Dingjlingz roxnaj mwngz, siengj lumz mwngz hoj yaek dai. Youh dwg haemh laepngaungau ndeu, gou gag naengh youq naj doucueng, dingh- dingh dwk siengj mwngz, yaek rox mwngz cingq guh maz? Yaek rox mwngz siengj mbouj siengj gou? Yaek rox mwngz cingq cimyawj gizgyae seiz, aen lwgda mwngz dwg mbouj dwg lij miz aen ngaeuz gou? Yaek rox moix hwnz mwngz byaij coh aen loq diemzsugsug seiz, dwg mbouj dwg rox gou youq ndaw loq caj mwngz?

Caen dwg siengj mwngz lai lo, gig gyaez dinghdingh naengh youq gizneix siengj mwngz, siengj caeuq mwngz gangj gij goj gaxgonq. Gou ceiq gyaez yawj aen lwgda mwngz, de couh lumj ndit, ronghsaksak dak daengz ndawsim gou. Mbouj rox mwngz dwg mbouj dwg roxnyinh gij siengjniemh gou, hoeng gou nyienh yienghneix dinghdingh dwk niemh mwngz.

Caen dwg siengj mwngz yaek dai, siengj mwngz siengj ndaej sim gou in bae. Bouxvunz mbouj cimz gij feih siengjniemh gvaq, couh mbouj rox cungj inhoj neix, fouzfap rox gij hoj gou. Siengjniemh in lai, caenhguenj gou rox yienghneix dinghdingh siengj mwngz, gwnzmbwn hix fouzfap dawz faenh siengjniemh gou cienz bae hawj mwngz.

Hoeng gou saenq, mboujlwnh baenzlawz gyae’gyanggyang, mwngz itdingh ndaej dingqnyi gij sing ndawsim gou. Danghnaeuz miz gihvei, gou nyienh bienqbaenz benq fwjhau gyangmbwn, mbin gvaq cien bya fanh raemx, dingz youq gwnz gyaeuj mwngz, caensaed dwk bae gamjsouh gij swnghhoz mwngz, vih mwngz cw gij ndit ndatrad roxnaeuz gij faenx yaegyad.

Mboujgvaq, gou mbouj rox nyaux gij caemcingx mwngz, gou cij rox youq gizneix caemrwd dwk niemh mwngz. Couhsuenq gij siengjniemh neix dwg aen loek ndeu, gou hix mbouj haeujsim, couh lumj aen loq gyaeg- yang, ciuhvunz hix cungj byaij mbouj daengz、gaemh mbouj ndaej, hoeng dangj mbouj ndaej gou itcig bae gyaep.

Youq ndaw ndwenngoenz mbouj miz mwngz, gou ndaej goq swhgeij ndei, siengj mwngz seiz gou mbouj rox daej. Geijlai siengj yien faj fwngz mwngz, youq ndaw faj fwngz mwngz gaek aen saw “gyaez” ndeu, gaek haeuj gij siengjniemh gou. Geijlai siengj lumh aen lwgda mwngz, dawz mwngz haeuj ndaw sim gou bae yawj. Gou rox, gou mbouj ndaej maqmuengh baenzlai, gou cij maqmuengh gou itcig ndaej yienghneix dinghdingh dwk siengj mwngz, daengz laux hix mbouj lumz mwngz……