Bineix doxdaeuj, Duh’anh Minz- yijgiz engq yawjnaek hong yingjsi vah siujsoq minzcuz, gaenxmaenx boiqhab yen gvangjden cungsim caeuq yen denyingj gunghswh guh ndei hong gamyawj dungdai boqcuengq denyingj Vahcuengh caeuq boqcuengq fanhoiz denyingj Vahcuengh. Duh’anh Minz- yijgiz daj bineix ndwen 7 cujciz daengxcungq ganbu faen baenz 5 aen cuj bae daengz daengx yienh 19 aen yanghcin 239 aen mbanj、 segih haiguh denyingj roengz mbanj cam gienj diucaz, cazcam vunzlai lajmbanj doiq roxyiuj denyingj Vahcuengh、 baenzlawz doigvangq ndei denyingj Vahcuengh、 doiq lajmbanj vut gungz doidoengh cozyung daengj. Doengzseiz ciuq 《Faenhsaw Swcigih Minzyijveij Fanh- yizcu Gvendaengz Gveihfan Si Yienh Denyingj Vah Minzcuz Roengz Mbanj Hozdung Guenjleix》 vwnzgen iugouz, aeu daengxcungq ganbu faen baenz 5 aen siujcuj riengz boux cuengq denyingj bae gak yanghcin gak mbanj haiguh denyingj Vahcuengh senhconz、 boqcuengq caeuq dukcaz sonyinx.

Bi 2016 Duh’anh Yauzcuz Swciyen guhsat hong fanhoiz denyingj Vahcuengh 《Guekgya Fwnrumz》《Canlangz》 daengj benqgojgaeq 8 bouh caeuq 《Gyonjgyoeb Cingjceih Vanzging Lajmbanj》《Gyu Noix Hoh Ndang- cangq》 daengj benqgohgyau 9 bouh gungh 17 bouh, seizneix gaenq youq daengx yienh 239 aen hingzcwngcunh 310 aen diemj cuengqingj, boqcuengq denyingj Vahcuengh 1822 ciengz, bouxyawj daengz 12 fanh vunzbaez, Denyingj boqcuengq ciengzbaez caeuq bi 2015 beij demhwnj 5.93%, denyingj Vahcuengh roengz mbanj yied daeuj yied ndaejdaengz vunzlai lajmbanj haengjgyaez, vih daengx yienh hong cingcinj vut gungz daezhawj gohgi vwnzva cengjdingj.

(Veiz Vunhlingz)