“Gogaeu maj rim bo, hohhoh san canh cienz; dinfwngz daihdaih cienz, gai ok biengz ok guek.” Hot fwen sepset haprwenz neix, eu ok gij saedceij vuenyungz vunzmbanj Dading Cunh Disuh Cin Duh’anh Yauzcuz Swciyen.

Dading Cunh dieg youq baihsae Disuh Cin, liz yienhsingz Duh’anh 13 goengleix gyae, dieg gyaeundei vunz gvaigvet. Daengx cunh miz 1085 ranz 4611 vunz, reihnaz moix vunz bingzyaenz mbouj daengz 0.7 moux, gaxgonq dwg aen cunh gungzhoj ndeu. Bi 1998 gvaqdaeuj, vih cauxlaeb aen cunh guhyiengh siuj- gangh vwnzmingz Hozciz Si, dangjcihbu aen cunh neix baengh gij ndeindiq vunzmbanj rox dajsan, sonyinx vunzmbanj aeu aen fuengsik “gunghswh + nungzhoh” haenqrengz hwngfat faexcuk gogaeu go’em gunghyibinj daegsaek canjyez, gunghswh bau ra dinghdan、roen siugai、laeb dieggoek dajsan, vunz- mbanj couh ciep mbawdan youq ranz ciuq yienghdoz mbawdan dajsan, ranzranz ngoenzngoenz cungj guh ndaej nyaengqnyinyi, doxgaiq san okdaeuj le gyau hawj gunghswh gai okbae, demlai souhaeuj. Seizneix, ndaw mbanj gij doxgaiq dajsan cix daj gaxgonq cij dan miz doxgaiq duk san hwngfat daengz gogaeu、go’nywj、diuzfaex、 mbaw、 nyangj、naeng、ganj、rong go’gvang daengj dinfwngz doxcab dajsan、nyumx saek haenx gungh 300 lai dauq 1500 lai cungj doxgaiq, gij doxgaiq san okdaeuj haenx caizliu daegbied、yienghsik moqsup、ndeiyawj saedyungz、caet- liengh ndei gyaqcienz cienh, ndaej daengz gyoengq canghhek ndaw guek rog guek haengjgyaez, doxgaiq gai daengx daengx guek gak aen hawsingz hung, caiqlij gai daengz Meijgoz、Fazgoz、Yizbwnj、Yinghgoz、Hozlanz、Gyahnazda、Bijlisiz、Audaliya daengj 20 aen guekgya dem, mingzdaeuz ndei riuz doh gwnzhaw ndaw guek rog guek, baenz le “Aenmbanj doxgaiq faexcuk gogaeu go’em dajsan daengx guek” . Bi 2011, Swcigih dingh Dadingh Cunh guh buek daih’it “Aencunh mizmingz daegsaek yiengh gungh- mou”, doengz bi aeundaej aen mingzdaeuz ndei aencunh vwnzmingz daengx guek.

Dading Cunh daj ciuhgeq couh cienz roengz dinfwngz aeu faexcuk gogaeu dajsan, doengh bi neix daeuj, aen cunh neix giethab hwnjguh aencunh mizmingz daegsaek gungh- mou, hopheux hongsaeh dajsan, dazyinx vunzmbanj cauxguh aen- mbanj yienghmoq ciuhneix “Hong- saeh guh hung guh ak、yiengh mbanj gag miz daegsaek、aenmbanj seuqcingh gyaeundei、vunzmbanj vuenyungz doxhuz”, aeundaej cingzyauq yienhda. Youq Dading Cunh, gogaeu、 go’em、 mbawoij、faexcuk、 naenggo’gyoij、 ganj- haeuxyangz doengh go maj youq gwnz bya mbouj dij ngaenz haenx, ginggvaq fajfwngz soemgiuj vunz- mbanj dajsan, baenz le batva、swxvenj、swxgaeu、haizdaz、gak cungj doenghduz、goenglaux swngdan doengh gij doxgaiq gyaqciq haenx, canh ndaej haujlai ngaenz.

Daj bi 2012 gvaqdaeuj, Dading Cunh gonqlaeng roengzngaenz gyawj 2000 fanh maenz hwnjguh sezsih goekdaej, guhsat le roen heux mbanj、rog ciengz aenranz bae moq、douhung haeuj mbanj、diuzmieng baiz raemx re raemxrongz、laeuzbanhgoeng cunhbu、cunhgaep nyapnyaj cawqceq hanghmoeg、ranzlaeuz vujbauj、soengqraemx hanghmoeg、veiswngh- siz caeuq gaij raemx gaij diengzhaex doenghgij hongsaeh neix, henz dah henz roen、naj ranz laeng ranz, cungj ndaem gofaex gomak gova, ndaw mbanj cang miz daengroen, yawj bae seuqcingh moqsup, gyaeundei yinx vunz.