng、ranz binghbanghgiuz、diuzroen youzbyaij cangqndang doengh gij diegciengz neix, ndaw mbanj ciengzseiz cujciz vunzlai diuq foux yanghgoh gyonghwet、dwk lanzgiuz、bengcag、 dwk bingh- banghgiuz、 dwk geizciengh、byaij- roen daengj lienhndang hozdung, ndaw mbanj gizgiz yienh’ok gij yiengh doxhuz vuenyungz, hawj vunz hozhaenz.