□ Lanz Han’gvangh

Sai:

Bineix sam nyied sam,

Aenq baenz roeggajleij.

Haeuj siujgangh sevei,

Daixdei ok vasim.

Sing go duenh youh duenh,

Fwen cienz daengz Cunghyangh.

Seizneix diendeih moq,

Bouxhoj bienq bouxmiz.

Mbwk:

Ngoenzneix sam nyied sam,

Daeuj gvangjcangz ciengqgo.

Gyoengq mehmbwk bouxcoz,

Gunghoh gungcanjdangj.

Fwen ciengq ndwenngoenz hoengh,

Najhoengz lumj mauxdan.

Miz gwn daenj ndaej raeuj,

Baengh dangj daeuj daiqloh.

Sai:

Cietgo sam nyied sam,

Raeuz ndaej langh vuenyungz.

Cienz Guengjsae lwgminz,

Caez langh sing ciengq go.

Geizhoengz ndaw rumz fan,

Gyonglaz naeng Dinghdangh.

Seizneix sinh sevei,

Beksingq ndaej haisim.

Mbwk:

Ndaej nyi sing gij go,

Lumj baenz boq loxlez.

Cangzgeq goh cangzgeq,

Yaeuh gaeqmeh rox haen.

Vunz mbouj sang mbouj daemq,

Neix youq gyawz gunghcoz?

Canghfwen goh canghfwen,

Sing gwq nduenndende.

Sai:

Gou dwg vunz guhreih,

Daeuj gizneix doxbungz.

Meh seng youq lajmbwn,

Gou dwg vunz Yinhcwenz.

Yangh dwg yangh Hawmoq,

Mbanj dwg mbanj Hoengzgeiz.

Nienzgeng haeuj bineix,

Ngeihcib seiq gyau cin.

Mbwk:

Suenq raeuz miz fukheiq,

Daeuj gizneix doxraen.

Ranz nuengx youq Rungzdaemz,

Gek bya daengz Hawmoq.

Vunz rimyiengh rimcou,

Raennaj mbouj yungzheih.

Lajmbwn vunz fanh cien,

Miz yienz cij doxraen.

Sai:

Namzningz hai gohvei,

Daeuj gizneix doxraen.

Suenq raeuz miz yienzfaenh,

Doxdaengq mbouj nyaenqnyenj.

Yawj nuengx gvailili,

Ceiq angq dwg ngoenzneix.

Langh nuengx mwngz miz sim,

Vagim boiq va’ngaenz.

Mbwk:

Lungz caeuq fungh doxboiq,

Baenzdoiq cij doxraen.

Caen duhraeuz yienzfaenh,

Ndwenlaeng bae dwnghgi.

Raeuz song vunz doengzeiq,

Vunhyinh seih dien caux.

Caez bongh haeuj siujgangh,

Lohnaj gvangqlanghlangh.