“Duzlingz gvaqbae gaeqgim daeuj, hong moq aeu daj naek bae guh, daezgonq guhsat ‘cibsam haj’, gak gaep bouxdaeuz aeu gvansim.” Bi 2017 ngamq hainduj, Ciz Yivwnz canghfwen Bouxcuengh Hwngzgyauz Cunh Swcunh Cin Siengcouh Yen youq camgya aen hoih fwen lienzvuen minzcuz youz Ginhsiu Yauzcuz Swciyen Dungzmuz Cin youq ndwencieng cohaj daengz cocaet hai haenx ciengq daengz. Canghfwen wnq cungj gyaez ciengq fwenyoux, hoeng Ciz Yivwnz cix gyaez ciengq fwen caeuq seizdaih caemh yamq, de binaengz ndaej haujlai danhvei cingj bae rog yienh ndaw yienh ciengq fwen seizdaih, dwg canghfwen caeuq seizdaih caemh yamq he.

Ciz Yivwnz seng youq Mbanj- cuengh, daj iq couh caeuq fwen guhdoih, ndaw mbanj miz haujlai canghfwen, bingzseiz youq gyang reih gyang naz eu fwen, Ciz Yivwnz daj iq couh gyaez riengz gyoengqde hag eu fwen, 20 sigij 50 nienzdaih byai de daj Sizlungz Cunghyoz bizyez doeklaeng, youq swnghcanjdui guh hongnaz seiz, couh itmienh guh hong itmienh hag eu fwen, hoeng seizhaenx buq “seiq gaeuq”, cij ndaej laeglemx ciengq, mbouj ndaej haeda ciengq. Gaijgwz hailangh doeklaeng, Ciz Yivwnz cij gamj haeda eu fwen, de eu fwen seiz, couh roxyiuj siengj eu fwen okmingz, couh aeu caeuq bouxwnq mbouj doxdoengz, ciengq gij fwen caeuq seizdaih caemh yamq, yienghneix cij miz danhvei cingj bae ciengq. Aenvih de gyaez eu fwen seizdaih, leihyungh fwen seizdaih senhconz fazci, coicaenh gwnzbiengz cinbu, minzcuz doxgiet, minzcuz huzndei, ndaejdaengz Ouh Licungh veicangj Siengcouh Yen Fwen Hezvei haeujsim, couh yiengq mizgven danhvei doigawj de bae ciengq gij fwen fazci caeuq minzcuz doxgiet, bi- gvaq Siengcouh Yen Swhfazgiz couh cingj de bae daengz 11 aen yanghcin eu fwen senhconz. Aenvih beksingq Siengcouh Yen gyaez dingq fwen caeuq eu fwen, Ciz Yivwnz daengj canghfwen bae daengz gak yanghcin ciengq gij fwen fazci caeuq minzcuz doxgiet seiz, cungj miz haujlai bouxyawj, Ciz Yivwnz doiq gij cingzgvang seizneix ciengq “Cunghvaz minzcuz daengx ranz hung, minzcuj fazci beksingq gyaez, bouxboux souj gijliz souj fap, saedceij vuenyungz youh onjdingh.” Aenvih de ciengq gij fwen mizgven fazci, yinx ndaej haujlai vunz daeuj yawj daeuj dingq, mboujdan son’gyauq le beksingq, doicaenh fazci hwnjguh, doiq gihgvanh danhvei fanj nduknaeuh hix miz gij yiyi youqgaenj. Ndaw yienh miz haujlai danhvei yungh hot fwen neix son’gyauq ganbu, hai hoih fanj nduknaeuh aeu hot fwen neix daeuj gangj, doiq fuengzre famhfap yaugoj haemq ndei.

Aeu ciengq gij fwen caeuq seizdaih caemh yamq, couh aeu roxyiuj gij saeh、 cwngci seizneix, Ciz Yivwnz mboujdan ciengzseiz yawj gij sinhvwnz gwnz densi, lij ciengzseiz yawj bauqceij saw dangj raeuz, hagsib guekgya mizgven faplwd fapgvi, yienghneix ndaw sim cij miz doxgaiq ciengq, cij ciengq ndaej hab dauhleix, hab faplwd fapgvi caeuq mizgven cwngcwz guekgya, lumjbaenz de doiq gij cingzgvang cingcinj bangfuz seizneix ciengq daengz:“Cingcinj bangfuz aeu gaem ndei, gihcwngz gwnzlaj aeu geiqmaenh, roengz mbanj bae diucaz modaej, cienfanh mbouj aeu cienzhoengz.” “Cingcinj bangfuz aeu nyinhcaen, mbouj ndaej biensim doiqdaih vunz, diucaz modaej aeu caensaed, mbouj ndaej baihlaj gangj cingzvunz.” Doiq gij hong cingcinj bangfuz seizneix miz le cozyung haemq ndei. Danghnaeuz de mbouj roxyiuj gij cwngcwz hong cingcinj bangfuz Cunghyangh, couh mbouj ciengq ok ndaej gij fwen baenzneix, aenvih de ciengq gij fwen cingcinj bangfuz ndei, de ndaej yen fuzbinzban iucingj bae ciengq gij fwen cingcinj bangfuz, doiq doicaenh hong cingcinj bangfuz daengx yienh miz gij yaugoj haemq ndei.

Diegyouq Ciz Yivwnz dwg dieg Cuengh、 Yauz、 Myauz、 Gun daengj minzcuz doxcomz he, de yawjnaek guh ndei hong minzcuz doxgiet dangdieg, ciengzseiz leihyungh fwen senhconz minzcuz doxgiet, lij yungh fwen diuzgaij gij ngaekngeu ndaw mbanj. Bi’gvaq miz geij boux mehmbwk ndaw mbanj aenvih miz mbangj saedceij ngaekngeu, Ciz Yivwnz couh yungh fwen bae diuzgaij, de ciengq daengz: “Minzcuz doxgiet ceiq youqgaenj, beksingq daengx guek aeu geiqmaenh, huzndei caez youq caemh hwngfat, yien fwngz byaij gvaq giuz baenz fouq.”“Minzcuz doxgiet ndeicawq lai, leih guek leih ranz miz song leih, beksingq daengx guek riengz dangj byaij, doengzcaez hwnjguh Cunghvaz moq.” Aenvih Ciz Yivwnz yungh fwen gangj cingz gangj leix, hawj geij boux miz ngaekngeu haenx doxndei dauq lo. Hot fwen de ciengq minzcuz doxgiet haenx, hix ndaej daeng youq mbaw bauqceij Laizbinh Yizbau bineix ndwen 2 ngoenz 1. De daj bonjfaenh hainduj guh ndei minzcuz doxgiet, daengx ranz huzndei, bi’gvaq de sij bien faenzcieng 《Gij Gojgaeq Ranz Gou》lij ndaej aenciengj yen lauj- ganbu giz banh haenx. De ciengq gij fwen sevei cujyi hwzsinh gyacizgvanh ndaejdaengz dangjveij cwngfuj dangdieg haenhndei caeuq haeujsim. Dingq:“Siengj aeu guekcoj engq fouqgiengz, gaem ndei gohyoz fazcanjgvanh, leihyungh gohyoz guh seiqvaq, guekcoj hoengh ndaej fanh bi raez.” “Sevei cujyi gvanhnen moq, doengzcaez hagsib gamj baenaj, vwnzmingz huzndei guh baenz fouq, mbouj ndaej guh caeg caeuq doj cienz.” Neix couhdwg gij fwen de ciengq daengz sevei cujyi hwzsinh gyacizgvanh lo.

Aenvih Ciz Yivwnz ciengq gij fwen caeuq seizdaih caemh yamq, ndaejdaengz dangjveij cwngfuj dang- dieg yawjnaek, de binaengz cungj ndaej iucingj bae yienj eu fwen daengz cibgeij ngeihcib baez, neix gikcoi de bae ciengq gij fwen seizdaih engq lai engq ndei haenx, gij fwen de ciengq haenx lij ndaej doigawj bae daeng bauqceij, bi’gvaq Laizbinh Yizbau couh miz song baez daeng gij fwen de cauxsij haenx, bineix gaenq youq Laizbinh Yizbau fat ngeihcib geij hot lo, de dwg canghfwen ndaw- biengz daengx yienh dandog ndaej youq bauqceij si gaep doxhwnj fat fwen he.