Lingzconh Yen Lingzdenz Cin Cangzganghlingj Cunh bi 2006 ndwen 5 ndaej Gozvuyen goengbouh guh daengx guek cungdenj vwnzvuz baujhoh danhvei; bi 2009 ndwen 5, aen Cangzganghlingj Roendaehhuq Mbanj Gaeuq Swnghdai Bozvuzgvanj roengzngaenz 560 fanh maenz hwnj- guh haenx guhbaenz haidou couxhek; bi 2012 ndwen 12, benq ranzgaeuq Cangzganghlingj ndaej senj haeuj buek daih’it aenmbanj conzdungj Cungguek, caemhcaiq ndaej dingh baenz daengx guek 51 aen mbanj swnghdai guekgya baujhoh ndawde aen ndeu.

Cangzganghlingj Cunh dieg youq ndaw gemh byaimeg Byahaijyangz giz doengbaek singz Gveilinz 50 goengleix gyae haenx, Ciuhsung couh hainduj baenz mbanj, nyuenz heuhguh Yauzsanhlingj, Ciuhmingz gaij heuhguh Cangzganghlingj Cunh. Seiz Ciuhmingz Ciuhcingh, hakfouj Gveilinz vih aeu roenhawq bouj Mienglingzgiz daehhuq noix lai caeuq hawj roen daehhuq dinj di, couh youq ndaw gyang goengqbya diegrungh megbya Byahaijyangz vatbu le diuz “roen daehhuq Siengh Gvei” ndeu, lienz doeng hawgeq Gaisouj aen “haw cien ranz” baihbaek Mienglingzgiz caeuq hawgeq Dahih baihnamz Mienglingzgiz haenx, diuz roen neix ndaej doeng daengz baksok hawgeq Dahih roengz Dahlizgyangh bae daengz Vuzcouh、Gvangjcouh. Cangz- ganghlingj Cunh couh youq cungq- gyang diuz “roen daehhuq” neix, seizhaenx couh yinx haujlai cangh- seng’eiq youq gizneix hai diemqbouq guh gaicawx, baenz le dieg- vuenhmbaq、 diegyietbaeg gij vunz guh seng’eiq bae baek roengz namz haenx. Vunzmbanj Cangzganghlingj uk lingz rox guh haenx caemh gaenx dajndaem dajgai, canh ndaej haujlai ngaenz, miz haujlai vunzfouq gvaq, daiqdoengh rangh dieg haenx fouqmiz, hoenghvuengh geij bak bi, seiz Ciuhmingz Ciuhcingh ndaej haenh dwg “Nanzgingh iq” gvaq. Baenzneix, gij ranzgaeuq sanghung gvangqyub haenx cij ndaej celouz daengz seizneix.

Byaij haeuj Cangzganghlingj Cunh, couh raen baihswix aenmbanj daengjbaij miz coengceiz singq Moz、ranzveisouj、ranzbezgya、honghhung ranz Moz doenghgij ranzgaeuq neix, riengz diuz roen haeuj mbanj byaij gvaq baihgvaz, couhdwg aen Cangz- ganghlingj Roendaehhuq Mbanj Gaeuq Swnghdai Bozvuzgvanj aeu Dinghajfuk gaij baenz haenx. Ndwn youq giz sang gyang mbanj ngaem yawj baihlaj, benq ranzgaeuq cien heu vax mong、ranz sang hongh gvangq、riengz dinbya baij baenz yiengh ekvaiz miz 1.8 fanh bingzfanghmij haenx couh yawj haeuj lwgda caezdoh. Ciuq cunhcangj naeuz, ndaw mbanj seizneix miz 110 ranz, miz gij ranzgaeuq Bouxgun Ciuhmingz Ciuhcingh guh haenx 60 lai aen. Daengx benq ranzgaeuq baijbouh ndaej ndei、ranz sang hongh gvangq、hong dinfwngz gyaqciq, miz yienghranz dongh daemx liengz- samgak、yienghranz donghfaex dap- gyaq, dingjranz miz goujndoen、ndoenvang, yiemhranz ngaeugungj, gak cungj gak yiengh; ndaw ranz aencueng、faqdou、gak cungj gyasei doenghgij neix deu lungz veh fungh, gyaqciq raixcaix; gij diencingj gak aen ranz cungj dwg aeu benjrinheu caepbu, luengqhongh cix aeu benjrin roxnaeuz rinmaxluenx bu baenz, miengbaizraemx lajdeih caeuq gij diencingj gak aen ranz doxlienz hwnjdaeuj, gig miz daegsaek. Caiq gya miz diuz roenrin gaeuq raemhrwd、aen mohcoj hungloet doenghgij yiengh gaeuq neix, aen mbanj gaeuq couh engq miz gij gingj gyaeundei swyenz caeuq yinzvwnz haenx yienhda myabmyab.

Doengh bi neix daeuj, Lingzconh Yen doiq gij rizgaeuq vwnzvuz youqgaenj、yiengh dajcaep ranzgaeuq、ranzgaeuq conzdungj Cangzganghlingj Cunh guh le cienzmienh baujhoh、coihcingj, doengzseiz gohyoz dwk vatgud caeuq hableix leihyungh gij feihvuzciz vwnzva yizcanj, hawj yienghsiengq、baijbouh aenmbanj ndaej henhoh ndei caemhcaiq dauqfuk mbangj bienq moq, swyenz swnghdai vanzging caemh ndaej daengz baujhoh caeuq bienq ndei. Vunzmbanj caemh haenqrengz boiq- hab, youq gij reih henz mbanj ndaem le godaengngoenz caeuq vagwzsangh, moix daengz seiz haiva, vadaeng- ngoenz henjrwgrwg, vagwzsangh gak saek gak yiengh hoengh hai, baenz mbaek baenz doengh yietnangq, hophumx buenq aen mbanj, hawj aenmbanj engq gyaeundei yinxvunz, hekyouz cix doxcanj doxcaeh dwk bae ndaw mbanj yawj gingj gyaeu, sim- angq dangqmaz.