Raen naj baez nduj, yinx da vunz couhdwg gouh haizliengz de daenj youq din haenx, cungj haizliengz mehmbwk lajmbanj gyaez daenj haenx, haiz nem le namh. Da baez yawj, cix raen de dwg boux sau baihbaek maj ndaej gyaeundei he, haizliengz din de caen caeuq de mbouj doxdap.

“Haeuj mbanj riengz fungsug lo.” De naeuz. De heuh Cangh Gyahnanz, bi 2014 ndwen 6 daj Cunghyangh Minzcuz Dayoz ginhyungz hi bizyez, gauj haeuj Guekgya Minzveij Ginghci Fazcanjswh baenz boux gohyenz cunghhozcu aen swh neix, dwg gaiq daeuz senjdiuswngh cunghcujbu daj gauhyau yinggai bizyezswngh genjleh okdaeuj haenx. Dahsau bi 1992 seng、 maenhndei youh miz caijsoq ndei neix mbouj siengj daengz, daj neix gvaqlaeng swhgeij yaek caeuq Dwzbauj giet roengz faenh cingz naekna he.

Giet Cingz Dwzbauj Hainduj Ndaej Muzlienh

Bi 1989, Dwzbauj Yen ndaej Guekgya Minzveij dingh baenz aen yienh bangfuz dinghdiemj lienzhaeh hong banggungz, 20 lai bi daeuj gonqlaeng coux daeuj 12 boux gvaciz ganbu. Bi 2015 ndwen 8, ciuq gij iugouz cunghcujbu, Cangh Gyahnanz couh ndaejdaengz Guekgya Minzveij baij daengz Dwzbauj Yen Cwngzgvanh Cin gvaciz dang cincangj culij.

Ngamq daengz Dwzbauj seiz, dienheiq baihnamz aeng lai, mboujdan hawj de mbouj ndaej lumj youq Baekging nei daenj haiznaeng daenj mad, caemhcaiq din lij hwnj le cimj, cijmiz daenj haizliengz cij miz leih hobndei. It mienh dwg raemx namh mbouj hab, it mienh dwg atlig hong, boux sau iq ngamq camgya guhhong mbouj nanz neix doiq hong daengzcog ndaw sim caen mbouj miz daej, de heuh swhgeij dwg denjhingz “sam dou ganbu”—cigsoh daj dou ranz daengz dou hagdangz, caiq haeuj dou gihgvanh, doiq hong gihcwngz、 bouxguhnaz lajmbanj cungj mbouj miz gijmaz roxyiuj, engq gaej naeuz haeujlaeg roxyiuj. De seng youq Liuzningz Swngj Danhdungh Si, Dwzbauj Yen diegyouq baihnamz, dienheiq raemx namh、 gwnndoet sibgvenq hawj de mbouj miz banhfap itseiz gvenq ndaej, doiq Vahcuengh ganbu vunzlai dangdieg yungh haenx engq dwg mbouj rox, hainduj guhhong bungz daengz hojnanz ceiq hung, couhdwg yezvu mbouj sug caeuq gangj vah mbouj doxrox. “Nungzyez、 banggungz、 cwngdieg、 geiqseng daengj hongsaeh gihcwngz youh cab youh lai, yungh gij guhhong gingniemh mizhanh neix nanz doiqdaih ndaej, caemhcaiq Vahcuengh Dwzbauj doiq gou daeuj gangj engq dwg cungj ‘vah guekrog’ dingq mbouj rox he.” Cangh Gyahnanz yienghneix doiq gicej naeuz, “gyoengq doengzsaeh cwngfuj ndaw cin rox gou yezvu mbouj sug vahgangj mbouj doxdoeng, hainduj cungj aeu gig noix hong hawj gou guh, gawq dwg lau dwkceih gij gagsaenq gou, hix dwg lau gou bang saeh nguh, gyoengqde cingznyienh swhgeij lai guh di. Gou boux gig miz yiedcingz guhhong neix yaepyep bienqbaenz ‘bouxdafangz’‘bouxnuk’, roxnyinh gig siengsim.”

Mbouj ginggvaq fwn rumz, baenzlawz ndaej raen saidoengz? Cangh Gyahnanz mienhdoiq hojnanz mbouj fugheiq, de dinghsim roengz faencek doeklaeng nyinhnaeuz, swhgeij yienznaeuz miz cihsiz conhyez, hoeng mbouj miz gijmaz gingniemh, ndigah aeu baenz yamq baenz yamq bae guh gij hong swhgeij guh ndaej haenx. Yienghneix de daj gij hong caeuq cihsiz bonjfaenh hag ndaej mizgven haenx hainduj guh, gaenxmaenx boiqhab bangcoh lingj- dauj ndaw cin sij gak loih sawgauj. Youq guhhong seiz, de itmienh nyinhcaen sij sawgauj, itmienh doenggvaq yawj haujlai swhliu rox- yiuj hong cwngfuj gihcwngz. De gonqlaeng boiqhab bangcoh sij le 《Dwzbauj Yen Cwngzgvanh Cin Bi 2015-2020 Nungzyez Canjnieb Gveihva》《Dwzbauj Yen Cwngzgvanh Cin “Hag Song Guh Ndeu” Hagsib Fueng’anq》 daengj sawgauj.

Bae sawqsawq yawj, mbat daeuz ndaej hingz. Cangh Gyahnanz yawj- raen, aeu gij conhyez cihsiz daj ndaw saw hag ndaej haenx lingzvued yungh daengz guhhong, hong swhgeij couh guh ndaej baenz lo, guhhong hwnjdaeuj hix haemq yungzheih. Daj seizhaenx hainduj, lingjdauj caeuq doengzsaeh saenqnyaemh de lo, gyau gij yinvu hawj de hix bienq ndaej naek lai hwnjdaeuj.

Ndaw Sim Miz Gyaez Gaenx Guhhong

Go’ngaeux ngamq loh gok soemsoem, caeux miz biengzbeih youq gwnz douh. Cangh Gyahnanz conhyez cihsiz netsaed caeuq guhhong gingniemh cugyamq guh sug doed- yienh doeklaeng, diuzrap youqgaenj hainduj aeu hawj de rap. Bi 2015 ndwen 10, Cangh Gyahnanz boiqhab bangcoh camgya le hong hwnjlaeb dangjan ranz vaih gaij guh Cwngzgvanh Cin. Hwnj ranz dangjan aeu guh daengz it ranz it dangj, ranz vaih gaij guh aeu gyau gak cungj caizliuh lai cab haenx, haujlai beksingq daj dieggyae lajmbanj ganj daengz cin gyau caizliuh, gig baeg. Yawjraen miz mbangj beksingq mbouj rox sij saw, de couh cawjdoengh bang gyoengqde dienz daengx dauq caizliuh. Aenvih roxyiuj hong ranz vaih gaij guh gvanhaeh daengz beksingq saedceij, Cangh Gyahnanz gonqlaeng guh le hong cingjleix fan yawj dangjanq baenz cien baez. Ginggvaq song ndwen lai gyaban gya diemj dienzsij、 doengjgeiq、 doiq- yawj、 cangding, doeklaeng aeu daengx cin ranz vaih gaij guh dangjan cingjleix sat.

Youq gij ginggvaq fan yawj dangjan caeuq hwnjlaeb dangjan, Cangh Gyahnanz ginggvaq siengjngeix faencek gvinab haujlai vwndiz swhgeij yawjraen haenx. Lumjbaenz ranz vaih gaij guh cwngcwz gvancez doeksaed seiz miz caeuq vunzlai saedsaeh mbouj lienzhaeh, caeuq ranz vaih gaij guh hwnjguh mbouj miz gyaeraez gviveh, bujben miz dajveh iugouz mbouj sang, baijbouh mbouj hableix, doiq lajmbanj gvaqlaeng hwngfat lwnhcingq mbouj gaeuq daengj vwndiz. Doiq doenghgij cingzgvang neix, Cangh Gyahnanz caenhsim bae cam mizgven faenguenj lingjdauj caeuq duiyenz guhhong haenx, giethab gij siengjngeix swhgeij sij baenz bien cungjgez baugau hong ranz vaih gaij guh Cwngzgvanh Cin he, doiq hong ranz vaih gaij guh miz vwndiz daezok le genyi. Gij genyi doeklaeng ndaejdaengz lingjdauj ndaw cin nyinhhawj caeuq yungh.

Doenggvaq gij hong gig miz cingzyauq neix, Cangh Gyahnanz ndaejdaengz lingjdauj caeuq doengzsaeh engq lai saenqnyaemh. Baezlaeng, de youh rapdawz gij hong lai fuengmienh cwngfuj ndaw cin, ndawde miz haujlai hong cujyau caeuq hong youqgaenj. Cawz le caenhsim guhsat gij yinvu cujciz anbaiz haenx, Cangh Gyahnanz lij gaenxmaenx yenzgiu gij cingzgvang seizneix vut gungz bangfuz, cawjdoengh cingjgouz guh hong, caenhliengh bae cauh gij seizgei vih vunzlai lai banh saedsaeh.

Mbouj Nguh Gij Seizgan Ndei Doiq Ndaej Hwnj Sawjmingh

Bi 2016 ndwen 5, Cangh Gyahnanz daj cincangj culij diuh daengz minzcuzgiz aen yienh neix dang gizcangj culij. Daengz minzcuzgiz guhhong doeklaeng, aenvih guhhong seiz yungh sim bae cazyawj, daihliengh caeuq gihcwngz ganbu ciepcuk habsib、 simhaw ciepsouh lingjdauj daezdiemj, gyahwnj gaenx siengjngeix rox cungjgez, Cangh Gyahnanz doiq doidoengh hwngfat Dwzbauj miz le gij faencek caeuq lohnaemj swhgeij——gaem denjhingz byoengq mbangnyieg, yungh diemj daiq mienh guh guhyiengh, vih hong banggungz okrengz.

Cuzyungz Cin Mbanjnazleiz miz gij ranzcanx gaeuqgeq Bouxcuengh, gig miz rengzhoengh hwngfat baenz dieg lijyouz daegsaek minzcuz, dwg aenmbanj miz siujsoq minzcuz daegsaek Dwzbauj Yen Minzcuzgiz cungdenj dajcauh haenx; Lingzleiz Cunh dwg aen cunh bangfuz dinghdiemj Guekgya Minzveij youq Dwzbauj Yen haenx, aen cunh neix giekdaej sezsih haemq doeklaeng, vut gungz giekdaej haemq mbangnyieg. Neix dwg song aen cungdenj gunggeng fuengyiengq Cangh Gyahnanz ceiq sien ra raen. De caeuq lingjdauj minzcuzgiz bae song aen cunh neix guh cienhangh diuyenz, doiq gij ranz beksingq Mbanjnazleiz caeuq giekdaej sezsih、 canjnieb baihnaj Lingzleiz Cunh guh le nyinhcaen yenzgiu. Ginggvaq baez roengzrengz neix, Cangh Gyahnanz caeuq lingjdauj minzcuzgiz doengz- caez lied ok mbaw Dwzbauj Yen aeu Guekgya Minzveij bangfuz hangh- moeg cingdan he.

Saehsaeh cungj bwh ndei, dan caj rumzdoeng daengz. Bi 2016 ndwen 6 ndawcib, Guekgya Minzveij fucujyin Lij Canghbingz daiq doih daengz Dwzbauj Yen guh diuyenz hong banggungz dinghdiemj Guekgya Minzveij. Neix dwg lingjdauj Guekgya Minzveij gvansim Dwzbauj Yen, hix dwg gij seizgei ndei doicaenh hong banggungz Dwzbauj Yen. Cangh Gyahnanz gibseiz bauq hwnj caizliuh caeuq bangfuz hanghmoeg cingdan, hawj lingjdauj Guekgya Minzveij caenh’itbouh roxyiuj Dwzbauj Yen banggungz cingzgvang. Doeklaeng, ginggvaq lingjdauj Guekgya Minzveij yenzgiu gietdingh, youq gij giekdaej moix bi yiengq Dwzbauj Yen bued hawj 100 fanh siujsoq minzcuz hwngfat ngaenzcienz gwnzde, gyalai bued hawj 50 fanh. Ndawde, gaengawq gij saedsaeh cingzgvang hong banggungz Dwzbauj Yen, bued hawj 100 fanh maenz cienhangh ngaenzcienz hawj Lingzleiz Cunh.

Gicej lij rox daengz, seizneix Cangh Gyahnanz youh diuh daengz yen cwngfuj bangunghsiz dang fucujyin. De naeuz, “youq aen gangjvei lawz cungj dwg duenhlienh, gvaciz seizgan lij miz ca mbouj lai bi ndeu, baenzlawz ndaej guh ndei gij hong banggungz Guekgya Minzveij doiq Dwzbauj Yen haenx, gou yaek laebdaeb fatok gij cozyung diuz giuz diuz sai, mbouj nguh gij seizgan ndei, doiq ndaej hwnj sawjmingh.”