Mbanj dou heuhguh Mbanj- bakrouq, laeng mbanj dou miz congh gamj he heuh Gamjsaeq, vihmaz heuh aen mingz neix ne? Ciuq vunzlaux gangj, congh gamj neix daj gizgyae yawj bae couh lumj vuengzdaeq naengh youq gwnz goengdienh nei, mizmbangj vunzlaux hix naeuz, congh gamj neix doenghbaez miz saeq youq gvaq, ndigah heuh Gamjsaeq.

Lij iq seiz, gou dingqnyi bouxlaux gangj, Cungguek moq ngamq laebbaenz seiz, vunzlai saedceij gig gungzhoj, mbouj miz ngaenzcienz, ndaem doenghgo mbouj miz ngaenz cawx bwnh, ndigah haujlai vunzmbanj bae ndaw gamj ra aeu haex vumzvauz ma ndaem doenghgo, haujlai vunz youq ndaw gamj raen miz doxgaiq ciuhgeq ce roengzdaeuj, lumjbaenz duix、dawh、bat doenghgij doxgaiq neix, seizhaenx ranz gou lij ndaej aeu aen duix vava loegloeg ma ranz ne, hoeng gvaq nanz le, mbouj rox vit bae gizlawz roxnaeuz hawj vaih lo, danghnaeuz louz daengz seizneix, aeu bae gai ranz gou aiq ndaej haujlai cienz bw. Gangj daengz neix gou cai doenghbaez caen miz saeq youq gvaq bw.

Congh gamj neix lij miz haujlai goj yinx dem. Congh gamj neix caeuq goengq bya heuh “bya iq” dox doiqnaj, cienzgangj, miz coenz vah he naeuz: “Bya doiq bya sam fanh roek cien liengx, gamj doiq gamj gouj bak betcib gim”! Naeuz dwg miz gim- ngaenz yo youq ndaw gamj. Bouxlaux ciengzseiz gangj aen gojgaeq neix：Miz bouxgik mbanj wnq he, rox ndaw gamj miz haujlai gimngaenz henjhwdhwd, de couh siengj caeg gimngaenz okdaeuj yungh. Baez daih’it de haeuj ndaw gamj bae, raen gim couh dawz okdaeuj, hoeng de byaij coh bakgamj seiz, yied byaij gij gimngaenz couh yied naek, de cijndaej vit bae di caiq byaij, hoeng caj de byaij daengz bak gamj, gimngaenz hix vit bae liux lo. De yied siengj yied mbouj fugheiq, couh siengj ok aen banhfap he, daiq duz meuz he daeuj, rieng duzmeuz cug rangh bauqrengh he, de bae daengz ndaw gamj raen gimngaenz, couh dawz gimngaenz cug youq gwnz ndang duz meuz, yienzhaeuh baez cit rangh bauqrengh, duzmeuz diuq coh bak gamj, hoeng caengz daengz sam yamq, congh gamj neix couh haep bak hwnjdaeuj lo, vunz caeuq meuz ngaiz haep youq ndaw gamj caez.

Gou lij dingqnyi bouxlaux gangj gvaq, ndaw gamj miz duz maxgim、vaizgim、 gaeqgim daengj doenghduz dem. Cienznaeuz, miz bi he, mbanj dou caezgya comz cienz cingj yahgimq bae ndaw gamj camsien, gouz muengh doenghduz gim henjhwdhwd haenx byaij okdaeuj, hawj mbanj dou baenz fouq baenz miz, doeklaeng camsien guh le caet hwnz caet ngoenz, miz duz maxgim he byaij okdaeuj dahraix, yahgimq baez raen duz neix byaij okdaeuj, cax raeh baez baek gvaqbae, ngamq baek doiq gaiq daezmax, doek ok di gim iqetet he, caezgya dawz di gim neix bae vuenh ngaenz, ngamq gaeuq hawj cingj yahgimq caeuq ngaenzgwn caet hwnz caet ngoenz haenx.

Bak congh gamj neix gig gvangq, miz saek 400 lai bingzfuengmij, youq ndaej haujlai vunz. Lij iq seiz, gou baeznaengz bae langh vaiz, ciengzseiz haeuj ndaw gamj bae guhcaemz. Congh gamj neix mizmbangj vunz mbanj dou lij bae youq gvaq, youq ndaw gamj ciengx vaiz、 ciengx mou、 ciengx gaeq caeuq bit, gvaq saedceij. Hoeng aenvih ndaw gamj miz ngwzdoeg nonhaih lai, gyoengqde couh buen daeuj gizdieg seizneix youq lo.

Haeuj ndaw gamj dieg gyae’gyae bae miz diuz dah iq he caeuq haujlai rin ronghlwenq haenx, ndeiyawj raixcaix. Danghnaeuz dawz congh gamj neix guhbaenz dieg guhcaemz yawjngonz, aiq miz haujlai bouxhek daeuj yawj bw!