Gou gaenq miz cib lai bi mbouj raen goengda lo, ciengzciengz siengj- niemh de, cungj siengj sij di doxgaiq daeuj gangjok gij siengjniemh gou doiq de. Hoeng, baez gaem bit youh cuengq roengzdaeuj lo, goengda dwg bohlungz daxmeh, de dwg boux vunz hawj vunz boiqfug ndeu, gou lau gij sawmaeg gou raiz mbouj ok gij simvuen de, gij sienhsoh de, gij dwggyaez de.

Goengda dwg bouxguhnaz laux- saed ndeu, maj ndaej ndang cangq rengz ak, lij miz song faj din hung raeuh dem, hung ndaej daenj mbouj haeuj sojmiz haiz gwnz hawciengz gai. Ngamq hainduj, de cungj dwg daenj haizcauj yahdaiq gag san, hoeng, seizgan nanz le, goengda yiemz mazfanz lai, hixnaengz mbouj daenj lo. Mboujlwnh dwg roengz naz guh hong roxnaeuz hwnj bya raemj fwnz, de cungj dwg loh dwk song faj din hung, baez bungz daengz vunz cungj dwg riuhoho, hix mbouj guenj bouxwnq baenzlawz yawj de, yienghneix, lohdin baenz aen geiqhauh de. Goengda mbouj dwg canghyw, hoeng, de cix rox yw bingh, daegbied dwg ywsieng, bouxbingh ginggvaq fwngz de yw ca mbouj geijlai cungj ndaej ndei caez. Hoeng, byawz cungj mbouj rox gij bonjsaeh yw bingh de daj gyawz hag daeuj, de hix coengzlaiz mbouj gangj gvaq, saenzmaed dangqmaz, ndigah gyoengqvunz couh heuh de guh “Sienyw Lohdin”.

Goengda hawj vunz yw bingh cungj mbouj aeu ngaenz, hoeng, de miz aen gvigawj ndeu, bouxlawz siengj heuh de yw bingh, bouxlawz couh aeu bae bang de guh hong, guh geijlai ngoenz mbouj dingh, itcig daengz hawj de rimhoz cij ndaej. Ndigah bouxbingh itbuen mbouj seizbienh bae ra de yw bingh, aenvih byawz hix mbouj rox yaek guh daengz bi lawz ndwen lawz. Mwh gou lij iq, ciengzseiz ndaej yawjraen nanz mbouj nanz miz vunz daeuj ranz goengda bang de guh hong, mbouj bau gwn hix mbouj miz vunz ienqhoij, aenvih daihgya cungj dwg gagnyienh daeuj guh. Gou cungj dwg hozhaenz raixcaix, baenzlai vunz gagnyienh daeuj bang guh hong, geijlai vifung ha!

Miz bi ndeu seizdoeng, mehliuz ranznden baez ndaej hoengq couh daeuj caeuq daxmeh gangjgoj, baez- baez cungj doiq daxmeh geqhaemz, naeuz ga de caeuq hwet de mbouj ndei, gyanghwnz cungj dot dwk ninz mbouj onj, mbouj rox yawj le geijlai boux canghyw hix mbouj ndei. Gou dingq le nyaenx mbouj ndaej cam naeuz:“Mwngz ndaej cingj ‘Sienyw Lohdin’ yawj gvaq bingh lwi?” Meh- liuz naj mbwngseb danqheiq naeuz:“Caengz bae yawj gvaq ne, dingqnyi naeuz siengj heuh de yw bingh hoj dangqmaz, daihgya cungj naeuz aeu bae ranz de guh hong, caemhcaiq hix mbouj rox aeu guh geijlai nanz, danghnaeuz guh baenz ciuhvunz de lij caengz habhoz, neix mbouj dwg begbeg sai goengrengz ha!”

Gou dingq le hozndat raixcaix, ndawsim gag naemj goengda hozunq dangqmaz, baenzlawz ndaej yiengh- neix diunanz bouxbingh ne? Itdingh dwg bouxwnq luenh gangj! Ndigah gou gig haengjdingh dwk doiq mehliuz naeuz:“Daxsimj mwngz saenq gou, ‘Sienyw Lohdin’ vunz gig ndei, mbouj gvaq ngoenz ndeu de couh itdingh bang mwngz yw bingh!” Mehliuz dingq le buenq saenq buenq ngeiz, gij vah lwgnyez gangj de gizlawz haengj saenq? Itcig daengz daxmeh hix ngaekngaek gyaeuj, de cij roengz gietsim bae goengda gizhaenx yw bingh.

Ngoenz daihngeih daxmeh hwnq ndaej gig caeux, de daj ndaw moeg raeujrub mbon gou okdaeuj, youq gou yaek guhnyah seiz unqswnh dwk nai naeuz:“Mwngz haengj mbouj haengj bae yawj goengda ha? Ngoenzneix raeuz caeuq daxsimj doxcaez bae ranz goengda guh hong, hwnq ndaej daiq laeng lai couh mbouj ndaej bae lubw!” Gou dingq le sikhaek diuq hwnjdaeuj, hix mbouj ninz lo, mbouj dingz dwk doiq daxmeh naeuz：“Gou bae! Gou bae!”

Gwn gvaq ngaizcaeux gou couh diuqyiegyieg caeuq daxmeh nem mehliuz coh ranz goengda byaij bae lo. Ranz goengda liz mbanj dou miz aen lai cungdaeuz loh. Hoeng, lauheiq dwg aenvih sim’angq ba, seizhaenx gou roxnyinh mbouj daengz byongh aen cungdaeuz couh byaij daengz ranz goengda lo. Dou bae daengz ranz goengda seiz, cingqngamj bungqraen goengda loh dwk song faj din, gwed faggvak, daiq song boux vunz najmoq yaek bae ndaw naz guh hong.

Daxmeh gipmuengz doiq goengda gangjmingz gij yienzaen dou daeuj ra de, mehliuz siujsim yupyup dwk yawj goengda, ndawsim gaenjcieng dangq- maz. Hoeng, goengda cix unqswnh dwk doiq mehliuz ngaek le ngaek gyaeuj, angqvauvau yien dwk aen fwngz gou daiq daihgya bae naz.

Goengda gig maij eufwen, baez- naengz bae yawj de cungj ndaej dingq de eufwen. “Guh hong lau ok hanh, gaej ngvanh haeux rim cang; siengj gwn noh ciengx mou, siengj gwn haeux ndaem naz.” Youq ndaw naz, goengda fanfoek eu hot fwen neix, gou roxnyinh gig geizheih, hix riengz de ciengq hwnjdaeuj, doq ndaej goengda daih- sing riuhoho hwnjdaeuj, sikhaek daengx doenghnaz miz gangj miz riu, nauhyied dangqmaz.

Banhaemh gwn gvaq haeuxcaeuz, goengda couh hainduj cazyawj gij cingzgvang mehliuz. Cij raen de song fwngz cuengq haeuj laj eiq mehliuz, yungh rengz dawz ndangdaej mehliuz yo hwnj geij mbat, son mehliuz geij aen dungcoz, daengq de baezlaeng itdingh aeu ngoenzngoenz guh, sij mbaw danyw ndeu hawj de, lij daengq mehliuz baezlaeng mbouj ndaej gwn gijmaz doxgaiq couh sat lo. Gou caeuq song boux vunz najmoq haenx yawj dwk bak ajloengqloengq, goengda hix mbouj leixlangh dou, gag gvaq henzgyawj bae caeuq daxmeh gangjgoj lo.

Gwnz roen ma ranz, mehliuz haenh bae haenh dauq, cungj naeuz goengda vunz ndei bonjsaeh youh ak. Caen dahraix, mbouj gvaq bi ndeu, ndangdaej mehliuz cungj ndei liux lo, gou dingq le roxnyinh najrongh dangqmaz.

Baenz lai bi mbouj ndaej dox- raen, goengda dwg mbouj dwg miz saek gouh haiz hab ndaej song faj din hung de ne? “Guh hong lau ok hanh, gaej ngvanh haeux rim cang; siengj gwn noh ciengx mou, siengj gwn haeux ndaem naz.” Lauheiq lij dwg eu hot fwen neix, loh dwk song faj din de hwnj bya roengz naz ba!