Sai:

Ngoenz haw song ngoenz hoengq,

Mwngz doeng mbouj ndaej youq,

Vunz bouxboux bae louz(liuh),

Mwngz mbouj youq saek seiz.

Mbwk:

Nuengx bau geij aen bo,

Mbouj goq hong mbouj ndaej,

Ndaem mak caiq ciengx gaeq,

Mbouj bae bouxlawz guh?

Sai:

Ngoenz haw song ngoenz hoengq,

Mwngz doeng mbouj ndaej vangq,

Vunz bouxboux bae langh(liuh),

Mwngz mbouj vangq saek seiz.

Mbwk:

Nuengx bau geij aen bo,

Mbouj goq hong mbouj ndaej,

Guenj mak caiq gueng gaeq,

Bouxlawz caez gou guh?

Sai:

Laepda caiq byaengqda,

Couh gvaqbae ngoenz ndeu,

Gij hong guh caengz liux,

Heuh beix bang goj ndaej.

Mbwk:

Ngoenz dang liuh caemh liuh,

Yiuq gij hong daeuj gangj,

Deng ngoenzlawz ndaej vangq,

Yaek langh heuh beix bae.

Sai:

Laepda mbouj byaengqda,

Couh gvaq ciuhvunz ndeu,

Ciuhvunz gvaqbae liux,

Heuh nuengx caemh mbouj haemq.

Mbwk:

Laepda mbouj byaengqda,

Ciuhvunz couh gvaqbae,

Caiq naeuz hong mbouj caez,

Caemh mbouj ndaej caiq guh.

Sai:

Seizgan ngamq rox bae,

Mbouj ndaej caiq doxdauq,

Bouxvunz coz bienq laux,

Mbouj ndaej laux bienq coz.

Mbwk:

Caemh wnggai bae liuh,

Yiuq gij hong daeuj baiz,

Hong mbouj nyaengq geijlai,

Bae langh caiq iu beix.