Youq gij roensuijniz bingz- bwd seuqcingh ndaw Cazgwnh Cunh cetbyaij, yawj haeuj lwgda haenx cix dwg aen haw nungzmou ndaetfwdfwd、aen cauhsi doxgaiq lai cungj lai yiengh baij rimmwd、aen ciheiq goenggungh dingz youq henz roen deq hek yaek hai、bouqlienznangq gai yw、diemq gai soujgih gyaungaenz haenx, nauh- yied hoenghhwd. Danghnaeuz mbouj miz gij suenmak laeng ranz caeuq benq nazreih henz mbanj yap haeuj da, vunz lij laihnaeuz dwg youq ndaw gai hawsingz cetyouz ne.

Cazgwnh Cunh dieg youq Yilinz Si Bozbwz Yen Ginggouj Cin, daengx cunh 1463 ranz 7129 vunz. Aen cunh neix dwg cunh guhyiengh sawqdiemj hwnjguh lajmbanj moq, bi 2008 aeundaej mingzdaeuz ndei gaiq daih’it “Guengjsae Cib Daih Aenmbanj Rengzhoengh” swnjcienz vwnzva ciengj. Lai bi gvaqdaeuj, cunh- veijvei aen mbanj neix doenggvaq cujciz caeuq hemqheuh vunzlai ok ngaenz ok rengz, gonqlaeng bu roen suijniz ndaw mbanj 17.5 goengleix, baenz ndaw yienh aen cunh daih’it mbanjmbanj doeng roen suijniz; youh gonqlaeng comz ngaenz 150 fanh lai maenz, guh baenz le laeuzbanhgoeng、youwzyenz、hawciengz nungzmou、vunzlaux hozdung cungsim、ranz moq vujbauj、nungzminz vwnzva gvangjcangz、ranzsaw、denswj sinsizcan doenghgij ciengzdieg neix, hawj vunzmbanj saedceij yied gvaq yied vuenyungz.

Cazgwnh Cunh gaenxmaenx hwngfat swnghcanj, gonqlaeng laebbaenz le ciengx mou、ciengx bya、ciengx fw’gvi、suijli、caujgi caeuq byaekdoeng doenghgij bouxguhnaz ciennieb doxdap cujciz neix, hwngfat cungj ginghci baenqgvax haenx. Seizneix, daengx cunh miz Duhfazgoz dajndaem gihdi caeuq maenz- doengzlingz dajndaem gihdi, miz 102 aen ciengzciengxmou ciengx mou 100 duz doxhwnj, ciengz- ciengxgaeq 28 aen, bouq siulaeuj gailaeuj 62 aen, guh baenz cungj canjyez daegsaek gig ndei aeu Duhfazgoz、maenzdoengzlingz、gaeqhenj、duzfw duzgvi、duzmou nohcing lai doenghgij hongsaeh dajndaem dajciengx neix guhcawj, aeu siulaeuj、dajcaep、dizcauh、daehyinh、dajsan、okrog dajgoeng doenghgij hongsaeh neix guhbouj ndeu, vunzmbanj souhaeuj bi beij bi lai.

Cazgwnh Cunh saedhengz minzcuj guenjleix, cunhveij ganbu youz vunzlai daeuzbiuq senj, minzcuj gamduk hongsaeh ndaw cunh, saedyienh “it saeh it yaeng”, vunzmbanj banh saeh mbouj ok mbanj; cunhveij cujciz vunzmbanj guh gak cungj gak yiengh vwnzdij hozdung, hawj vwnzva swnghhoz vunzmbanj lai cungj lai yiengh, baenzneix mbouj caiq bae guhdoj doxdub、guh funghgen mizsin, cungj heiq ndei vwnzmingz bi beij bi noengznwd. Ndaw cunh laebbaenz le aendoih vwnzyi caeuq aendoih foux saeceij foux lungz, moix bi gag youq ndaw mbanj banh “vanjvei caezangq ndwencieng”, youz gyoengqvunz ndaw mbanj yienj gij heiq caij- caz、moegyou、maxfaex、ruzhawq、roixdaeng doenghgij cietmoeg vwnzyi miz daegsaek lajmbanj neix, doengzseiz lij banh foux lungz foux saeceij、dwk lanzgiuz、sij cih mauzbit veh veh doxdax doenghgij hozdung neix, hawj ngoenzciet vunzmbanj dem angq- yangz.

Gyawj geij bi neix daeuj, vunz Cazgwnh Cunh yienznaeuz baenz fouq lo hoeng siengjfap moq caemh mbouj noix, gyoengq vunzmbanj doenggvaq gij hingzsik haeujguj comz ngaenz hwngfat nungz- gyahloz, hwnjguh le aen swnghdai vwnzvayenz ndeu, daiqdoengh hong lijyouz hwngfat, yinx vunz hawsingz bae ndaw mbanj gvaq ngoenzgyaj, yawj gingjsaek laj- mbanj cimz gijgwn haekfeih lajmbanj, dawz gij suijbingz saedceij vunzmbanj youh doi hwnj le mbaeklae moq.