Mbaet gwn mbaet yungh dwg gij caenleix ciengxlwenx mbouj bienq ndeu.

Gyoengq boux vunz okmingz, haujlai gaenx guh coih ndang, mbaet gwn mbaet yungh.

Fan Cungyenh lij iq hwnjdangz, gig gaenx doegsaw. Miz ngoenz ndeu, boux baengzyoux daeuj ranz de youz，rox ranz de ndwenngoenz haemzhoj, couh soengq noh daeuj hawj de. Hoeng de mbouj aeu, boux baengz- youx cam de vihmaz mbouj aeu, de gangj:“Gou gwn hoj gwn haemz gvenq lo, lak gwn noh lau dungx in nyaenx mbouj ndaej.” Saeh neix yawj ok de gaenx guh coih ndang, mbouj deng gij doxgaiq ndei yaeuh, danghnaeuz de seizbienh couh gwn noh boux baengz- youx soengq, ngoenzlaeng mbouj miz gwn, aiq rox ngeix gij feih noh, yienghneix baenzlawz lij miz sim bae doegsaw ne?

Gaxgonq, miz boux laux ndeu dai bae, cij ce gaiq benj ndeu hawj doiq lwg de, lwg de mbouj rox gij eiqsei gaeqboh, couh gawq gaiq benj neix baenz song, daegbeix dawz cih “gaenx”, daegnuengx dawz cih “giemh”. Gangj daeuj hix geizheih, doeklaeng daegbeix dahraix cij ndaej cih “gaenx”, guh hong lumj duzvaiz nei cij rox guh, mbouj lau baeg. Hoeng, de mbouj rox mbaet gwn mbaet yungh, gaenx guh daengx bi ndaw ranz maz hix mbouj lw, sai ngaenzcienz caeuq doxgaiq liux caez. Daegnuengx hix cij ndaej cih “giemh”, lumj duz gaeqdiet nei, geu bwn he hix mbouj doek, cij rox mbaet gwn mbaet yungh. Hoeng de gikgakgak, mbouj gaenx guh hong, doeklaeng yungh gij ngaenz gaxgonq miz liux caez, ndaw daeh couh cingh lo. Gvaq mbouj geij nanz, song beixnuengx hoj lumj gaujvaq nei, gwn miz donq neix mbouj rox donq laeng youq gizlawz. Doeklaeng, song de dawz aen cih gaeqboh ce lienz hwnjdaeuj, cij rox gaeqboh muengh gyoengqde “gaenx guh hong naz, mbaet gwn mbaet yungh”, seizneix cij guhdoih roengzrengz bae buek guh, ndwenngoenz gvaq ndaej hoengh- fwdfwd.

Bouxgeq ciengz gangj “caek raemx gyoenq baenz dah, naed haeux comz baenz bya”. Guek raeuz miz cibsam ik vunz, danghnaeuz moix boux vunz luenh yungh maenz ngaenz ndeu, daengx guek couh yungh langh cibsam ik maenz ngaenz! Ndigah, raeuz aeu gaenx guh gunghcoz, mbaet gwn mbaet yungh.