Gizneix dwg diegbya gyaeundei mwncup hoenghvuengh saekheu gyuemlongz ndeu, gizneix dwg aen ranzmbanj huzndei ndaej haenh dwg “bya heu raemx saw swnghdai gyaeu” ndeu, gizneix yienznaeuz diuzroen gaebged, hoeng gyoengq lwgnyez ndaej seizbienh buet bae buet dauq, mbouj yungh lauheiq deng gij ci gwnz roen bonghret baedauq haenx daemjdeng, gizneix mbouj miz aenlaeuz sangvidvid, hoeng miz doenghreih doenghnaz gvangqyubyub haenx, gizneix mbouj miz heiqhaeu mokfaenx, ndaej caenhcingz diem- heiq……

Gizneix couhdwg Lozcwng Cunh Minzloz Cin Bwzliuz Si, diegyouq baihdoengbaek Minzloz Cin, raeb- laeng ing Byadayungzsanh, liz hawsingz Bwzliuz Si 12 goengleix gyae, gyaudoeng bienhleih, vanzging gyaeundei, daejrom vwnzva lizsij nanwt, dwg aen mbanj guhyiengh swnghdai nungzyez lijyouz daengx guek、aen mbanj vwnzmingz daengx guek、aen mbanj daegsaek swnghdai nungzyez Guengjsae gyawjgyae ok- mingz ndeu. Daengx cunh gungh miz 12 aen cunhminz siujcuj 586 ranz 2900 lai vunz; miz 2014 moux ndoengfaex caeuq 3320 moux reihnaz, ndaem miz maknganx、mak- laehcei、makit、dingomak、byaekheu fouz goenghaih、haeuxnaz、raetmoguh doenghgij nungz fu canjbinj neix. Doengh bi neix daeuj, hopheux hwngfat canjnieb maenhndei daeg- saek caeuq gaijndei vunzmbanj diuzgienh gwnyouq, aen cunh neix ciuq gij iugouz hwnjguh ranzmbanj vwnzva swnghdai, fatdoengh vunz- mbanj youq gyanghongh ranz bonj- faenhh vatcaep caujgiciz、ranzdajcawj seuq rongh、diengzhaex seuqcingh、cekgaeq rienghmou, ndaem gomak gova, aeu suijniz bubingz, hawj gyanghongh seuqset loegheu, baenz le suenmak iq、daemzbya iq、ciengz- ciengxmou iq、suenbaek iq, vanzging diegyouq ndaej gaijndei haujlai.

Doengh bi neix daeuj, Lozcwng Cunh aeu hwnjguh aen mbanj swnghdai lijyouz、yiengh mbanj gaij guh caeuq cauxguh nungzyez daegsaek guh cawjdaez, caezsim ok rengz, ranzranz ndaem faexheu, ranzranz banh suenmak, daengx cunh loegvaq menciz dabdaengz 2850 lai moux, ndoengfaex hoemqcw daengz 68% doxhwnj, loegvaqlwd daengz 98% doxhwnj, saedyienh le “aen mbanj aen ndoengloeg”、“diuz roen- mbanj ndeu baenz diuz luengqhongh saekloeg ndeu”, daengx cunh diegbya diegbo ndaem gofaex gomak dohcup, gij roenmbanj gungh raez 6 goeng- leix haenx ndaem vamoizsamgak、gomoizhenj、gorungzmbawsaeq、gova- gveiq、gova’nding gij doenghgo yawjngonz caeuq gofaex dijngaenz haenx, henz roen、henz daemz、henz mbanj、henz ranz cienzbouh saed- yienh loegvaq, baenz aen gingj lwenqda ndeu.

Lozcwng Cunh conzdungj ndawbiengz vwnzva yisuz lai cungj lai yiengh, vih vunzmbanj caeuq hekyouz daezhawj gak cungj gak yiengh yienjheiq guh’angq hozdung. Ndaw cunh laeb miz aendoih fouxlungz fouxsaeceij、aendoih yanghgoh、aendoih dienzcik、aendoih Heiq- begvah、aendoih lanzgiuz bouxsai bouxmbwk doenghgij doih vwnzdij neix, ciengzseiz guh gij vwnzdij hozdung miz daegsaek lajmbanj、lai cungj lai yiengh haenx; doengzseiz guh miz vwnzva gvangjcangz、giuzcangz ronghdaeng、ranzsaw gohgi bouxcoz、luengqhongh raez hotsei mbawveh doengh gijneix, hawj saedceij seiz hongsoeng vunzmbanj engq lai cungj lai yiengh.

Lozcwng Cunh miz gij gwzming conzdungj najrongh caeuq vwnzva lizsij nanwt de, guh saeknding lijyouz caemh hoenghhwd. Bei Giujniengz dwg Bwzliuz Ciuhsung satbyai Ciuhyenz codaeuz boux yinghyungz dingjhoenx caeggeq ndeu, aen cunh neix bi 2007 doenggvaq lai roenloh couzcomz cienzngaenz guhbaenz le “Beiswng vwnzva gvangjcangz”, daengj hwnj le “siengqdeu Bei Giujniengz”, doengzseiz banh le gaiq daih’it “Beiswng vwnzva lijyouzcez”, riengz- laeng moix bi liggaeuq ndwenbet cibbet cungj banh baez ciet ndeu, yinx gyoengq vunzmbanj henzgyawj bae camgya caeqbaiq, hekyouz ndaw gih rog gih doxcaeh bae yawjngonz, nauhyied raixcaix.

Benq saekloeg ndeu, hawj vunzmbanj ndaej gvaq gij saedceij fouqmiz cwxcaih haenx, nungz- gyahloz、swnghdai lijyouz、bin bya cet doenghnaz…… Vanzging gyaeundei lo, suenmak fungsou lo, hekyouz caemh buek dem buek doxcaeh haeuj mbanj, bae gamjsouh gij vwnzva fungsug ndawbiengz de, yawjngonz gij gingjsaek gyaeundei de, cimz gwn gij byaek feih lajmbanj de, daejniemh gij angqyangz lajmbanj moq bienqvaq hungloet de……