1 nyied 15 hauh, aen vanjvei lienzvuen ndwencieng Vahcuengh gaiq daih’it （Guengjsae）Cungguek youq Nanzningz Si Sanglinz Yen gawjbanh, Swcigih Minzyijveij fucujyin Yi Siz、Sanglinz Yen yencangj Lanz Cunghgwngj daengj lingjdauj caeuq dangdieg ganbu ginzcung gaenh fanh bouxvunz youq yienhciengz yawjngonz le vanjvei.

Vanjvei aeu “ranzcoj Bouxcuengh cuengqlangh siengjmuengh”guh cawjdaez, doenggvaq “cingz Mbanjcuengh”、“loq minzcuz”、“hoenz Betgveiq”sam duenh baijlangh bya heu raemx saw、gingj gyaeu vunz ndei Diegcuengh raeuz. Mehmbwk Bouxcuengh Veiz Cingzcingz ciengq 《Gogingqlaeuj》, lwnhgangj vunz Bouxcuengh haisim eufwen angqcoux bouxhek aen gingjsaek neix; Veiz Suzyingh、Cinz Haijdauh daengj geij boux fwenvuengz Bouxcuengh hwnj daiz eu fwen, goenghoh daihgya bi moq angq ndangdaej cangq; bouxmaenh ndawbiengz Majsanh、Sanglinz Yen doenggvaq 《Dimhcuk》、《Dwklongj Bouxcuengh》、《Fwenrauqnaz》、《Yaem Gyaep Cingz Mbanj》, dawz gij saeh vunz Bouxcuengh raeuz gaenx guh hongnaz, maij eufwen diuqfoux haenx lwnh hawj vunzlai; 《Son Mwngz Gangj Vahcuengh》、《Mancuengh Mbinfwfw》、《Fwen Couxhek》、《Goreux Haiva》 daengj mboujdan daiq bouxhek haeuj Mbanjcuengh youzlangh, hix sawj gyoengqde yiengjsouh daengz vwnzva Bouxcuengh naekna dangqmaz dem. 《Caemhsim Caez Guh Siengjmuengh Cungguek》 yungh Fwencuengh cienzciengq siengjmuengh Cungguek, lwnhgangj gij maqmuengh guekgya fouqgiengz、minzcuz hwng- vuengh、yinzminz vuenyungz. Gaenriengz diuzgo 《Ranzcoj Bouxcuengh》 youz bouxmaenh eufwen Guengjsae Vangz Cunhyen ciengq haenx，daengx aen vanjvei swnhleih hai sat.

Ciengz vanjvei neix lij youq samcib lai aen vangjcan、veihsin bingzdaiz guh cigboq. Bouxyawj mbouj ndaej daengz yienhciengz haenx caenh’aeu hai soujgih、dennauj couh ndaej yawj aen vanjvei Vahcuengh neix. Haemh haenx, miz baenz gvaq cien fanh vunz yawjngonz le vangjloz cigboq.

Cunghyangh Minzcuz Dayoz saujsu minzcuz vwnzyoz yenzgiu daihsae、boux yozcej mizmingz Guengjsae Liengz Dingzvang gyausou sij Sawcuengh hawj aen vanjvei Vahcuengh neix：“Angqhoh Bouxcuengh raeuz caeuq beixnuengx gak minzcuz，bouxboux ndang ak，ranzranz vuenyungz，mbanjmbanj fatcaiz，gizgiz bingzan，caez byaij ngoenz ndei goksasa!”Cunghyangh Minzcuz Dayoz nyuenz fuyaucangj、Baekging Guengjsae Vwnzva Yisuz Cuzcinvei veicangj Vangz Fungyenj youq yienhciengz yawj vanjvei le haenh aen vanjvei Vahcuengh neix guh ndaej baenz yienj ndaej ndei，nyinhnaeuz gijneix dwg aen gidij dijyen Guengjsae gvancez lozsiz Siz Ginbingz cungjsuhgi “seiq aen gagsaenq” ndawde aen“vwnzva gagsaenq”haenx. Guengjsae Samnyiedsam Cazcise cungjbenhciz Cinz Siengzcouh naeuz, aen vanjvei Vahcuengh neix neiyungz lai, suijbingz sang, hawj vunz daengx biengz yawjraen gij vwnzva Bouxcuengh lai cungj lai yiengh raeuz. Maqmuengh baezlaeng lij ndaej yawj cezmuz Vahcuengh engq lai, muenxcuk yinzminz Bouxcuengh vwnzva iugouz, vih coicaenh minzcuz doxgiet、sevei onjdingh caeuq bien’gyaiq ancienz guh’ok gungyen.