Daxgoeng cingq yaek yamq haeuj doudiemq seiz, de sawqmwh dingz din roengzdaeuj: Aen diemq neix cang ndaej gig gyaeundei, ndawranz youh gvangqlangh youh ronghsag; gij daengq congz ndawde ndongqrikrik, ciuq raen vunz bae; ndawde gyoengqvunz daeuj gwn doxgaiq, bouxboux daenj ndei daenj luemj.

Daxgoeng yawjyawj gij buhvaq swhgeij, cienqndang gvaqdaeuj doiq daxbuz naeuz: “Yahgeq, raeuz bae gizwnq gwn ba!”

“Gaenq byaij daengz gizneix lo, couh youq neix gwn ba.” Daxbuz naeuz.

Daxgoeng mbouj ndaej mbouj yamq haeujbae. Gyoengq youq ndawdiemq gwn doxgaiq, bouxboux cim coh daxgoeng, yawj daxgoeng lumj yawj duzgvaiq nei, ronghda lingh- yiengh raixcaix. Daxgoeng mbouj leix mbouj langh gijneix, cigsoh byaij daengz gvihdaiz, cawx ndaej aen binghgizlinz cienq ndang couh byaij- deuz lo. Lumjbaenz de youq ndaw caiq nanz di, aendiemq gyaeundei neix couh uq nei.

Daxgoeng ndenq binghgizlinz hawj daxbuz, couh youq henz ndang de naengh roengzdaeuj. Daxbuz linx riz binghgizlinz, riz mbat ndeu, baenq mbat ndeu, gwn ndaej feihsubsub. Daxbuz dawz binghgizlinz ndenq daengz henz bak daxgoeng geij baez, heuh de riz, daxgoeng ngauzngauz gyaeuj naeuz mbouj gwn, cijdwg haeujsim riunyumj dwk yawj daxbuz gwn.

“Daxgoeng daxbuz, sou baenz- lawz mbouj haeuj ndaw diemq bae naengh ha?” Boux mehmbwk cung- nienz ndeu ndwn youq baihlaeng song laux cam, de dwg boux baet ranz uet congz ndaw diemq.

Daxgoeng ngeuxgyaeuj dauq yawj de naeuz:“Dou youq neix naengh couh baenz lo.”

Daxgoeng baez yawjraen gaiq dohbaj gyangfwngz mehmbwk cung- nienz haenx, vuengmuengz ndwn hwnj, naeuz:“Dou dwg mbouj dwg dangj mwngz guh hong lo?”

Mehmbwk cungnienz naeuz:“Mbouj dwg mbouj dwg. Ndaw diemq miz gunghdiuz, liengz di, sou haeuj- bae naengh ba!”

“Mbouj lo, youq neix naengh couh ndaej ne.” Daxgoeng miz di mbouj ndei eiqseiq naeuz.

Daxbuz hix riengz coenzgangj daxgoeng naeuz mbouj haeujbae, doeklaeng laebdaeb riz binghgizlinz gyangfwngz, daxgoeng lij dwg haeuj- sim yawj daxbuz gwn.

“Daxgoeng, mwngz vihmaz mbouj gwn binghgizlinz ha?” Mehmbwk cungnienz cam.

“Goenggeq sij mbouj ndaej gwn.” Daxbuz bak raeuzred dwk naeuz.

“Mbouj dwg baenzneix gangj. Cungj doxgaiq neix gyoet lai, heuj gou nyaenx mbouj ndaej.” Daxgoeng gejnaeuz.

Hoeng mehmbwk cungnienz mingzmingz yawjraen hozgyawh dax- goeng nod hwnj nod roengz. De byaij haeuj ndaw diemq bae.

“Binghgizlinz hix dimz mbouj ndaej aen bak mwngz!” Daxgoeng gvaiq daxbuz bak lai.

Daxbuz cix riuhehe naeuz:“Mbouj dwg a? Mwngz couhdwg sij mbouj ndaej gwn!”

Yaep ndeu, mehmbwk cungnienz haenx daeuj daengz dangqnaj dax- goeng naeuz:“Daxgoeng, cawjdiemq raen gou guh hong lae hanh lai, soengq hawj gou aen binghgizlinz ndeu. Gou gaenq gwn ywdwgliengz, 30 faen cung ndawde mbouj ndaej gwn gij doxgaiq gyoet, mwngz bang gou gwn ba, mboujnex de yungz le hojsik ha.”

Daxgoeng mbouj ndei eiqseiq muengz naeuz mbouj aeu, hoeng mehmbwk cungnienz nyengh hawj de. Daxbuz hix naeuz:“Yungz le saedcaih hojsik, gij doxgaiq gwn mbouj ndaej sai bw.” Mbatneix daxgoeng mbouj caiq euq lo, docih mehmbwk cungnienz geij baez, de cij ciep aeu aen binghgizlinz.

Daxgoeng gwn bingzgizlinz mbouj lumj daxbuz yiengh haenx riz aeu, de baenz amq baenz amq haeb gwn, lienz gij mumh gwnz bak hix nem binghgizlinz, daxbuz raen le nyaenx mbouj ndaej riu hwnjdaeuj, seizneix daxgoeng cij roxnyinh gij yiengh gwn swhgeij diuqgah lai, de hix riuhehe gaij najmong.

Mbouj rox seizlawz, mehmbwk cungnienz laeglemx byaij deuz……

Gwn sat binghgizlinz le, songde mwngz bang gou uet mbat bak ndeu, gou bang mwngz uet bak mbat he, doengzcaez ndwn hwnj, daxgoeng fwngz ndeu gaem fwngz daxbuz, fwngz ndeu rag ci, laebdaeb hwnj roen lo.

Byaij gvaq aen vangoz ndeu, cienz daeuj raq sing ciengqgo he, laxlawz miz boux ga’gvez ndeu youq henz gai ciengqgo. De ciengq ndaej haemq ndei, hoeng gij vunz baebae dauqdauq, lumj