Ranzlaeuz ndeiyawj aen dem aen sieng daengj youq ndaw raemhfaex, roen suijniz diuz dem diuz bingzbwd seuqcingh ngutngeuj ietnangq ndaw faexheu, doenghreih vamaedlaeh lienz benq ndaemganq henz mbanj heuswdswd, heiq singjsien homfwtfwt ci gvaqdaeuj, hawj vunz simsangj dangqmaz…… Doengh bi neix daeuj, Sizcingj Cunh aeu cauxlaeb mbanj mizmingz Guengjsae guh moegbiu, cienzmienh doicaenh hong hwnjguh aenmbanj gyaeundei, guh “aenmbanj seuq- cingh” hozdung, yienh’ok yiengh ndei yinxvunz aenmbanj mizmingz Guengjsae.

Sizcingj Cunh dieg youq baihnamz Yauyij Cin Hwngzyen, liz yienhsingz miz 10 goengleix gyae, Namzningz daengz Vuzcouh gauhsuz goengloh nembe Hwngzyen lienzsienq ngeih gaep goengloh convang gvaq ndaw gyaiq, gyaudoeng fuengbienh. Aen cunh neix miz reihnaz 4500 moux, ndaemganq vamaedlaeh baenz 3300 moux, daengx cunh miz 1560 ranz ranzranz ndaemganq vamaed- laeh. Bi 2014 daengx cunh moix vunz bingzyaenz cinghsouhaeuj 10533 maenz, ndawde gai vamaedlaeh couh miz 6027 maenz. Vamaedlaeh cingq- caen baenz le “va baenz fouq”、“va vuenyungz” vunzmbanj Sizcingj Cunh.

Doengh bi neix daeuj, Sizcingj Cunh aeu vamaedlaeh biucinjvaq ndaemganq、gyagoeng、gaicawx caeuq nungzyez swnghdai yawjgingj lij- youz、vwnzva bozlanj youz、youqndwi guh’angq youz guh cungdenj, hop- heux ranghdieg guhyiengh canjnieb cunghab vamaedlaeh —— Aensuen Vamaedlaeh Cunghvaz, comzrengz cauxguh aen dieggoek canjnieb vamaedlaeh comz miz dajndaem、gyagoeng、gohyenz、vwnzva、yawj- gingj、lijyouz ndeu. Ranghdieg guhyiengh gvaengh gyangsim mienh- cik dwg 3000 moux, gvaengh nangq daengz de baenz fanh moux, Sizcingj Cunh ndaemganq vamaed- laeh mienhcik couh ciemq gvaengh gyangsim mienhcik 68.4%.

Sizcingj Cunh gonqlaeng roengzngaenz 500 lai fanh maenz, guh gij ranz ndaw mbanj rog ciengz bae moq、bu roen suijniz、hawciengz byaek haeux gaicawx caeuq hawciengz vamaedlaeh gai- cawx、doengh aen raemxuq cawqceq; lij guh miz youwzyenz 2 aen、laeuzcunghab vwnzva、lanzgiuzcangz、vunzmbanj hozdung cungsim doenghgij dieg neix. Ndaw mbanj roen、hawjraemx、baizraemx、soengq- dienh、loegvaq doenghgij cijbyauh neix cungj dabdaengz daengx guek lingxdaeuz suijbingz, vwnzva gyauyuz、yihliuz veiswngh、dijyuz lienhndang doenghgij sezsih bienh minz leih minz neix ndaej gaijndei haujlai, hongsaeh vamaedlaeh caeuq lijyouz doenghgij canjnieb daegsaek neix hwngfat hoenghhwd, vunzmbanj souhaeuj demhwnj ndaej vaiq, bi 2013 ndwen 5 ndaej Swcigih Yinzminz Cwngfuj soengq hawj cwnghauh najrongh “aenmbanj mizmingz yiengh swnghdai (nungzyez) daegsaek Guengjsae”, baenz le buek cin cunh 13 aen “cin mizmingz mbanj mizmingz daegsaek Guengj- sae” ndawde aen ndeu.

Hongsaeh homrang mboujdan hawj saedceij vunzmbanj vandiemz, lij yinx funghvuengz gim haeuj mbanj dem. Yanghgangj、Daizvanh miz sam aen giyez guh laeglwd gyagoeng vamaedlaeh haenx gonqlaeng roengz- dingh Sizcingj Cunh, haigoeng le ciusou baenz cien vunz guhhong. Vunzmbanj lij youq seizcou seiz- doeng ungganq raetmoguh daengj doenghgo dem, seizcin le aeu “namhbwnh raetmoguh” dwk reihnaz ndaemganq vamaedlaeh, hawj raet- moguh、vamaedlaeh cungj ndaej demsou demyauq, saedceij bi beij bi vuenyungz.