Loz Mingz ciuh baeuq ciuh goeng daihdaih dang canghyw, yienznaeuz dwg ywdoj, hoeng, aenvih yw ndei haujlai vunz, youq bonjdeih gig mizmingz.

Loz Mingz daj lij iq couh riengz daxboh hwnj gwnz bya bae gip yw, riengz daxboh hag ndaej haujlai fuengfap yw bingh. Hoeng de dauqdaej mbouj swnjciep daxboh guh canghyw, bae doeg swhfan yozyau, bizyez le couh bae dang siujyoz lauxsae.

Aen yozyau Loz Mingz youq dwg aen yozyau doekgox he, liz ndaw yangh haemq gyae. Bingzseiz miz hagseng baenzbingh, yaek bae daengz yangh veiswnghyen yawj bingh mbouj fuengbienh, yienghneix Loz Mingz couh bae gwnz bya ra ywdoj dauqma dak ce. Miz bouxlawz fatndat dungxin, de couh goen ywdoj hawj hagseng gwn, yw ndei haujlai hagseng. Bohmeh hagseng yaek hawj cienz yw hawj Loz Mingz, Loz Mingz hoho riu naeuz:“Hawj maz ngaenz yw ne, gij ywdoj haenx dwg gou youq ngoenzsinghgiz bae gwnz bya gipgip couh ndaej lo, mbouj dij maz ngaenz ne, mbouj yungh, mbouj yungh.”

Yienghneix, seizgan nanz le, gyoengq bohmeh hagseng cungj gig docih Loz Mingz, bingzseiz doxbungz seiz, cungj mwngz coenz gou coenz “Loz lauxsae ndei” heuh dwk. Haemh singhgizhaj mbouj hwnjdangz, cungj miz bohmeh hagseng cingj de bae gwn laeuj caimax. Raen de vunz soh, ndaw mbanj miz dahsau gyaeundei he gyaez de, doeklaeng haq hawj de lo.

Loz Mingz youq aen hagdangz neix baez guh couh guh le caet bet bi. Bide, ndaw yienh miz yozyau yaek ciu lauxsae, de bae gauj, byawz rox, baez gauj couh gauj ndaej lo.

De bae yienhsingz ngoenzde, hagseng de uet raemxda soengq de okbae. Geij boux hauxseng ndaw mbanj yungh max doz doxgaiq de hwnj loh, naeuz:“Loz lauxsae, ngoenz- singhgiz mbouj hwnjdangz geiqndaej dauq daeuj caeuq dou gwn laeuj caimax bw.” Loz Mingz dap naeuz:“Ndei, ndaejhoengq itdingh dauq”

Loz Mingz daiq geij daeh ywdoj hung riengz bae yienhsingz.

Youq yienhsingz yozyau, Loz Mingz lijdwg dang banhcujyin, ndaw ban hagseng baenzbingh seiz, de lijdwg ciuqgaeuq goen ywdoj hawj hagseng gwn, hagseng ndei le cungj docih de, yw ndei hagseng ndawsim de hix gig angq.

Ngoenz he, yaucangj fwt heuh de bae bangunghsiz, de ngamq haeuj- bae, yaucangj couh vix dennauj naeuz:“Loz lauxsae ha, mwngz yawjyawj gij saeh ndei mwngz guh neix.”

“Baenzlawz lune?”

“Baenzlawz? Mwngz gag yawj gwnz vangj lundanz bonj yienh gyoengqvunz guhlawz gangj?”

Loz Mingz muengz yawj, laxlawz dwg miz boux cawjranz hagseng he youq gwnz lundanz naeuz, miz aen yozyau miz boux lauxsae he aeu ywdoj hawj hagseng gwn, dwg mbouj dwg fouz cwngq yw bingh? Dwg bouxlawz hawj gij gienzleih neix hawj de?

Loz Mingz yawj le muengz doiq yaucangj naeuz, yienznaeuz swhgeij mbouj miz cwngq couh bang hagseng yw bingh, hoeng, ndawranz swhgeij seiqdaih dang canghyw, yw gij bingh fatndat dungxin neix, mbouj miz saeh, caiq gangj de youq lajmbanj yw hagseng geijlai bi lo, mbouj miz maz saeh, hawj yaucangj mbouj yungh yousim.

“Mbouj miz saeh hix mbouj ndaej, baezlaeng hagseng baenzbingh mbouj cinj mwngz caiq goen yw hawj gyoengqde gwn, mboujnex oksaeh byawz fucwz?”

“Yienghneix hagseng bingh le baenzlawz guh ne?”

“Soengq bae yihyen.”

Loz Mingz mbouj gamj caiq gangj maz, daj seizhaenx hwnj, baez miz hagseng bingh, de couh soengq bae mwnzcinj yawj bingh, raen ngaenz yw bingh baenzlai bengz, de lawh hagseng sim’in, hoeng hix mbouj miz banhfap.

Yienghneix gvaq ndaej duenh seizgan he mbouj miz saeh, byawz rox, fwt ngoenz he, yaucangj youh heuh de bae bangunghsiz lo.

“Loz lauxsae, mwngz yawjyawj mwngz guh gij saeh ndei neix, mwngz vaiq di daeuj yawjyawj.”

Loz Mingz muengz yawj, laxlawz dwg miz boux cawjranz hagseng he naeuz, gij lauxsae seizneix ha, hagseng miz bingh, caengz lwnh hawj bohmeh, couh gag soengq bae aen mwnzcinj de roxnaj haenx lo, ndawde miz maz saeh ne? Mwngz gag rox!

Yienznaeuz coenz vah neix mbouj cigsoh naeuz dwg byawz, hoeng, youq ndawde laeuh gij siusik haenx baez yawj couh rox dwg naeuz Loz Mingz.

“Yaucangj, gou daiq hagseng bae aen mwnzcinj haenx dwg aenvih de liz yozyau haemq gyawj, canghyw ndawde gou boux he cungj mbouj roxnaj.” Loz Mingz vei dwk naeuz.

“Mwngz rox mbouj roxnaj, seizneix byawz saenq? Vunzlai cungj nyinhnaeuz mwngz roxnaj. Youqgaenj dwg byawz hawj mwngz gag soengq hagseng bae?”

“Ndaw ban hagseng miz bingh, gaxgonq gou goen yw hawj hagseng gwn deng vunz naeuz, seizneix gou soengq bae mwnzcinj youh deng naeuz, nanzdauh couh hawj hagseng miz bingh gag youq gizhaenx? Yienghde gou nyaenx mbouj ndaej?”

“Mwngz mbouj rox daj denva hawj hagseng bohmeh daeuj daiq bae ma?”

Deng baez saeh neix le, Loz Mingz roxhit lo, hagseng miz bingh, de mbouj gamj daiq hagseng bae yawj bingh, cungj daj denva hawj bohmeh hagseng daeuj yozyau gag daiq bae yihyen. Yienghneix bingzonj gvaq ndaej duenh seizgan he.

Hoeng, ngoenz he, yaucangj youh heuh Loz Mingz bae daengz ban- gunghsiz, ndek hawj de fung saenq he.

Loz Mingz fwngz saenzdedded hai yawj, laxlawz dwg boux cawjranz hagseng he sij daeuj, naeuz gij lauxsae yozyau baenz maz vunz? Hagseng miz bingh, cungj mbouj ndaej soengq bae yawj bingh, baenz gyae lij heuh de bae daengz yozyau gag daiq lwg de bae yihyen, cungj mbouj rox goq hagseng yaep he, dang maz lauxsae? Lij naeuz yaek bae gyauyuzgiz gauq boux lauxsae haenx.

Yawj daengz neix, Loz Mingz laemx roengz gwnz sahfaz bae. De caem ndaej gig nanz, doeklaeng cij danq gaemz heiq he naeuz:“Ai, di saeh iq neix siengj mbouj daengz yienghneix nanz guh, gij saeh neix dauqdaej baenzlawz guh cij ndei?”

Boux doengzsaeh youq henz fwt gangj coenz vah he okdaeuj:“Gij bingh neix dwg bingh moq, nanz yw!”

Dauq daengz ranz, Loz Mingz lij caemcaem ngeix gienh saeh neix, de siengj daengz gaxgonq de youq lajmbanj aen yozyau doekgox haenx, de caeuq ndaw mbanj gyoengqvunz gwn laeuj caimax, gyoengqde simsoh, raen de yw ndei hagseng youh mbouj aeu ngaenz couh rox de guh saeh ndei, haenh de lij ganj mbouj gib, byawz bae hut de? Siengj dwk, de youh danq gaemz heiq he youq ndawsim gag naeuz: Ai, gij gvanhaeh vunzraeuz seizlawz bienq ndaej baenzlai labcab lune?

Loz Mingz gig siengj sij faenh baugau he, iugouz diuh dauqbae laj- mbanj aen yozyau haenx, hoeng, doeklaeng de youh mbouj sij —— geij bi gvaqbae, seizneix gizde lij lumj gaxgonq lwi?