【Vah bouxbien】Bineix cib nyied, Sam Nyied Sam Cazcise cungjbenhciz Cinz Siengzcouh caeuq Veiz Suzyingh、Cangh Binz、Moz Vei 4 boux Guengjsae beixnuengx bae Meijgoz lijyouz. Meijciz vazyin Cai Beizgangh sienseng caeuq Vangz Yinzmeij bouxmbwk rox le，iucingj gyoengqde bae camgya angqhoh Meij- goz Vanswnghcez hozdung. 10 nyied 30 hauh doxraen ngoenzhaenx, mbwn doek fwn hung, vunzlai haeuj Niujyoz Lozgwzfeihlwz daihlaeuz bae ndoj fwn, gyoengq beixnuengx youq gizhaenx doxraen le, bouxboux gikdoengh raix- caix, gaem fwngz、doxgot、eufwen、diuqfoux、doxsoengq laex iq, sim’angq fouzbeij, vuenheij dangqmaz. Youq gij ndwenngoenz daegbied nanzlumz neix, Cai Beizgangh sienseng gonq- laeng eu haujlai fwen, geiqloeg gienh saeh gyoengq beixnuengx youq Niujyoz doxraennaj neix, fwen ndei caensaed, cingzngeih naekna, gig gamjdoengh vunz. Seizneix, dou genj aeu mbangj ndeu, daeng hawj gyoengq beixnuengx bouxdoeg raeuz caez yawj.

Angqcoux gyoengq beixnuengx,

Guengjsae daeuj cunz gou;

Simhai lumj va’ngaeux,

Diuqfoux caiq eufwen.

Sou daj Guengjsae daeuj,

Gou vuenheij dangqmaz;

Cingj vaiq naengh roengzma,

Menh gwn caz gangjgoj.

Coux sou youq bi moq,

Ndawsim doq hai va;

Comz Niujyoz lona,

Daihgya angq eufwen.

Sim’angq eu fwen gok,

Doxgot angq doxnyangz;

Niujyoz coux laujyangh,

Gyoengqsou Guengjsae daeuj.

“Lozgwzfeihlwz” neix,

Daihlaeuz ceiq mizmingz;

Mbangj baez souj miz bing,

Cingqcaen hoj haeujbae.

Mbwn rub doek fwn hung,

Laeuz hai cung haeujbae;

Deq daengz mbwn rongh caez,

Caiq okbae youzhingz.

Ndwn ndwi mbwq fouzbeij,

Gou caeuq gyoengq beixnuengx;

Eu hwnj fwen Bouxcuengh,

Muengh daihgyah vuenheij.

Miz guekrog(laujvai) sam dah,

Camgya daeuj diuqfoux;

Gikcingz youq simdaeuz,

Fwen foux engq doenghvunz.

Gyoengq bouxdingq simmaez，

Caez dopfwngz louzingj；

Haenh Fwencuengh ndeidingq，

Faengzfoux cingsaenz lai.

Gou doxgot boux haenx，

Caencingq daihmingzdangz；

Guengjsae sanhgohvangz，

《Sam Nyied Sam》cungjbenh.

De heuh Cinz Siengzcouh,

Caeuq gou lumj beixnuengx;

De Doenglanz Bouxcuengh,

Gou Bouxgun Namzningz.

Vanswngcez daeuj daengz,

Muengh baengzyoux sim’angq;

Baez ok dou bungz “fangz”,

Dwg vunz cang gaej lau.

Haetneix biek Sinhcouh(Niujyoz),

Youh byaij hwnj roen moq;

Soengq cukfuk lono,

Sou itloh bingzan.

Bae cunz singz mizmingz,

Yawj doh gingjsaek ndei;

Sou baenzlawz vuenheij,

Ndaejgeiq naeuz gou nyi.

Ranz caengz rongh couh singj,

Siengj beixnuengx simmaez;

Sou yied byaij yied gyae,

Gou seiqseiz gvaqniemh.

Soengq beixnuengx baema，

Raemxda roengzveivei；

Rumz ci gvaq byaifaex，

Ngoenz maz caiq doxnyangz?

Soengq beixnuengx baema,

Raemxda roengzbyoegbyoeg;

Lumj vunz dai lwgdog,

Yawj gokgok cungj fwz.

Soengq beixnuengx baema,

Raemxda roengzriri;

Biek dai dauq ndaej sij,

Biek lix daiq gannanz.

Soengq beixnuengx baema,

Raemxda roengzrere;

Lumj vaizlwg biek meh,

Cingznyienh gvej hoz dai.

Caeuq beixnuengx doxbiek,

Simcieg uet raemxda;

Cingznyienh bienq duzmbaj,

Riengz sou ma Guengjsae.

Raezrangh 60 bi ,

Gaem bit sij Sawcuengh;

Vanzlij angq eufwen,

Simvuen gvaq ndwenngoenz.