Boux ganbu mehmwk ban 80 Baekging, ndaej baij daengz Guengjsae mbanjgungzhoj dang suhgi daih’it song bi. De gvenq ndaej dienheiq namhraemx baihnamz lwi? De boux ganbu bouxcoz ndeu ndaej hawj ndaw mbanj daiq daeuj bienqvaq lwi? Seizgan gvaqbae bi lai le, de ginggvaq muzlienh baenzneix: Daj gihgvanh ganbu bienqbaenz boux ganbu ndaw mbanj byaij haeuj ndaw naz gyaeuj reih bae, daj boux gangj vah sing Baekging bienqbaenz boux “saumbanj” yungh Vahcuengh caeuq vunzmbanj doxdongx he, daj “ganbu dohgim” bienqbaenz boux gvansim vunzmbanj. Engq youqgaenj dwg, de hawj yiengh ndaw mbanj、 giekdaej sezsih hwnjguh ndaw mbanj fatseng bienqvaq hungloet, lij vih gyoengq vunzmbanj banh le haujlai saedsaeh saehndei dem……de heuhguh Sij Yui.

Gumj Ndang Yungzhaeuj Ndaw Vunzlai Bae

Youq baihnaj gicej, gij ndang- daenj Sij Yui yawj dwk sawseuq mbouj saiyaix, naengnoh deng nditndat cik ndaej ndaemndwt, de cingq caeuq vunzmbanj gangjgoj. Boux ganbu bi lai doekgonq youq guekgya gihgvanh hwnjban neix, seizneix yawj hwnjdaeuj caeuq mehmbwk Mbanjcuengh ityiengh. Bi 2015 ndwen 8, Guekgya Minzveij senjbaij Sij Yui daengz Guengjsae Dwzbauj Yen Duh’anh Yangh Mbanjlingzleiz dang youq mbanj suhgi daih’it. Neix doiq de daj iq daengz hung youq hawsingz majhung, daihhag bizyez couh gauj haeuj Guekgya Minzveij guhhong daeuj gangj, saedceij vanzging、 youq mbanj guh- hong daengj doiq de couhdwg cungj gaujniemh he. Dienheiq baihnamz nditndat heiqraemx lai nanz gvenq ndaej, gyanghaemh non nyungz haeb nanz ninz ndaek. Saedceij gvaq ndaej hoj mbouj naeuz, gak cungj hojnanz hong gihcwngz engq hawj de siengj mbouj daengz. Dieggyae byasang roenloh lingq, henz dieg dujfwj miz vunz youq. Neix dwg sij gij mbanjbya baihnamz gyaeundei haenx. Hoeng, baez daih’it roengz mbanj daengz song aen mbanj caengz doeng goengloh, dauqma ga byaij 10 goengleix roenbya, bin bya gvaq lingq, sinhoj hwnjroengz, gyanghaemh song ga Sij Yui in dwk ninz mbouj ndaej. Sij Yui lwnh gicej, “roengz mbanj sinhoj couh suenq lo, engq hawj vunz doeknaiq dwg hong guh mbouj ndaej. Vunzmbanj dangdieg haujlai cungj dwg gangj Vahcuengh, haujlai vunz dingq mbouj rox Vahbujdungh. Gou gangj maz vunzmbanj dingq mbouj rox, vunzmbanj gangj maz gou caemh dingq mbouj rox, roxnyinh swhgeij couh lumj ‘bouxnuk、 bouxngoemx’ nei.” Lij miz mbangj boux vunzmbanj doiq gij hong caeuq cozyung youq mbanj suhgi daih’it mbouj roxyiuj, laihnaeuz ganbu Baekging daeuj gvaq ciengz “dohgim” ndwi. Fanh saeh haidaeuz hoj. Mienhdoiq nanzdaez, de sien laebdingh dieg dwkbyoengq: Gumj ndang, aeu swhgeij yungzhaeuj ndaw vunzlai bae. Sij Yui leihyungh ndwen lai seizgan, byaij liux daengx cunh 12 aen mbanj、 22 aen vunzmbanj siujcuj. Bae ranz dangjyenz geq、 ranzvujbauj、 ranzdihbauj nem ranzgungzhoj, dieg ciengx mou、 ciengx gaeq ndaw mbanj, reih ndaem samcaet、 makhojlungzgoj vunzmbanj, gij cingzgvang gak mbanj doeng dienh、 doeng raemx、 doeng roen……de cungj bae yawj gvaq. Vih liux engq ndei yungzhaeuj ndaw vunzlai bae, de cawjdoengh hagsib Vahcuengh. “Gwn caengz?” Sij Yui caeuq vunzmbanj baenzneix dox- dongx. Raen boux ganbu mehmbwk Baekging cawjdoengh gangj “vahdoj”, vunzmbanj cugyamq nyienh caeuq de guh baengzyoux. Seizneix de gaenq dingq rox mbangj Vahcuengh, lij yungh Vahcuengh caeuq vunzmbanj doxdongx ndaej.

Saeh Hung Saeh Iq Vunz- mbanj Geiq Haeuj Sim

Guhhong cugyamq ndaej baenz, Sij Yui fatok gij cozyung suhgi daih’it sonyinx、 guhyiengh、 ciepgyaeuj、 diuzgiuz haenx, fwngz ndeu gaem dangjgen, giengzvaq gihcwngz cujciz hwnjguh; fwngz ndeu coi vut gungz, doicaenh aenmbanj giekdaej sezsih hwnjguh; geiqmaenh cienq cozfungh, roengz sim vih beksingq guh saedsaeh. Veiswngh、 roenloh hwnjguh、 loegvaq ndaw mbanj, moix gienh saeh ndaej hawj vunzmbanj saedceij gvaq ndaej engq ndei haenx de cungj causim, gij hojnanz moix boux vunzmbanj de cungj geiq haeuj sim. “Bi 2016 ndwen 4, Sij Yui bang gou yiengq lajmbanj sinyungse bauq daigvanj 6 fanh maenz, hawj gou bau daemz ciengx bya ciengx bit, gung lwg hwnj daihhag.” Mbanjfazgvangh ranzgungz- hoj Nungz Singhgoh youq Sij Yui bangcoh lajde swnhleih vut gungz. Mbanjlingzleiz ranzdihbauj Hoz Ginhyungz、 Mbanjlungjman ranz- gungzhoj Cinz Mingzswng daengj bauq gaijguh ranzvaih hanghmoeg, Sij Yui bang gyoengqde lingx ndaej ngaenz gaijguh ranzvaih. Bi 2015 ndwen 9 daengz bi 2016 co, ndaej daengz Dwzbauj Yen Fuzbinzban、 Caiz- cwnggiz、 Minzcuzgiz caeuq Duh’anh Yangh Cwngfuj daengj danhvei haenqrengz bangcoh, Sij Yui daiqlingx daengx cunh doenggvaq gagcouz、 “it saeh it yaeng”、 canjnieb hanghmoeg daengj lai cungj banhfap cingjhab ngaenzcienz, guhsat roenloh hwnjguh 1 goengleix, bu roen suijniz ndaw mbanj 3000 mij, guh mieng baiz raemxuq 650 mij daengj sezsih hwnjguh, caemhcaiq guhsat ndaem gonengznuengx 150 moux, loegvaq ndaw mbanj ndaem dinfaex 300 go, gaijguh ranzvaih 12 aen daengj. Mbanjlingzleiz giekdaej sezsih gig doeklaeng aeu yungh bued roengz engq lai ngaenzcienz, Sij Yui caeuq Cangh Gyahnanz lingh boux ganbu Guekgya Minzveij gvaciz haenx gaenxmaenx yiengq Guekgya Minzveij bauq hwnj bangfuz aeu yungh, ceng- aeu ndaej 100 fanh maenz ngaenz bangfuz, cienhangh yungh guh bangrex Mbanjlingzleiz giekdaej sezsih hwnjguh caeuq canjnieb hwngfat. Bi 2016 ndwen 9, ngaenz- cienz gaenq fat daengzvih. Gicej lij dingqnyi gij gojgaeq Sij Yui guhhong romh ok haemh dauq. Bi 2015 ndwen 10 hainduj, hong suhgi daih’it cujyau dwg cingcinj bangfuz、 haeuj ranz diucaz. Couh Sidungj duicangj doihguhhong yangh youq mbanj naeuz, “aenvih ngoenznaengz guhhong gig lai, Sij Yui ciengzseiz gyaban daengz gyanghwnz cij byaij bae diegyouq, dou cungj yousim gij ancienz de.” Vah ngamq gangj sat, Sij Yui couh riuhehe naeuz: “Gyanghwnz byaij cij yawjraen gyoengq ndaundeiq gwnz mbwn, lij miz ronghrib mbinnyag, caen dwg yied hwnz yied gyaeundei.” Gangj ndaej soengswtswt.

Gyoengq Lwgnyez Heuh De “Sij Daxmeh”

Gicej youq Mbanjlingzleiz caij- fangj seiz, raen gij cingzgingj baenzneix simcieg gvaq: Siujhij boux lwgnyez cuhcunghswngh caengz ndaej 18 bi dingz bae hagdangz, de raen Sij Yui seiz raemxda couh doek. Yienzlaiz, bi 2016 ndwen 7 boh de aenvih baenzbingh gvaqseiq, daxmeh diuq bae gyawz mbouj rox, saedceij de mbouj miz baenghgauq. Caijfangj gvaqlaeng mbouj geij nanz dingqnyi siusik ndei, Sij Yui gaenq bang Siujhij lienzhaeh le giyau, caemhcaiq gujli de laebdaeb hwnjhag hag rox dinfwngz, lij lienzhaeh bouxsimndei giensoengq 1200 maenz ngaenz hawj de, lienzhaeh Yangh Minzcwngban aeu denz、 buhvaq、 riep daengj doxgaiq ngoenzyungh hawj de. Seizneix lwgnyez lajmbanj, haujlai dwg lwgnyez louz mbanj. Sij Yui dang suhgi daih’it, engq aenvih hix dwg boux daxmeh he, vihneix gig gvansim gij cingzgvang gyauyuz Mbanjlingzleiz. Daengz nyaemh doeklaeng, de gaenx- maenx lienzhaeh gyauyuz bumwnz, gaijndei gij diuzgienh sonhag caeuq hagsib vanzging ndaw mbanj, daz hau le gyausiz, vuenh le congzeij moq, coih ndei roensuijniz diemjsonhag ndaw mbanj. De lij gag ok cienz cawx mbangj sawrogdangz soengq hawj gyoengq lwgnyez, gvaq ciet bae yawjngonz lwgnyez louz mbanj diemjsonhag. Sij Yui caenciet simndei ndaej daengz gyoengq lwgnyez haengjgyaez, gyoengq lwgnyez cungj heuh de “Sij daxmeh”. Youq Sij Yui bangcoh boiqhab ceng’aeu lajde, Mbanjlingzleiz 5 boux lwgnyez louz mbanj camgya le yalingyingz hozdung Cungguek Gvansim Daihlaeng Guh- hong Veijyenzvei、 Guekgya Minzveij daengj danhvei lienzhab youq Baek- ging banh haenx, hawj gyoengq lwgnyez miz gihvei bae Baekging soujduh guekcoj. Sij Yui ndaej daengz gyoengq lwgnyez siujyoz ndaw mbanj heuhguh “Sij daxmeh”, lwg de couh doiq de “miz yigen” lo. Miz baez he de dwk dienhvah, lwg de gaenq 8 bi haenx naeuz:“Daxmeh, seizneix gou gaenq geiq mbouj ndaej mwngz lo, mwngz miz 4 ndwen mbouj dauq ranz lo, gou gaenq mbouj gvenq mbouj raen daxmeh lo.” Dingq daengz coenz neix, Sij Yui couh raemxda doek.

Youq Mbanj Guhhong Ndaej Haenhndei

Sij Yui dang suhgi daih’it bi lai, gij hong caeuq ginglig majhung de ndaej haujlai vunz haenhndei caeuq haengjdingh. Raen daengz gicej, cunhcihsuh Nungz Dingyi mbouj gangj saek coenz, daiq gicej daengz ndaw mbanj yawjyawj, cijraen roenloh ndaw mbanj bu suijniz lo, gyaeuj mbanj ndaem faex ndaem va lo. Seizneix, de cij haibak naeuz:“Yawj ha, neix couhdwg Sij suhgi daiqlingx caezgya guh, seizneix daengx mbanj caezcingj bienq yiengh lo!” Dwzbauj Yen Minzcuzgiz gizcangj Banh Cinghgo naeuz, Guekgya Minzveij daj bi 1989 dinghdiemj bangfuz Dwzbauj Yen daeuj, gaenq baenz le gij doenghlig hung’ak Dwzbauj Yen hwngfat, vunzlai ndaej ik gig hung. Guekgya Minzveij 27 bi daeuj gonqlaeng bued roengz ngaenzcienz hwngfat siujsoq minzcuz daengz 4000 lai fanh maenz bangfuz Dwzbauj Yen. Youh bangcoh hwnjguh le mbanjguhyiengh siuj- gangh minzcuz Yauzcangh Duh’anh Yangh、 Mbanjdasoz Sihduz Cunh Cwngzgvanh Cin aenmbanj miz daeg- saek Bouxcuengh caeuq Mbanj- nazdunz Yinzdih Cunh lajmbanj moq Bouxcuengh daengj 3 aen diemj- guhyiengh hong minzcuz. Doengzseiz, 27 bi daeuj, Guekgya Minzveij gonqlaeng baij 12 boux ganbu maenhndei daengz Dwzbauj Yen haiguh hong bangfuz, yungh raemxhanh sinhoj gyoengqde, vuenh daeuj Mbanjcuengh biengqvaq hung- loet. Gij saeh gyoengqde yienznaeuz bingzbingz ciengzciengz, cix saedsaed caihcaih.