“Gyauhlingz caencingq dangjyenz ndei, haemzhoj vunzlai dawz haeujsim; daiq gou daeuj doengh’oij guh hong, lumjbaenz caen boh caeuq caen meh. Ngoenzneix gihdi fat cienzhong, ciengq go diuq foux gvaq geij baez; lumjbaenz doenghbaez ndaej gimbuengj, vuenvuen heijheij bae gvaq cieng……” ndwen 1 ngoenz 23, liggaeuq ndwenlab ngeihroek, ranzgungzhoj Veiz Gveibingh song gvanbaz lingx ndaej 1.2 fanh maenz ngaenz yungh ndwen lai seizgan guenjleix、 raemj daeh、 cang oij roengz oij haenx, ndaw sim gig angq, gyoengqde couh ciengq hwnj le hot fwen baenzneix. Gij fwen ciengq daengz dangjyenz ndei haenx couhdwg Duh’anh Fwen Hezvei veicangj、 bouxfucwz Dieg Ndaem Oij Yi’gveih Duh’anh Cinz Gyauhlingz. 20 lai bi daeuj, de dang gvaq lauxsae daigo、 yenzcangj youwzyenz lwgnyez louz mbanj、 canghyw lajmbanj、 cunhgan、 laujcungj giyez iq、 veicangj fwen. Mboujlwnh guh faenh hong lawz, de cungj gvansim vunzlai haemzhoj, gyaez bang vunz, cienzndenq naengzliengh ndei raeujrubrub, ndaejdaengz vunzlai dangdieg haenh baenz “naezyou lix”.

Son Saw Son Vunz Sam Cik Gyangjdaiz Gvaq Ndaej Angq

Bi 1993 ndwen 8, Cinz Gyauhlingz unqswnh gyaeundei haenx daj Duh’anh Yienhsingz Gai Minzhoz haq daengz Yougyangh Cunh. Seiz hagseng, Cinz Gyauhlingz gyaez vwnzyoz, miz gij giekdaej sij faenzcieng naekgywd, caeux couh ndaej Disuh Yangh Gyauyuzcuj yawjraen. Baenzgya doeklaeng ngoenz daihsam, de couh gipgipmuengzmuengz byaij hwnj gwnz gyangjdaiz lajmbanj, baenz boux lauxsae daigo Yougyangh Cunh Siujyoz he. Hwnjdangz、 ciengqgo、 diuqfoux、 guh’angq, gyoengq lwgnyez dwggyaez neix buenx de gvaq seiz angqyangz vuenyungz he.

Youq seiz mbouj hwnjdangz, Cinz Gyauhlingz saeqsim haenx yawjraen bouxcoz Yougyangh Cunh ok rog guh hong haemq lai, son’gyauq lwgnyez louz mbanj baenz dieg yawj mbouj raen he. Lwgnyez louz mbanj youq ranz dan hawj daxgoeng daxbuz ciuqgoq, son’gyauq mbouj ndaej ndei. Bi 1996, de gangjfug bouxgvan, aeu ranz swhgeij gaij banh baenz le youwzyenz lwgnyez louz mbanj. Bi haenx ndwen 9 youwzyenz cingqsik haihag, lwgnyez daj 20 boux cug bi gyalai daengz 50 lai boux, ceiq lai seiz daengz 70 lai boux. Aenvih cienzbouh dwg ranz youq lajmbanj, youwzyenz sou cienz gig daemq, bungz daengz ranz gig gungzhoj, Cinz yenzcangj ciengzseiz gemj noix sou cienz.

Canghyw Cunhgan Lajmbanj Haemzhoj Vunzlai Dawz Haeuj Sim

Yougyangh Cunh liz yienhsingz 10 lai goengleix, guenj 47 aen mbanj 6300 lai gyaeujvunz. Bi haenx daengx cunh mbouj miz saek dieg yw bingh, gij cingzgvang lajmbanj giep yw caeuq gij haemzhoj bouxbingh coeg haeuj ndaw sim de bae. De doekgonq daj Guengjsae Veiswngh Ganbu Guenjleix Yozyen Yihsw Cunghconh bizyez, aen siengjmuengh de couhdwg bang bouxbingh yw bingh. Ginggvaq baenz caengz baenz caengz gaujsi, bi 1993 de cungjsuenq ndaej banh Bahhoz Veiswnghsoj.

Bahyizdui 75 bi bouxlaux louz mbanj Liengz Yiyau, bi 2010 ndwen 3 miz ngoenz he mbouj siujsim doekroengz lae ranzlaeuz bae, ndaej sieng lai. Cinz Gyauhlingz gipmuengz cuengq vanj haeux roengzdaeuj, lumj mbin nei bae yawj bingh gonq. Cinz canghyw yungh benj gab ndei, yienzhaeuh caenndang soengq de bae yihyen yw bingh, mienx ndaej famh loengloek bengrag sieng baez daihngeih, bouxlaux ndei le ok yihyen doeklaeng gig gyo’mbaiq de; Bahwdui 70 lai bi bouxlaux louz mbanj Liengz Mahsungh, lwg bawx cungj youq Guengjdoeng guh hong, dahlwg haq bae dieggyae, vih fuengbienh lienzhaeh, Cinz Gyauhlingz guh mbaw gajdienhvah at youq laj swiz bouxlaux. Bi 2013 ndwen 12 miz haemh he gig nit, Liengz Mahsungh dwk dienhvah hawj de geij baez youh mbouj gangj vah. De baengh gij gingniemh bonjfaenh duenqdingh, Cinz canghyw gipgipmuengzmuengz daenj buh ok dou, seizhaenx Liengz Mahsungh heiq nyieg saeknaj heu liux, yienzlaiz dwg baenz le okleih gizsing siginsing, youh rueg youh siq. Cinz canghyw sikhaek hai yw daj cim, daengz mbwn rongh bouxbingh ndei di cij lizhai……

Bi 2000 ndwen 7, Cinz Gyauhlingz gya haeuj Cungguek Gungcanjdangj, diuz rap gwnz mbaq engq naek lo. Bi 2001 ndwen 7 doenggvaq minzcuj douzbiuq senj, de ndaej biuq ceiq lai ndaej dang Yougyangh Cunhveij fucujyin. Dajneix de engqgya caenh sim caenh rengz vih vunzmbanj gej haemz gej hoj, daiq vunzmbanj vut gungz baenz fouq. Bi haenx, Yougyangh Cunhbu daengz yienhsingz dwg diuz roen gaebged he, roengz fwn roen boengzhomq raixcaix, mbwn gvengq couh namhfaenx mbin- foenfoen. Cinz Gyauhlingz lai baez ra daengz cwngfuj、 ra bouxak、 ra ngaenzcienz, ginggvaq lai bi roengzrengz, bi 2013 doenggvaq “it saeh it yaeng” caizcwng hanghmoeg, coih ndei dajndongj diuz roen doeng mbanj Yougyangh Cunh, bued roengz 98 fanh maenz、 raez 3 goengleix、 gvangq 4.5 mij, gaijbienq aen yienghsiengq doeklaeng mbanjranz.

Laujcungj Veicangj Vuzciz Cingsaenz Sueng Fungsou

Guh geij cungj cizyez, Cinz Gyauhlingz ngoenznaengz lumj aen cung hwnj gaenj fatdiuz nei baenq mbouj dingz. Bouxgvan yawj youq gyang da, in youq ndaw sim. Bi 2014 aenvih baeg lai, Cinz Gyauhlingz swz bae cunhgan caeuq canghyw lajmbanj, gaijsanq youwzyenz. Doengzbi laebbaenz Dieg Ndaem Oij Yi’gveih(giyez iq), Cinz Gyauhlingz cienjbaenq daengz saehnieb diemzvan. Ginggvaq 3 bi buekguh, seizneix ndaem oij mienhcik hwngfat daengz 300 lai moux, bi’gvaq saedyienh canjciz 1500 lai dun 72 fanh maenz. Daj guenmbanj bienq baenz meh lauxbanj, yienznaeuz giek bienq lo, hoeng de mbouj lumz sim, gij cingz gung- canjdangjyenz gvansim gyoengq vunzlai daj gyaeuj daengz rieng cungj mbouj miz saek di gaijbienq gvaq.

Veiz Gveibingh、 Veiz Yiyenz song gvanbaz gag youq ndaw bya Dunghgai, gvaq gij saedceij lumj caeuq seiqgyaiq doxgek hai nei. Gyoengqde seng miz 7 boux lwg, daengx bi giep doxgaiq gwn buhvaq daenj. Gyauhlingz roxyiuj gij cingzgvang neix doeklaeng, ndaw sim lumj deng cax heh nei. Bi 2013 hainduj Veiz Gveibingh daengx ranz buen daengz gihdi dajgoeng, Gyauhlingz hawj daengx ranz Veiz Gveibingh youq caengz laeuz daihsam aen ranz swhgeij, caeuq ranzvunz swhgeij caemh gwn caemh youq caemh guh hong. Bi 2016 raemj oij caq dangz geizgan, song gvanbaz siuj Veiz caeux hwnq haemh dauq, raemj、 gwed、 cang oij, ndwen lai seizgan dajgoeng ndaej souhaeuj 1.2 fanh maenz.

Cinz Gyauhlingz lij leihyungh hozcozse, saedhengz “hawciengz+conhyez hozcozse+nungzhoh” “giyez iq+gihdi+nungzhoh” daengj vunqsik lingzvued haenx, yinx ndaej 40 lai hoh ranzgungzhoj camgya, bangcoh gyoengq vunzlai vut gungz baenz fouq.

Duh’anh fwen ndawbiengz goek gyae rag raez, gyoengq vunzmbanj Yougyangh Cunh bien ciengq fwen daihdaih doxcienz. Vih fungfouq gij vwnzva saedceij vunzmbanj, bi 2012 Cinz Gyauhlingz cujciz laebbaenz “doih yienjheiq Yougyangh Cunh”caemhcaiq dang duicangj. De cawx buhvaq、 hongdawz yienjheiq、 banh ban son’gyauq bouxhag mbouj aeu cienz, youh nyaengq youh angq. Bi 2015 ndwen 10, Aen Hezvei Hawfwen Guengjsae hawj mingz Hinghli Cunh Douzlieng、 Sanhdaujvanh Hawfwen guh hawfwen Guengjsae; bi 2016 ndwen 5, Hinghli Cunh ancoh baenz aenmbanj fwen Guengjsae. Bi 2016 ndwen 12 ngoenz 28, Duh’anh Yen Fwen Hezvei laebbaenz, Cinz Gyauhlingz dungxcaiz ceiq ndei, ndaej dang veicangj fwen hezvei aen yienh neix. Seizneix Duh’anh Fwen Hezvei veiyenz daengz 180 boux, doih fwen bae Namzningz、 Gveilinz、 Baksaek nem rog gih Yinznanz、 Gveicouh、 Guengjdoeng、 Aumwnz daengj dieg yienjok gvaq. Gaenh bi neix daeuj, aen hezvei neix banh senhconz fuengcim cwngcwz dangj daengj neiyungz yienjok mbouj aeu cienz 300 ciengzbaez, bouxyawj daengz 5 fanh lai vunzbaez. Hezvei biensij yienjciengq “hag song guh ndeu”、 cibbet daih、 cibbet gaiq roekcung cienzhoih cingsaenz daengj fwen ranzranz cungj rox, baenz le gij doenghlig hung’ak bang doi dangdieg cingcinj banggungz.