Bi 2017 cunhyin daj ndwen 1 ngoenz 13 hainduj daengz ndwen 2 ngoenz 21 sat, haujlai bouxguhhong youq gizdieg Cuhsanhgoz guh hong haenx naengh cimohdoz dauq Guengj- sae、 Huznanz、 Yinznanz、 Gveicouh daengj mbanjranz. Cunhyin geizgan, Hocouh Si gungh youq roenloh youqgaenj gvaq ndaw gyaiq haenx laeb miz 6 aen cunhyin simndei yizcan, vih bouxguhhong naengh cimohdoz dauq ranz gvaq roen haenx gunghawj fugsaeh raeujsim. Hocouh Si gungh’anh、 gyaudoeng daehyinh、 veigiveij、 cungj- gunghvei daengj siciz danhvei caeuq bouxguhhong、 bouxgagnyienh lai aen giyez simndei youq simndei yizcan, vih bouxguhhong gag naengh cimohdoz dauq ranz haenx gunghawj huqlaex simndei、 yihliuz gouqbang、 byoq feiz gangq buh、 raemx raeuj gijgwn raeuj、 coih cimohdoz daengj fugsaeh raeujsim mbouj aeu cienz.

Hocouh Si diegyouq daegbied, binaengz cunhyin geizgan miz haujlai vunz naengh cimohdoz dauq ranz, gawq dwg daegsaek hong guenjleix gyaudoeng Hocouh Si, hix dwg aen nanzdaez he. Gaenh bi neix daeuj, Hocouh Si gyaudoeng bumwnz lienzhab gak mizgven ciznwngz bumwnz、 giyez caeuq vunzlai ndawbiengz, dawz cimohdoz simndei camhfugsaeh aen binjbaiz fugsaeh neix guh hung guh ak, ndaejdaengz gwnzbiengz haenhndei. Hocouh Si Veiswngh Giswngh Veij、 Giswngh Hezvei nem yihliuz danhvei gaenxmaenx camgya, vih vunzlai dauq ranz ginggvaq haenx gunghawj yihliuz gouqbang、 cam cwngcwz nem huqlaex simndei ndwencieng daengj fugsaeh.

(Liz Cujdez/黎祖叠)