1 nyied 20 hauh gyanghaet, Gvangjsih Sam Nyied Sam Cazcise cungjbenhciz Cinz Siengzcouh dazyinx gyoengq doengzsaeh aen se neix bae daengz Gvangjsih Minzcuz Dayoz, soengq 《Sam Nyied Sam》cazci hawj gyoengq hagseng Gicuz Gyauyuz Yozyen aen ciennieb Cunghgoz Saujsu Minzcuz Yijyenz Vwnzyoz. Aen yozyen neix yencangj Cinz Cihoz daibyauj yozyen ciepaeu cazci，caemh gyo’mbaiq Sam Nyied Sam Cazcise.

Soengq saw seiz, Cinz Cihoz naeuz, 《Sam Nyied Sam》cazci(banj Sawcuengh) dwg guek raeuz bonj cazci dog yungh Sawcuengh oksaw ndeu, dwg bonj saw cienz Vahcuengh caeuq vwnzva Bouxcuengh gig youqgaenj ndeu, maqmuengh gyoengq hagseng saeqsim bae doeg, roengzrengz guh baenz boux vih Vahcuengh caeuq vwnzva Bouxcuengh cienzriuz gig miz yungh ndeu；Cinz Siengzcouh cungjbenhciz hawj gyoengq hagseng gaisau aen lizsij Sam Nyied Sam Cazcise, gujli gyoengqde sij Sawcuengh, yungh Vahcuengh vih cienzriuz vwnzva Bouxcuengh gok goengrengz.

Mbat hozdung soengq saw neix, Sam Nyied Sam Cazcise gungh soengq bae 《Sam Nyied Sam》Cazci (banj Sawcuengh caeuq banj Sawgun) 300 lai bonj.

(Veiz Yinyiz/韦运益 Cwngh Gingcunh/曾庆春)