12 nyied 25 hauh, Namzningz Si Minz- cunghveij、 Namzningz Si Gyauyuzgiz、Namzningz Si Vwnzmingzban、Namzningz Si Minzyijveij、Namzningz Sinhvwnzvangj、Guengjsae Minzcuz Yijvwnz Yozvei itheij youq Namzningz gawjbanh Namzningz Si gaiq daeuz biucinj Vahcuengh doegsaw doxdax.

Baez doxdax neix miz 13 aen daibyaujdui、210 lai boux senjsouj camgya. Doxdax faen baenz cuj vunzdog （cuj cungh siujyoz）、cuj vunzdog（cuj vunzhung）、cujcizdij（cuj cungh siujyoz） caeuq cujcizdij（cuj vunzhung） gungh 4 aen cuj. Gyoengq senjsouj yungh biucinj Vahcuengh gig miz gamjcingz dwk doegsaw, yienh’ok gij gyaeundei Vahcuengh, hawj gyoengq bouxyawj bekfwngz dwddwd. Doeklaeng bingz ok gij it、ngeih、sam daengjciengj 4 aen cuj caeuq ceiqndei cujcizciengj、youhsiu cujcizciengj.

Gyoengq hagseng daj Sanglinz Yienh Vangzcouh Siujyoz daeuj biujyenj ndaej daengz gyoengq bingzveij haenh mbouj dingz. Boux lauxsae cijdauj Vwnh Meijgenh naeuz, de gaengawq gij neiyungz 《Diswjgveih》 sij 《Doegging Angqvauvau》, hagseng youq doegsaw seiz hix rox gij dauhleix guh vunz caeuq guh saeh.

Guengjsae Swhfan Yozyen hagseng Banh Yenniz doeg 《Najriu Doxndei》ndaej cuj vunzdog（cuj vunzhung）it daengjciengj, de gig gikdoengh dwk naeuz:“Baezneix ndaej ciengj, hawj gou engqgya miz saenqsim bae guh gij hong Sawcuengh.”

Cungguek Minzcuz Yijvwnz Fanhyizgiz hoizsaemj Gvanh Swgingh guh diemjbingz naeuz:“Gij fueng’anq caeuq giva baez doxdax neix guh ndaej ciengzsaeq dangqmaz, cezmuz hingzsik moq, neiyungz fungfouq, mizmbangj senjsouj daenj gij buhvaq siujsoq minzcuz hawj vunz gig mizyinx. Aen doxdax neix gawjbanh ndaej baenz, doidoengh hong Sawcuengh Vahcuengh hoenghhwd fazcanj. ”