Bihaenx seizhah, 10 bi gaiq ndeu aenbeiz doxdax youq gwnz bya Fuzdingj hainduj lo. Gyoengq beiz daj gak dieg daeuj cungj vid gen vid ga dwk, faenfaen daeuj humx saicangz, yaek yienh gij bonjsaeh swhgeij.

Bingzveij senhbu doxdax gveih- cwz: Aen beiz lawz youq 3 aen cung- daeuz ndawde ndaej hawj bouxvunz naengh youq gwnz daengq saicangz cungqgyang haenx cwxcaih, de couh ndaej hingz.

Boux hwnjciengz daih’it dwg beizsei miz gujdenj swzcaij. Cij raen de menhmenh byaij daeuj, coh gyoengq bouxyawj hengzlaex, caiq youq baihnaj bouxvunz naengh menhmenh vad hwnjdaeuj. Seizhah mbwn hwngq, najbyak fajnaj bouxvunz cungj ok hanh lo, beizsei haenqrengz bae vad, lumj aen gyangq baenq nei heux bouxvunz haenx baenq, caengz daengz 3 aen cungdaeuz, beizsei baegfofo dwk naeuz:“Gou saw lo, gvaq 10 bi le gou caiq daeuj doxdax.” Gangj sat couh deuz lo.

Beizdiet gunghcuj lumj duz roeg iq nei mbin daengz gyangmbwn, ndawsim gag ngeix, bihaenx gou hoenx baih byafeiz, baujhu Dangzswngh saefouh caeuq lwgsae de byaij gvaq goengq bya haenx, feiz lawz cungj deng mied bae, ngoenzneix itdingh hawj sou caiq yawj gij bonjsaeh gou. Gangj sat daj goekrwz mbon ok aen doxgaiq iq ndeu okdaeuj, menh nam: “hung, hung, hung”. Aen doxgaiq haenx sikhaek daj gyang fwngz iet coh gyangmbwn, baez vad, doq ci hwnj rumzhaenq, lienz vunz caeuq daengq, bongj daengz bak leix lai gyae bae. “Ha! Ha! Ha!” Beizdiet gunghcuj riu cam:“Baenzlawz?” Gyoengq bingzveij rongx naeuz:“Mwngz baez vad, hawj vunz yaek dai, mbouj gaemh mwngz cixbah, mwngz lij mbouj deuz vaiq di!” Beizdiet dingq le hanh gyoet cungj conh okdaeuj, fandingqdaeuj buet deuz lo.

“Sou mbouj miz maz bonjsaeh, hix gamj daeuj ceng ak.” Swnh gij singyaem baez yawj, yenzlaiz dwg Beizceij gunghswj gangj vah. Hoeng cij raen de mbauqndei dangqmaz, gaiqbeiz lij caengz daengz, heiqhom biu daeuj gonq. Gyoengq bingzveij gangj baezneix mingz daih’it itdingh dwg beizceij lo. Beizceij “ba” sing ndeu baez hai, yaep ndeu couh hawj bouxvunz naengh vad ndaej geijcib baez lo. De cam:“Bouxlaux, Cwxcaih lwi?” Bouxvunz naeuz:“W, dangh- naeuz mwngz genhciz ndaej 3 aen cungdaeuz couh engq ndei lo. “Gijmaz? 3 aen cungdaeuz?” Yenzlaiz beizceij mbouj rox gij gveihcwz doxdax, raen gyoengq beiz youq gizneix cij menhmenh gvaqdaeuj yawjyawj. “Dwg ha, neix dwg gveihcwz baez doxdax neix, mwngz mbouj rox?” Bouxvunz cam. “Gaxgonq mbouj rox, mwngz gangj liux cij rox. Gou caenhrengz ba!” Caengz daengz 2 aen cungdaeuz, beizceij gaenq vaihvedved, cij lw geij diuz ndokbeiz lo. “Dingz, danghnaeuz caiq genhciz roengzbae lauheiq couh oksaeh lo, beizceij gunghswj, mwngz baema yw sieng gonq ba!” Miz boux bingzveij ndeu heuh beizceij daengx roengz- daeuj. Beizceij gunghswj roengzdaiz, gyoengq bingzveij cungj hojsik dangq- maz.

Lingh boux senjsouj, beizdiuq haeujdaiz lo.

Beizdiuq laemzseiz youq gwnz gyaeuj bouxvunz dap aen gyaq ndeu, aeu dietding ding maenh le couh “yiyi yaya” ciengq go baenq hwnjdaeuj lo. “Bouxlaux, gamjdaengz ndei lwi? Gou mbouj baengh goengrengz couh rox gag baenq, baenq yaek 3 aen cung- daeuz hix mbouj baeg.” Beizdiuq daekeiq dwk naeuz. Bouxvunz haenh naeuz:“Ndei! Ndei!” Lwgda gyoengq bingzveij baez rongh lo, cingq cinjbi dwk faen seiz, fwt yiengj “danghlangh” sing hung ndeu, beizdiuq daj aen gyaq doek roengzdaeuj, dub deng aen gyaeuj bouxvunz, ringx youq gwnz dieg. De ienqhoij dwk naeuz:“Gou cinjbi ndaej mbouj ndei ha!” Gyoengq bingzveij naeuz:“Yenznaeuz mwngz itcig vad rumz hawj vunz gamjdaengz liengz- yauj, hoeng doeklaeng doek roengz- daeuj hawj gyaeuj vunz in, mbouj baenz, mbouj baenz.” Beizdiuq cijndei siengsim dwk lizbae lo.

Beizgunghdiuz hix daeuj lo. Geij bi daeuj, baez daengz seizhah gyoengqvunz cungj cawx de dauq ranz, rumz daj ndawde ci okdaeuj gig yiengjsouh. Aenvih dwg youq baihrog doxdax, mbouj dwg youq ndaw rug, beizgunghdiuz fazveih mbouj ok suijbingz, doeklaeng gamz raemxda lizhai lo.

Doeklaeng hwnjdaiz dwg beiz- daizsiz.

Nyaenx aen anniuj, de couh baenq hwnjdaeuj lo, yaep he, rumz liengzsisi, bouxvunz lumj doek haeuj mbawraeu seizcou ndawde bae, gij aeng caeuq raemxhanh nyaihsanq caez, gwnz ndang cij lw gij sangj, caen dwg raixcaix!

Gyoengq bouxyawj gamjdaengz bouxvunz naengh youq ndaw cangz cungqgyang gig habhoz, couh hemq hwnjdaeuj:“Dou senj de! Dou senj de! Dou senj de!”

Doeklaeng Bingzveij dwk faen liux, bouxcujciz senhbu gaiq aenbeiz doxdax neix dwg beizdaizsiz ndaej daeuzmingz!

Hoeng beizdaizsiz mbouj nyienh hwnjdaiz bae lingx ciengj, de naeuz:“Conq miz gij raez, cik miz gij dinj, gak cungj beiz cungj miz gijndei swhgeij, danghnaeuz vuenh gij dieg wnq doxdax, aiq daih’it mingz couh mbouj dwg gou ndaej lo. Caezgya cungj okrengz hawj bouxvunz daiq daeuj rumz sangj, daiq daeuj fuengbienh, yienghneix yawj hwnj- daeuj, mbouj miz sawhingz, mbouj lwnh ndeiyaez!”

Gyoengqvunz doxcim myoeg- myoeg, riengzlaeng siengj doeng liux doq bek fwngz, gij sing goksadsad, haujlai nanz cungj mbouj dingz.