Bi 2016, Cungzcoj Si hong vah saw minzcuz ndaejdaengz Cungzcoj Si Minzcunghveij yawjnaek caeuq haenq- rengz haeujcoengh, doenggvaq yungh gij banhfap gaenxmaenx mizyauq, cauxmoq doicaenh hong doigvangq yungh vah saw minzcuz, aeundaej seiq fuengmienh cungbyoengq moq.

It dwg caeuq guekgya caengzmienh doxgyau miz cungbyoengq moq. Cung- guek Minzcuz Yijvwnz Fanhyiz Giz youq aen si neix ciuhai aen hoih lauxhangz saemjdingh fanhoiz swzmoq Sawcuengh Vahcuengh bi 2016, hong vah minzcuz cingzyauq ndaejdaengz gyoengq lauxhangz camgya hai hoih haenx cungfaen haengjdingh, Swcigih Minzyij Laebfap Diuyenzcuj daengz aen si neix haiguh ciendaez diuyenz.

Ngeih dwg cozbinj Vahcuengh fanhoih miz cungbyoengq moq. Gonq- laeng guhsat hong denyingj 《Canlangz》fanhoiz baenz Vahcuengh Cungzcoj caeuq go 《Cungzcoj Gyaeundei》 fan ciengq fanhoiz baenz Vahcuengh, dawz denyingj 《Dingzdingj》 bi 2015 fanhoiz baenz Vahcuengh Cungzcoj haenx liedhaeuj lajmbanj denyingj cuengq- ingj gunghcwngz, cujciz cunz cuengq denyingj Vahcuengh 26 ciengz.

Sam dwg loegguh gvangjbo densi lanzmoeg Vahcuengh miz cungbyoengq moq. Yienzlaiz miz si、 yienh song gaep 《Sinhvwnz Vahcuengh》 lanzmoeg cingqciengz boqcuengq, Lungzcouh、 Denhdwngj 2 yienh youh gyalai haicuengq “ginhsingh gangj gojgaeq” “ciet gobo” daengj 3 aen lanzmoeg Vahcuengh.

Seiq dwg hong fanhoiz Sawcuengh miz cungbyoengq moq. Bienyaenq 《Fwen Comz Bouxcuengh Cungzcoj》(Cek Daihseiq), yungh sawndip、Sawgun、 Sawcuengh、 Gozci Yinhbyauh daengj seiq cungj saw, soucomz cingjleix fanhoiz 40 hot Fwencuengh gaenh bi neix cauxsij haenx; gyoebsuenq cujciz ciendaez hozdung fanhoiz 2 baez, fanhoiz aen yaenq baizbienj 13 aen、fuk baengzhoengz 120 diuz, bang banh fwen Vahcuengh doxdax caeuq vwnzyi biujyienj 52 ciengz, hong fanhoiz Sawcuengh cungjsoq lai gvaq bi 2015.

(Nungz Cinhsiengz/农祯祥)