Mwhhaenx, gwnzmbwn gig lamz, nditndat raeujrub, gocoengz hungloet, dangznaed vannupnup.

Mwhhaenx, raeuz gyaez boeb ruzceij caeuq feihgihceij ndaej saedyienh maqmuengh haenx.

Lauxsae ban gekleiz son yinhyoz gyaeundei youh nienzoiq, banhcujyin dou hozunq youh sienhsoh.

Gij cingzngeih mwhhaenx yungz haeuj gij feih homfwtfwt haetromh, hoeng, siengjmuengh caeuq cingz- gyaez lij ninz youq ndaw fangzhwnz mboujcaengz dauqndiu.

Doeklaeng, mwngz miz le gij mumh nyezheiq, gij byoemndaem de hix lumj gomez nei seizbienh sengmaj.

Gij yienghsiengq mwngz hix miz le gij ginqmaenh nyezrauh, lwgda de hix bienq ndaej lumj rinnyawh nei gyaeundei.

Mwhhaenx, raeuz ndiepmaij fangzhwnzloq cix mbouj maij gangj- vah, angqriu dwk siengsim, yiengh- haenx cinghseuq caeuq gadog.

Mwhhaenx, cienzbouh cungj dwg rongh caeuq ngaeuz youq laj gingq- daeuz huzswnh, gyaeundei caemhcaiq miz maqmuengh.

Hoeng, saedceij byom lai, geh lwgfwngz gvangq lai, baez yaep da raeuz couh majhung lo.

Daengz doeklaeng, raeuz gyavaiq yamqdin, aenvih diuz roen lij raezrangrang, raeuz aeu dwgrengz baenaj.

Yienznaeuz itloh gingjsaek gyaeundei, cix lumz daengx roengz- daeuj bae yawjyawj、 bae ngonzngonz.

Gij doxgaiq mingzcoh heuhguh yienhsaed muz bae le gij limq raeuz, vuenh le yienghceij.

Raeuz mbouj haengjheiq, hoeng cix engq maij riu lo.

Gangj dwk “ngoenzcog caiq raen”, cix gipgip muengzmuengz cienqndang riuj hwnj gij hingzlij bonjfaenh liz bae.

Gatsat,

Ngoenz doek ngoenz, bi dem bi,

Saedceij lumj hujbwz, fung’yo raeuz hwnjdaeuj.

Lij miz byawz dauqma gvaq lwi?

Yawjyawj aen gyausiz youq ndaw laepmomj, yawjyawj aen dan ring- gangq gok haw haenx.

Gij sietdiuz deng daengngoenz gwn bae haenx, gij ndaengndiengq yo haeuj ndaw siengsaenq saek loeg bae haenx, lij miz gij riunyumj raeuz yuengq hwnj byaidin haenx.

Gij duenq gyaeundei raeuz, lij geiq ndaej lwi?

Danghnaeuz lij geiq ndaej, saenq de, caiq lumz bae ba.