Byaij haeuj Sesanh Cunh, menhmenh byaij gvaq Giuzbingzan, couh lumj haeuj daengz le fuk veh bya raemx hunggvangq maeg ndaem saek lwenq ndeu, yawj gvaq seiqlengq, conghheuq hoenzngaungau、roeg swenj va hom、giuz iq raemx lae、goengqbya beij sang; Dahsi’gyangh gyaeundei youh unqswnh, lumj diuz saicouz sawrwix ndeu ngomx gvaq doenghnaz gvangqmiengx; Byahwetmax soemswt dat sang daengj ndwn youq raeblaeng aenmbanj, ranzlaeuz moqsup ndeiyawj haenx aen dem aen ing bya dep raemx, caezcup yinzrwd dwk sieng youq song hamq diuzdah iq; Gamjdoegsaw、Bya’aensae doenghgij goengqbya sangvid mwncup neix hophumx youq seiqhenz aenmbanj. Gizneix mbouj miz gij nyukndwet nyapnyuk hawsingz, caenhmiz faex heu va hom hoengheiq singjsien doxbuenx. Boux baengzyoux Fazgoz daeuj gizneix cetyouz gvaq haenx baenzneix haenh naeuz, gizneix couh lumj dieg “Yanghgwzlijlah” nei gyaeundei yinxvunz. Baengh gij gyaeundei baengh gij daegsaek de, Sesanh Cunh gonqlaeng aeundaej daengx guek buek daihsam aenmbanj mizmingz lijyouz daegsaek gingjgvanh caeuq daengx guek haj sing gaep diemjguhyiengh youqndwi nungzyez caeuq lajmbanj lijyouz cwnghauh.

Sesanh Cunh dieg youq baihnamz Bingzanh Yangh Gunghcwngz Yauzcuz Swciyen, liz yienhsingz miz 5 goengleix gyae, dwg aen mbanj ndaw diegguenj Sinhgaih Cunhveijvei. Sesanh Cunh dwg Gunghcwngz aen mbanj hwnjguh lajmbanj moq sevei cujyi ceiq caeux ndeu, yienh yangh song gaep dangjveij cwngfuj gonqlaeng roengzngaenz 2000 lai fanh maenz, doiq daengx mbanj guh le cienzmienh dajveh hwnjguh, guhbaenz le yiengh ranz yiengh mbanj gaijguh、haenzdah re raemxrongz yawj gingj、cunh gaep cunghab fuzvu cungsim nem hekyouz dakdaih cungsim、lanzgiuzcangz、laeuzfaex luengq- hongh raez、daengroen ndatdaengngoenz、ciengz biujyienj Yauzcuz aeuyah baehaq、dieg baijyienj dinfwngz dwk youzcaz Gunghcwngz、henz roen ndaw hongh ndaem faex ndaem va、ciengz dingz ci caeuq diuzroen hung haeuj mbanj doenghgij hanghmoeg neix; dauq coih ndei Miuhvuengzsix, guh gij siengq gaekdeu lwnh gojgaeq haeuj Ging ganjgauj Lungz Sizyau bouxvunz gwnz lizsij dangdieg neix. Seizneix, aen cunh neix hailaeb miz cimhra rin bingzan、vadruz、yawj ranz moq ranz gaeuq ndaw mbanj、bin dat cet bya、cimz youzcaz Gunghcwngz、yawj fungcingz minzcuz biujyienj、bae ndaw reihnaz dajndaem dajndai doenghgij hanghmoeg neix, ndaej baenz Gunghcwngz aen mbanj mizmingz daegsaek lijyouz comz miz minzcuz fungcingz yawj gingj caeuq youqndwi lijyouz nungzyez ndeu.

Sesanh Cunh yawjnaek cingsaenz vwnzmingz gensez, hawj saedceij cingsaenz vunzmbanj lai cungj lai yiengh, gaenxmaenx ungganq vunzmaenh vwnzva caeuq bouxguzgan vwnzyi lajmbanj, sonyinx canghheiq ndaw mbanj laebbaenz vwnzyi senhconzdui, ciengzseiz cujciz gyoengqde guh gij minzsuz vwnz dij hozdung vunzlai gyaez yawj haengj dingq haenx. Baez daengz ngoenzciet, Yauzcuz aeuyah baehaq biujyienj、dwk youzcaz Gunghcwngz、foux boq venz roqgyong、foux gaeuyiengz Yauzcuz doenghgij biujyienj cietmoeg neix, caiqlij baijyienj dinfwngz siungauz laeujhaeux、guh daeuhfouh hawq dangdieg doenghgij hozdung neix, swnjcienz le vwnzva maenhndei conzdungj Yauzcuz, hawj vunzmbanj dangdieg caeuq hekyouz ndaw guek rog guek gaenhged daejniemh daengz gij rengzhoengh vwnzva Yauzcuz yenzswnghdai de.