Youq baihdoengbaek rog gyang- singz Vujmingz Gih, miz aen mbanj moq yaprongh lwenqda ndeu heuhguh Mbanjcizsingh. Diuzroen haeuj mbanj aeu suijniz bu dwk gvangqyub bingzbwd, gij ranzlaeuz song sam caengz ciengz hau vax mong faen haj coij baij dwk yinzrwd caezcup, gyanghongh naj ranz aensuen laeng ranz ndaem gofaexmak heuswd, gwnz ngauqrin hungloet bakmbanj deugaek miz “aencunh swnghdai gaep guekgya” geij cih sawhung yap ronghyebyeb, hawj vunz laihnaeuz haeuj daengz le ranghdieg ranzbezsu hawsingz, hozhaenz dangq- maz.

Mbanjcizsingh dwg aen mbanj ndaw Laibaz Cunh Cwngzsiengh Cin Vujmingz Gih, daengx mbanj ngamq 24 ranz vunz, liz gyangsingz Vujmingz Gih 5 goengleix gyae, mbanj iq gyaeuget, seiqhenz mbanj faexheu hophumx, lwgmak seiqgeiq homfwt, ranghdieg caemdingh, vunzmbanj simsoh. Mbanj moq hwnjguh dwg daj bi 2001 haihnduj, youq bumwnz baihgwnz lai fuengmienh haeujcoengh lajde, vunzmbanj gag baengh swhgeij okrengz guh, doengjit dajveh anbaiz caeuq caepguh, song sam bi gvaqbae, 23 aen ranzlaeuz miz hongh miz suen engq miz daegsaek Mbanj- cuengh yienghranz doxlumj haenx couh guhbaenz moqsagsag, ndaw ranzlaeuz dajcang seizhwng lwenqda, gyasei gauhdang、 gyadienh ciuhneix yienghyiengh miz caez, naj ranz laeng ranz lij ndaem miz gomak- fiengz、gomakmoiz、godunghcingh doenghgij faexmak heuswd neix, daengx mbanj boiqdauq guh miz luengqhongh、miengbaizraemx、diengzhaex、loegvaq daengj goekdaej sezsih, baihnaj aenmbanj lij guh miz aen laeuz song caengz yawjsaw guh’angq ndeu caeuq aen lanz- giuzcangz ndeu, hawj saedceij vunzmbanj lai cungj lai yiengh.

Ciuq cam rox, cib lai bi gaxgonq, Mbanjcizsingh caenh dwg aen mbanj gungzhoj baengh ndaem maenzfaex、haeuxnaz gvaq saedceij ndeu, doeklaeng ndaw mbanj miz vunz daiqdaeuz ndaem gomaknganx daengj gomak go’byaek ndaej canh ngaenz, vunzmbanj caemh doxriengz dwk ndaem mak ndaem byaek hwnjdaeuj, doengzseiz yied daeuj yied gvansim ndaem go maz ndaej canh ngaenz lai、gwnz hawciengz miz maz bienqvaq, ciuq hawciengz yaekaeu bae dajndaem. Seizneix, daengx mbanj 300 lai moux reihnaz dauqcawq dwg baenz benq baenz benq byaekgve caeuq gomak, dan ndaem go’byaek fouz goenghaih couh miz 160 lai moux, byaekgve binjcungj miz gveheu、lwggwz、cezgvah、gak cungj byaekmbaw daengj cib lai cungj, baenz aen mbanj nungzyez ciuhneix lizdij ndaemganq byaekgve、gomak caeuq ciengx bya ndeu, bi 2010 daengx mbanj moix vunz bingzyaenz cinghsouhaeuj couh dabdaengz 8650 maenz, vutvak le aenmauh gaeuq “gungz、boemh、yaez” haenx, byaij hwnj roen siujgangh.