“Mbouj byaij henz Dahgsau, mbouj gwn noh yiengzndaem, couh lumj caengz daengz singz Majsanh.” Coenz vah neix dwg vunz Majsanh ciengz aeu daeuj gaisau gij ndeiyoux ndeigwn hawj bouxhek diegrog.

Majsanh dwg ranzmbanj yiengz- ndaem, gij mingzdaeuz yiengzndaem cienz daengz gyae’gyae gyawjgyawj. Dahsau con gvaq ndaw singz, song henz dah gofaex heusau, gyanghaemh lohdaeng hoengzhoengz loegloeg, daj gwnz dingj laeuz yawj roengzbae, diuz dah neix ngutngut ngeungeu, gyaeundei raixcaix. Mboujdan dwg yienghceij de ndeiyawj yinx vunz, caemhcaiq gij gyaeundei de dwg liggaiq cwngfuj caeuq sam fanh lai lwgminz caez roengzrengz cauhguh, neix hawj vunz gig gamjdoengh.

Dahsau cib geij bi gonq yakyawj dangqmaz, raemxdah noix, gwnz dah nyapnyaj fouzbiengbieng, rin laj dah youh lai youh cab, hix mbouj miz maz bya youq, henz dah go’nya mwncum, nyapnyaj baenz dong, haexma haeu- saeng, gig noix miz vunz daeuj youzbyaij.

Dahsau yakyawj neix seizlawz cij bienqbaenz duz funghgim ha? Neix dwg gij indot ndawsim lwgminz ndaw singz. Gaijgwz hailangh cib geij bi, riengz dwk daihgya saedceij yied daeuj yied ndei, vunzlai yaek aeu vanzging ndei, youq ndaej cwxcaih, ranzmbanj gyaeundei.

Vihliux gaijbienq gij yienghceij Dahsau, daengx yienh ganbu ciz- gungh、lauxsae hagseng doengzcaez okrengz, roengz ndaw dah bae gip rin, canj deuz namhmet ndaw dah caeuq go’nya henz dah, cingleix nyapnyaj. Laebdaeb guh 18 ngoenz hong, dauqdaej duet deuz geu buh gaeuq Dahsau, geu buh gaeuq neix de daenj ndaej buenq seiqvunz lo, caen dwg youh uq youh haeu. Ciepdwk, guh bingz henz dah, vat gumz ndaem faex, laebbaenz suenva ndaem gova go- nywj, hawj Dahsau daenj hwnj geu buh heuswd moqsak lo.

Gaxgonq Dahsau cawz giz gyawj singz cungsim ci ndaej hai bae、 vunz ndaej byaij gvaq, henz dah gizwnq go- nya beij vunz lij sang, rin gveng baenz dong, roen mbouj doeng, bienq- baenz giz gungx deng vunz vut nyapnyaj.

Vih caezcienz gij gyaudoeng song henz Dahsau, vunzlai youq song henz dah coihlaeb haenzhoh, laeb- baenz roen ci hai caeuq roen vunz byaij, lij youq baihgwnz dah laeb hwnj aen giuz hung ndeu, youq giz cungqgyang laebguh aen giuzfwnrumz, lij dauqcungz coih geij aen giuz gaeuq, gij giuz neix ndaej gya’gvangq caeuq gaijndei liux engqgya ndei yungh, caiq hix mbouj yungh yousim saek ci gvaq mbouj ndaej lo, hawj lwgminz baedauq song henz dah gig fuengbienh.

Doeklaeng dwg caep fai gyaeng raemx, hawj raemxdah lai sang mij ndeu yienghneix. Lij youq song henz dah bu cienraiz, laeb lanzganh fuengzhoh, an lohdaeng, fuengbienh vunzlai haethaemh youzbyaij.

Dahsau cienzmienh cingjleix le, raemx bienq sawndikndik, bya youq ndaw dah youz bae youz dauq, gofaex heuswdswd. Song henz dah, gyang- ngoenz ci baebae dauqdauq, gyang- haemh vunz baenz gyoengq baenz bang youzbyaij, ngonzyawj funghgingj, gangjgangj riuriu, sim angq ndang cangq, gvaq ndaej gig cwxcaih.

Geij bi daeuj, youq henz Dahsau gawjbanh hozdung guhcaemz guh- angq lai cungj lai yiengh, miz gij hozdung ciengq go diuqfoux, miz gij hozdung dwkgienz cangq ndang, hix miz gij hozdung doxdax roq gyong daengjdaengj. Gij hozdung sanghyez senhconz hix youq henz haw nauhyied gyawj henz dah guh hwnj. Henz Dahsau laebbaenz dijyuz gvangjcangz caeuq dijyuzgvanj, gaenh bi daeuj gak cungj daihhingz vwnzyi biujyienj hozdung hix youq gizneix gawjbanh.

Dahsau hix dwg boux cienzboq vwnzmingz ndeu. Cwngfuj youq song henz dah guh banjbau senhconz, lumj gimqdoeg senhconz、gijgwn ancienz senhconz、angqhoh ngoenzciet hoz- dung senhconz、cauhlaeb aen singz ndoengfaex saekloeg senhconz daengj cungj nanz mbouj nanz couh youq gwnz banjbau okyienh. Song henz Dahsau laebguh haujlai daengsieng daeuj senhconz vwnzva, gwnz daeng- sieng ciengz yawjraen lumjbaenz “Cauhlaeb aen singz vwnzmingz”、“Henhoh vanzging, bouxboux ok- rengz” gij coenz neix. Lij laeb aen denswj yienjjsiq bingzmuq daeuj yawhbauq dienheiq ngoenzlaeng caeuq cienzboq vwnzva saenqsik, lij miz aen daihhingz denswj senhconz lanz dem.

Daengz gyanghaemh, mbwn ngamq laep, daeng baez rongh, youq henz Dahsau youzbyaij, aen doek aen daengsieng hoengzgywg ronghsag, yienjok gak cungj gij dozanq senhconz, hawj vunz gamjdaengz gij heiqsik vwnzva gig noengznwd. Song henz Dahsau cang gvangjbo hauhdoengz, bingzciengz haethaemh boq sinhvwnz cezmuz caeuq go soengswt vuenheij, youq ngoenzciet couh lwnh hawj gyoengqvunz gij cingzgvang hozdung angqhoh. Neix hawj vunz roxnyinh simsoeng vaiqvued, engq hawj vunz youq sim maez seiz menhmenh byaij haeuj gij swnghhoz gizneix.

Dahsau mboujdan dwg aen gingjsaek gyaeundei singz Majsanh, lij dwg bouxvunz cienzboq cingsaenz vwnzmingz. Vunz gizneix dawz Dahsau baenz naedcaw gwnz fwngz caeuq dahlwg daeuj ganqhoh. Doeklaeng cwngfuj lij yaek youq gwnz Dahsau caiq laebguh geij aen giuz、aen suen baijok ndaek rin geizheih、aen laeuz baijok gij doxgaiq Majsanh caeuq gaisau gij gingjsaek bonjdieg、aen daizheiq ndeu, caiq cang gij ranz song henz dah, bienqbaenz diuz gai miz minzcuz daegsaek ndeu, hawj gij vwnzva Majsanh caeuq gizwnq youq henz Dahsau doxhuz, itheij majrag、hwngfat.

（Vangz Gyanghmyauz）