Ceiqgaenh danhvei dou miz aen yinvu ndeu, couh dwg ok guekrog bae damqcaz, hoeng baihgwnz cij hawj boux ndeu bae.

Danhvei dou vunz mbouj suenq lai, ganbu cizgungh gungh miz 21 boux, gya hwnj boux hendou Lauxvuengz dem, gungh miz 22 boux. Bae guekrog damqcaz cungj saehndei neix, byawz mbouj siengj bae ne? Hoeng ngamq ndaej boux ndeu bae, byawz ceiq hab bae ni? Geij ngoenz neix gyoengq doengzsaeh cungj lwnh gij saeh neix.

Ngoenz ndeu, goengdaeuz doiq dou naeuz:“Cawz le boux hendou Lauxvuengz, gizyawz sojmiz ganbu cizgungh caez bae bangunghsiz haihoih, doxyaeng byawz bae damqcaz.”

Gwnz hoih, goengdaeuz naeuz:“Gou ngeix bae siengj dauq cungj gietdingh mbouj roengz byawz bae damqcaz ceiq ndei, vihliuz goengbingz hableix, dou lij dwg yungh banhfap laux daeuj senj ba, couh dwg mbouj geiq coh douzbiuq. Byawz ndaej biuq lai, byawz couh ndaej bae.”

Gangj sat, goengdaeuz youh cam daihgya doengz mbouj doengz eiq aen senjgij banhfap neix, byawz doengzeiq couh yaengx fwngz. Bouxboux cungj doengzeiq, yaengx fwngz caez.

Aenvih gou dwg bangunghsiz misuh, goengdaeuz heuh gou fat senjbiuq hawj daihgya .

Gou yawj mbaw senjbiuq gyang- fwngz swhgeij, siengj le siengj, doeklaeng youq gwnzde sij aen coh swhgeij.

Geij faencung gvaq le, douzbiuq sat lo. Gou itmienh sou senjbiuq itmienh laeglemx cazyawj gyoengq doengzsaeh, gwnz naj gyoengqde cungj miz gij sairiu mbaeumbengq, yawj daeuj gak boux gag miz saenqsim.

Mbouj geij nanz, senjbiuq gyoep- suenq ndei lo. Aiya! Caen dwg hawj vunz liuh mbouj daengz, 21 boux ganbu cizgungh camgya douzbiuq haenx, moix boux cungj ndaej biuq ndeu.

Goengdaeuz najlaep lo, de senh- bu baez senjbiuq neix mbouj suenq- soq, dauq douz mbat ndeu. Goengdaeuz naeuz:“Aeu ndaej senjgij hab’eiq, daihngeih baez douzbiuq, moix boux aeu senj song boux, byawz ndaej senjbiuq ceiq lai, byawz couh bae.”

Daihngeih baez senjgij haidaeuz lo. Gou yawj mbaw senjbiuq gyang- fwngz swhgeij, ngeix le ngeix, cawz le sij aencoh swhgeij, lij sij aen coh boux hendou Lauxvuengz hwnjbae.

Mbouj geij nanz, senjbiuq gyoep- suenq ndei lo. Aiya! Gou doeksaet caez, cienzgiz 21 boux ganbu cizgungh moix boux cungj ndaej biuq ndeu, boux hendou Lauxvuengz gingqyienz ndaej 21 biuq.

Gou senhbu gij gezgoj douzbiuq le, daihgya daej hix mbouj dwg riu hix mbouj dwg.

Goengdaeuz ndatheiq raixcaix, haenqrengz bongx aendaiz mbat ndeu le, daihsing gangj:“Ngoenzneix song baez douzbiuq gezgoj cungj mbouj suenqsoq. Gou senhbu, youz gou daibyauj aen danhvei raeuz ok guekrog bae damqcaz. Danghnaeuz daihgya mbouj miz maz yigen, couh yienghneix dingh lo, sanq hoih.” Gangj sat, hujdengdeng byaij ok dou bae.

Yawj gij ngaeuzlaeng goengdaeuz byaij deuz, Siujlij naengh youq henz gou, laeglemx doiq gou naeuz:“Gou couh rox douzbiuq mbouj miz maz yungh ne, neix mbouj dwg begbeg sai seizgan ma? Caen dwg ma raeuq ronghndwen bek feiq rengz!”