Naj coh Gamjluzdiz, laeng ing Dahvadauz, baenz baiz baenz coij ranzyouq daegsaek Gveiqbaek ciengz hau vax heu caeuq raemx Dahvadauz doxdaengh doxingj, gyoengq vunzmbanj youq ndaw ranz bonjfaenh aeuq “byadaeuhfouh” homrang biu doh seiqhenz yinx baengzyoux hekyouz caenx bae, gyoengq vunzlaux cix cwxcaih youqndwi dwk con bae gak ranz gangjgoj……Gijneix dwg aen gingj vunzraeuz youq Mbanjlujgyah yawjraen ndeu.

Mbanjlujgyah dieg youq duenh gyang Dahvadauz Siufungh Gih Gveilinz Si, liz gyang singz Gveilinz ngamq 2 goengleix gyae, ing bya dep raemx, gingj gyaeu yinx vunz, aen gingj “ronghndwen seizcou Dahyangzgyangh” “bet gingj gaeuq” ciuhgonq Gveilinz neix couh youq gizneix, gij gingj cuengq doekgonq heiqlienzdaemh densi 《Sihyouz Gi》de couh youq gyaeujmbanj aeugingj, dwg aen mbanj okmingz daegsaek lijyouz Gveilinz comzrengz cauxguh ndeu. Daengx mbanj 64 ranz 390 lai vunz, gaxgonq dajveh lotlaeng、daengx cunh baijbouh luenhyab, raemxuq luenh baiz luenh bok、nyapnyaj luenh dong luenh ndek, mbouj miz maz souhaeuj, dwg aen mbanj “gungzhoj youh boemhbad” ndeu. Youq Minzgen Gveilinz Si Gihgen Cihbu haenqrengz doidoengh lajde, Gveilinz Si Siufungh Gih youq 2009 nienz dawz Mbanjlujgyah lied haeuj lajmbanj moq hwnjguh cungdenj hanghmoeg, bi daihngeih couh youq gih cwngfuj doengjit dajveh guh daengx mbanj yiengh mbanj gaijguh. Geij bi gvaqbae, daengx cunh 98 aen ranzyouq dingj lingq、vax heu、cueng guenghva、ciengz hau、luengq rinbenj comz doh le gij yiengh dajcaep ranzyouq Gveiqbaek conzdungj haenx baenz baiz baenz coij moqsag ndeiyawj, loekraemx、funghranz guh daeuhfouh、aenmuhrin gvangjcangz、daemzngaeux、laeuzgyong、roqluengq faex doenghgij gingjyawj caeuq fog faexheu loegvaq dem le giz ndeiyawj, gizgiz cungj yienh’ok gij cwkrom nanwt vwnzva daeuhfouh baenz bak bi aen mbanj neix.

Gyoengqvunz Mbanjlujgyah cungj geiq ndaej, cib lai bi gaxgonq ngoenz he, Minzgen Gveilinz Si Gihgen Cihbu cujyin Cwngz Yenzveij daiq aen siengjfap bang aen mbanj ndeu vut gungz baenz fouq haenx byaij haeuj le Mbanjlujgyah, ciemhciemh daiq aen mbanj neix byaij hwnj le diuz roen siujgangh. Youq ndaw cib bi de, Cwngz Yenzveij cawz ra baihgwnz aeu ngaenz doidoengh gak hangh hongsaeh ndaw mbanj le, lij gonqlaeng ok ngaenz bonjfaenh 20 fanh maenz bang ndaw mbanj guh le 7 aen dinggwnngaiz daegsaek doenghgij hongsaeh daiqdoengh vunzmbanj hwngfat haenx, swhgeij mbouj faen aeu saek faen ngaenzleih, ndaej vunzmbanj cwngguh “vunzmbanj rogbien”; de haeuj mbanj baez rox ndaw mbanj gaenq guh daeuhfouh baenz bak bi seiz, couh siengj banhfap soucomz ndaej bak lai cungj byaekyiengh daegsaek daeuhfouh, son gyoengq vunzmbanj guh dajcawj caeuq dinggwnngaiz dakdaih doenghgij bonjsaeh ra ngaenz neix, menhmenh dwk, vunzmbanj da raeh uk lingz lo, boux riengz boux “swiq din hwnj haenz”, bienqbaenz le dinggwnngaiz lauxbanj roxnaeuz “daujyouz”, youq bakranz bonjfaenh banh hwnj le nungzgyahloz caeuq lijyouz. Seizneix, daengx mbanj ranzranz guh hangzgwnngaiz, aeu byaek lajmbanj guhcawj, bya daeujfouh、gaeq daeuhfouh doenghgij byaek daeuhfouh neix mingzdaeuz riuz doh singz Gveilinz.

Doenggvaq vwnzva、lijyouz、gai ngaiz fuzbinz, seizneix Mbanjlujgyah gaenq baenz Guengjsae raeuz aen mbanj moq guhyiengh miz daegsaek lijyouz youqndwi ndeu, ndaw cunh moix bi doi ok ciet hawfwen minzcuz “sam nyied sam” Siufungh Gveilinz daengj vwnzva binjbaiz, cungfaen baijyienj le gij rengzhoengh daegbied daeuhfouh Lujgyah doenghgij gwnndoet vwnzva neix, ndaej baenz yiengh ndei swnghdai sevei cujyi lajmbanj moq, bingz haeuj Guengjsae raeuz buek daih’it 16 aen daegsaek mbanj okmingz ndawde aen ndeu, haujlai hekyouz cungj doxcaeh dwk bae ndaw mbanj youzcet cimzfeih.