1 nyied 19 hauh banhaemh, “aen vanjvei vwnzyi senhconz bujfaz bi 2017 Yinhcwngz Yen”youz Yinhcwngz Yenveij Senhconzbu、 Yen Minz- cunghgiz daengj lienzhab banh haenx youq vwnzva gvangjcangz Ouhdung Yangh aen yienh neix banh.

Vanjvei miz doiq fwen、 diuqfoux、 siujbinj daengj 13 aen cezmuz vunzlai haengj dingq gyaez yawj haenx, yungh gij hingzsik yisuz fungfouq yiengq vunzlai senhconz faplwd fapgvi cihsiz, cezmuz depgaenh saedceij saedsaeh, doengsug ngaih rox. Baez vanjvei neix, yinx ndaej 1000 lai boux vunz mbanj henzgyawj Yizcouh、 Liujgyangh daengj si yienh daeuj yawjngonz, hawj gyoengqvunz ndaej yawj mbat vanjvei nanzlumz he.

Youq daengx guek cienzmienh doihengz “caet haj” bujfaz geizgan, Yinhcwngz Yen ciuq gij anbaiz daengx guek daengx gih, giethab dangdieg saedsaeh cingzgvang, mboujduenh doenggvaq vanjvei、 banjbau、 senhconz swhliu、 cek saw senhconz daengj lai cungj fuengsik, yungh diemj daiq mienh, laebdaeb gyalai bujfaz senhconz ligdoh, nyinhcaen doeksaed bujfaz cwzyin, gaenxmaenx dungyenz rengz gwnzbiengz gvangqlangh camgya fapceih senhconz gyauyuz, gaenxmaenx caux ok gij heiqfaenh ndei rox fap、 souj fap、 ciuq fap naekgywd haenx, roengzrengz hwnjguh aen fapceih vwnzva sevei cujyi gig miz minzcuz daegsaek he.

(Lanz Cunghcwngz/蓝忠成)