1 nyied 28 hauh banringzgvaq, Yinznanz Swngj Giuhbwz Yen Bingzcai Yangh Lanzmaj Cunh gawjhengz le daih’it gaiq lajmbanj Vahcuengh ndwencieng lienzvuen hozdung. Vanjvei senhconz fukvang yungh cih saw hung Cuengh Gun doiqciuq sij okdaeuj:“Angq Hoh Gozvuyen Baecinj 《Sawcuengh Fangh’an》 Doihengz 60 Hopbi Nem Lanzmaj Cunh Haibanh Sawcuengh Lwgnyez Yozcenzbanh 30 Hopbi”. Vanjvei yinx daeuj ca mbouj lai 3000 lai vunz humx yawj.

Gawq boux banh aen hozdung neix gangj, mbat hozdung neix dwg gag youz Lanzmaj Cunh vunzlai gag bien gag yienj, gij cienz hozdung 2.3 fanh maenz haenx hix dwg ndaw Lanzmaj Cunh vunzlai gag comz. Vanjvei doenggvaq yungh Vahcuengh ciengq go caeuq yungh Vahcuengh eu fwen, yienj foux minzcuz daengj hingzsik, ndaej yienh’ok gij yienzbonj yienzyiengh yenzswnghdai vwnzyi gyaeundei de.

Giuhbwz Yen youq Yinznanz Swngj mbiengj doengnamz, baihbaek caeuq Guengjsae Sihlinz Yen doxciep.

(Luz Swnghyungz/陆生雄)