Lungzanh Yen Nazdung Cin Dinggyangh Cunh Mbanjdingdenj haenqrengz hwnjguh aenmbanj guh- yiengh cunghab, yienghsiengq aen- mbanj bienqvaq hungloet, ranzranz ndaej youq ranzlaeuz moq, ciengz hau vax mong sieng daengj youq ndaw faex loeg va hom; ciengzgyaeujmax、rangh roeg comzdouh doenghgij yenzsu vwnzva “naz” haenx, gek geij yamq roen couh venj miz aen dem aen daengloengz nding; aen hongh’iq naj ranz laeng ranz ndaem doh gomak byaekheu, yienh’ok ngaeuzndang gaenxgyaek gyoengq vunzmbanj; aen Hagdangz Gungjswj ndaw mbanj, hom saw doh seiqlengq……

Dwen daengz Mbanjdingdenj, gyoijhom cix dwg mbaw “vengq mingzcoh” lwenqde de. “Cungguek gyoijhom daihvuengz”、 Lungzanh Ginhsui Gunghswh dungjswcangj Luz Yicinh dwg vunz aen mbanj neix, de doenggvaq diegdeih riuzcienj youq dangdieg aeu biucinjvaq ndaemganq gyoijhom 8.7 fanh moux, lij byaij ok douguek bae daengz Laujvoh banh hwnj aen gyoijhom gihdi miz 30 fanh moux ndeu. Ginhsui gunghswh hwngfat hoenghvuengh, hawj vunz- mbanj ndaej ndeicawq lairaeuh. Seizneix, Mbanjdingdenj reihnaz gaenq cienzbouh co hawj gunghswh dajndaem, gunghswh byaij diuzroen “rangh guhyiengh + giyez + hozcozse + noengzhoh”, vunzmbanj ndaej ndeicawq haujlai, gawq ndaej miz ngaenzco souhaeuj, youh ndaej bae gunghswh dajgoeng miz ngaenzhong lingx, caiq doenggvaq haifat lijyouz lajmbanj miz faenhoengz, saedyienh moix bi miz sam yiengh souhaeuj, bi 2014 daengx mbanj moix vunz bingzyaenz cinghsouhaeuj miz 15625 maenz.

Mbanjdingdenj depgyawj roen- guek roensengj caeuq gizhaeujok gauhsuz goengloh, gyaudoeng bienh- leih, ndaw mbanj miz 83 ranz 339 vunz, miz reihnaz 3450 moux. “Cibngeih haj” geizgan, ndaw mbanj caepguh aenranz miz funghgwz Bouxcuengh、boiqdauq gunghgung sezsih、cauxguh yienghgingj aensuen heuloeg daengj 35 aen hanghmoeg caeuq hwnjguh gihdi、laeb sezsih lijyouz daengj canjnieb hwngfat 6 aen hanghmoeg, gij hanghmoeg neix dwg giyez roengzngaenz lai, vunzmbanj caezsim okrengz haenqguh, geij bi gvaqbae, gij hongh’iq noengzgya daengj miz aen dem aen ranzlaeuz sam caengz haenx, baizlele daengj- soengz youq song henz roenmbanj, aen caeuq aen doxgek caezcup yinzrwd, ciengz hau vax mong saekyiengh doxdoengz gyaeundei; baihnaj benq ranzlaeuz dwg aen youqndwi vwnzva gvangjcangz gvangq baenz 1.33 gunghgingj haenx, gizneix daengroen sangvid, gofaex heuswd; daj gvangjcangz yawj bae, gizdieg mbouj gyae dwg aen Dinghuz gvangq 12 gunghgingj haenx, raemxhuz sawrwenx, rumz ci raemx fubred; baihswix henz huz dwg benq aen- bungz suenmakit hausak ndeu, baihnaj dwg doenghreih gova hoengz- hoengz henjhenj ndeu, yienh’ok gij yienghsiengq lajmbanj moq vwnzva daegsaek Bouxcuengh naekgywg、 gyaeundei yinxvunz.

Youq Mbanjdingdenj, ndaw aenranz vwnzva “naz”, baij cuengq gak cungj hongdawz dajndaem dajciengx ciuhgonq nungzminz yungh, yienghvunq haeuxnaz cimq ceh doekgyaj ndaem ndai gvej haeux ginggvaq, hawj vunz roxyiuj gij vwnzva dajndaem Bouxcuengh gag miz haenx. Cawz aenranz vwnzva “naz” le, ranzdwkgiuz、daizheiq、gvangjcangz siengqdeu canjrin hung、gvangjcangz vwnzva “naz”, hawj vunzmbanj caeuq hekyouz miz dieg guh’angq; caemh ndaej bae luengqhongh “naz”、giuzndojfwn、giuzutngaeu、giuzdoengzsim cienheu、giuzbingz、diengzseiqgok doenghgij dieggingj neix youzbyaij guhcaemz; hekyouz lij ndaej bae ndaw suen- makdumh、suenmakit doenghgij suenmak neix cimz mak mbaet mak. Hekyouz doenggvaq camgya gak cungj gak yiengh hozdung mizyinx, yawjngonz baijyienh “naz”、dingq gojriuz “naz”、cimz gijgwn “naz”, gamjsouh vwnzva “naz” dangdieg, daejniemh saedceij moq lajmbanj, caemh sim’angq simsoeng roxnyinh youqndwi cwxcaih.