Gvaq geij ngoenz, de dungx indot dingj mbouj ndaej, maezngunh lo. Bohmeh de youh soengq de daengz yihyen. Gyoengq doengzhag mbouj nyaenxsim, youq banhcangj daiq- doengh lajde, caezgya vih de gien ngaenz, 49 boux vunz, gungh gien ndaej 3000 lai maenz. Ndaw ban dingzlai vunz dwg daj lajmbanj daeuj, moix ndwen cienzgwn bak lai maenz, mizmbangj doengzhag baengh ngoenz- singhgiz bae dajgoeng canh ndaej ngeih samcib maenz bangbouj cienzgwn. Hoeng youq dangqnaj gunnanz, caezgya cungj yiedsim yienh ok fwngz. Ndaw ban doengzhag moix boux cungj sij vah hohfuk youq gwnz ceij, baeb baenz hagceij soengq hawj Dahfeih.

Gij cienz bohmeh Dahfeih ciq ndaej caeuq ndaw ban gien ngaenz gya hwnjdaeuj cij miz 9000 maenz, liz cienzsoujsuz lij ca haujlai. Dou cungj simgip dangqmaz, gig maqmuengh bingh Dahfeih ndaej caeux di yw ndei. Seiz youqgaenj, secangj siengj ok aen banfap, sij cangyisuh, fat- doengh yozyau hagseng gien ngaenz. Geij dahsau dou moix ngoenz banringz caeuq banringzgvaq cuengqhag couh youq ndaw yozyau bak loh、henz sizdangz、bakdou yozyau daengj giz vunz byaij ceiq lai haenx baij ok cangyisuh caeuq sienggienngaenz. Geij ngoenz seizgan, youq ndaw yozyau couzcomz 20000 lai maenz. Ndaw sienggienngaenz, mboujdan miz ngaenz, lij miz vunzsimndei soengq hawj Dahfeih hohgaj, baihgwnz sij dwk gak cungj vah hohfuk.

Dahfeih youq yihyen yw bingh, vunzcaen de vihliux canh ngaenz hawj de guh soujsuz, daeuj daengz ndaw singz dajgoeng. Dahnuengx de youq suzse dou youq, moix ngoenz caeuq dou soengq gij gwn bae yihyen hawj de. Baengh vunzlai gien ngaenz, caencik baengzyoux bangcoh, Dahfeih ndaej swnhleih guh soujsuz, soujsuz baenzgoeng lo. Hojsik bingh fatyienh nguh lai, rongzva Dahfeih deng gvej bae lo. Valiuz mbouj geij lai nanz, byoem de loenq caez, vunz hix byomnyieg haujlai. Hoeng moix baez miz vunz daeuj yihyen yawj de, de cungj riunyumnyum. Hoeng mbouj miz vunz seiz, mbouj rox de geijlai siengsim nanzgvaq. Bingh yw ndei le, Dahfeih dingz hwnjhag bi ndeu, youq ranz yietnaiq.

Dou yaek bae sizsiz seiz, Dahfeih dauqma hwnjhag, najriu de hix dauq lo. Dou bizyez seiz, de doiq dou gangj:“Gij saeh sou bangcoh gou, gou cungj rox, ciuhvunz cungj mbouj ndaej lumz.” Dou naeuz:“Dou cij maq- muengh caeuq mwngz youq benq lajmbwn, lij ndaej caez diemheiq hoengheiq doxdoengz, yawj daeng- ngoenz hwnjroengz.”

Dahfeih bizyez seiz gou lij doeg yenzgiuswngh. Aeu QQ gangjgoj, de lwnh hawj gou de dauq daengz ranzmbanj guh hong lo, gou hoh de fanh saeh swnhleih. Doeklaeng gou bizyez camgya gunghcoz, daihgya cungj nyaengq, lienzhaeh hix cug- ciemh bienq noix lo. Hoeng gou rox, couhsuenq mbouj ciengzseiz lienz- haeh, hoeng cijaeu gou ra de, vangjloz baihhaenx, de baez yawjraen cungj sikhaek hoizfuk siusik hawj gou, gamjcingz dou mbouj rox aenvih seizgan caeuq lizgyae couh bienq fouz.

（sat）