Loz Yizsiu saehgienh ginggvaq vangjloz、densi、bauqceij daengj meizdij geij ngoenz seizgan senhconz baudauj, gingdoengh cienz sevei, doeklaeng boh de Loz Wj boizlaex boiz gij cienz vangjyouj gien haenx dauq caez, saehcingz cij gietsat. Gaenh geij bi daeuj, vangjloz fazdaz daiq daeuj saenqsik bienhleih, hawj haujlai saeh bingzciengz ginggvaq raemh bae raemh dauq, bienqbaenz daihsaeh, ndaej daengz vunz simndei bangcoh caeuq sevei banggouq. Lumjbaenz gij saeh Gvangjsih “Yangz Luzginh”, Nanzgingh dahnyez Dungz Yenzyenz baenzbingh daengj. Youq aen seizdaih nauhyied neix, cungj hawj gou siengj hwnj 11 bi gonq, boux doengzhag gou baenz bingh’aizcwng, siengj hwnj de caeuq vunzcaen de, gyoengqde baenzlawz giengiengz caeuq bingh ciengj seizgan.

Boux doengzhag gou heuhguh Dahfeih, baknaek noixgangj. Dahfeih caeuq gou caemh suzse, bingzciengz cawz hwnjdangz, de ceiq maij yawj saw. Ngoenzhaenx caeuq gaxgonq doxdoengz daengz seizgan yaek bae hwnjdangz, Dahfeih naeuz de dungxin mbouj cwxcaih, daihgya nyinhnaeuz dwg saeh iq, bae yauyihyen couh ndaej gaijgez, hix mbouj haeujsim gig lai. Yauyih hai geij ngoenz yw liux de gwn roengzbae, hoeng bingh lij mbouj ndei, geij boux doengzhag couh buenx de bae yihyen hung yawj bingh.

Haemhhaenx mbouj dwg youq yinhyen dajcim haemh ndeu bingh couh ndei baenzneix genjdanh, ginggvaq gak cungj genjcaz, canghyw duenqdingh dwg ndaw dungx miz foeg. Cienzsoujsuz daihgaiq dwg 8000 lai maenz. Dahfeih daj lajmbanj daeuj, ranz miz 5 boux vunz, cij baengh bohmeh guh hong reihnaz, daegnuengx dahnuengx bae guh honglingz aeu di ngaenz daeuj ciengx ranz, saedceij gvaq ndaej gig gungzhoj, bae gizlawz lij miz ngaenz lw roengzdaeuj.

Seizhaenx Dahfeih baenzlawz siengj gou mbouj rox, gou cij geiqndaej, de youq henz roen daej- nganga, muenghduenh dwk naeuz: “Bae gizlawz aeu baenzlai cienz daeuj yw bingh, haihag seiz daxboh gou hawj gou 500 maenz ngaenz daeuj hag- dangz, cienzhag gou dwg yiengq yozyau daigvanj, daengz gou bizyez miz hong guh le cijndaej boiz.”

Bohmeh de rox le, bae caeuq gyoengq caencik ciq, gyoengqde baez dingq dwg Dahfeih baenzbingh, siengj daengz daengx ranz cij miz boux daihhagseng ndeu, wnggai ciq di ngaenz hawj ranz de, yienghneix cij comz gaeuq cienz guh soujsuz. Aenvih roen gyae, soujsuz ngoenzhaenx ranzvunz Dahfeih ganj daeuj mbouj gib. de haeuj ndaw soujsuzsiz, suzse linghvaih 7 dahsau youq baihrog caj de. Daihgya cungj nyinhnaeuz cijaeu aen daeng loeg rog soujsuzsiz rongh le, ndang Dahfeih couh ndei lo, ndaej caeuq gyoengqraeuz caez bae yawj saw、hwnjdangz caeuq guhcaemz lo.

Hoeng saehcingz mauhgvaq dou siengjsieng, gou baez daih’it mingz- beg maz dwg “gij saeh boihseiz laebdaeb daeuj daengz”. Dahfeih mbouj ndaej ciuqseiz haeuj soujsuzsiz, aenvih youh caz ok de ndaej Rongzva bingh’aizcwng. Dou geij boux dwg vunzranz daibyauj, ndwn youq dangq- naj canghyw, moenghmangh dwk yawj mbaw saw duenqbingh yigen, ndaw yihyen caemrwgrwg, hawj vunz rox- nyinh dwglau. Caezgya cungj mbouj saenq gij saeh neix dwg caen. Dou buenqngoenz gangj mbouj ok saek coenz vah, naj bienq hausak, mwngz yawj gou, gou yawj mwngz, mbouj rox baenzlawz guh.

Doeklaeng Dahfeih rox cienz- soujsuz daihgaiq aeu 8 fanh lai maenz, couh genhciz dauq