Ciet Cungguek raeuz lai baenz- maz, gou ceiq maij bet nyied cibngux! Aenvih ngoenz ciet neix dwg ngoenz ciet caezcomz, dwg haemh yawj ronghndwen ceiq gyaeundei ndeu, dwg ngoenz gou nanzlumz ndeu.

Binaengz daengz ngoenz neix, Bouxcuengh raeuz gwn caeuz liux couh bae eufwen、diuqfoux、yawj ronghndwen, bineix hix doxdoengz.

Gwn caeuz liux ndaej yaep ndeu, dou couh bae gwn nyiedbingj yawj ronghndwen. Ronghndwen lumj dah iq najmong myatmyat, yaepbiengbieng daj byaibya hwnjdaeuj, gyoengqvunz couh humx hwnjdaeuj fwngz caeuq fwngz diuqfoux Dohyeh. Ronghndwen lumj aen buenz luenz lwenq nei venj youq gyangmbwn, lwenqda dangqmaz. Vunzmbanj couh ndwn youq song mbiengj eufwen.

Moix hot fwen neiyungz baenzlai. Haenh aen cwngcwz ik beksingq dangj ndei hix miz, gangj gij gunghcoz cingcinj fuzbinz hix miz, naeuz seizneix lwgminz gwndaenj vuenyungz hix miz, lwnh lwgbawx lajmbanj hauqswnh goengbuz hix miz, dwen lajmbanj seuqsat gyaeundei hix miz…… Baenz cien baenz fanh, eu mbouj liux, eu mbouj caenh.

Gyoengqvunz eufwen diuqfoux baeg le couh naengh roengzdaeuj yietnaiq, doq gwn nyiedbingj doq yawj ronghndwen. Bang lwgnyez seizgonq youq henz guhcaemz, seizneix gyoengq bouxlaux couh heuh gyoengqde gvaqdaeuj, son gyoengqde eufwen, doeklaeng bouxlaux caeuq lwgnyez caiq guhdoih eu aen fwen ndeu. Daengx mbanj nauhyied dangqmaz.

Yawjraen aen ciengzmienh neix, gou ngeix daengz gou lij iq seiz, guek raeuz mboujcaengz gaijgwz hailangh, seizhaenx haeux gwn mbouj imq, haemh bet nyied cibngux, daengx ranz vunz gwn caeuz liux couh aeuq duhndaem, guh ceizduh aen hung lumj bingzgoj nei, ndawde maz cungj mbouj miz. Daengz haemh bouxboux cungj youq naj ranz gaet ceizduh yawj ronghndwen, ceizduh gyoetget yakgwn, singriu hix mbouj miz, gvaq ndaej gig yakyouq.

Seizneix saedceij ndei lo, daengz ngoenz ciet neix, gyoengqvunz cungj gvaq ndaej nauhfaenfaen, gou siengj ciengxlwenx ndaejgeiq ngoenzneix, ndaejgeiq gij ndwenngoenz seizneix miz gig ndei, mbouj aeu lumz!