12 nyied 18 hauh banhaemh, Gvangjsih Minzcuz Dayoz gaiq daeuz siujsoq minzcuz vahgangj vwnzyoz conhyez doegsaw doxdax youq daihhagseng hozdung cungsim aen hagdangz neix banh. 23 boux hagseng siujsoq minzcuz vwnzyoz conhyez aen hagdangz neix camgya baez doxdax neix.

Doxdax yienhciengz, gyoengq senjsouj saenqsim rimrwd, raeuzrwd doeg sei Cuengh、 sei Yauz. Baez doxdax neix doeg le haujlai bien sei, miz 《Haenh Sienghswhhuz》《Miz Mbangj Vunz》《Cin》《Daxmeh Lajmbwn》 daengj faenzcieng gig miz daegsaek Cuengh Yauz haenx, gyoengq senjsouj yungh vah minzcuz raeuzrwd haenx yienh’ok gij yinxdaeuz Vahcuengh、 Vahyauz, langhbaij le gij cingsaenz yienghsiengq hagseng siujsoq minzcuz vahgangj vwnzyoz conhyez gaenxmaenx doxhwnj.

Ginggvaq gyoengq bingzveij yienhciengz bingzsaemj, Lij Yuzyinh ndaej itdaengjciengj, Veiz Gvanghveih、 Vangz Sihyiz daengj ndaej ngeihdaengjciengj, Liengz Funghgwz、 Veiz Haijsanh、 Vangz Sinhyingj、 Loz Diyungz daengj ndaej samdaengjciengj.

Doxdax sat le, boux senjsouj camgya doxdax Lij Yuzyinh naeuz: “Vih baez doxdax neix, doxdax gonq guh le haujlai hong, bingzciengz leihyungh seiz mbouj hwnjdangz lienh doeg saw, ndaej ciengj cawz le bonjfaenh gag roengzrengz, lij liz mbouj hai siujsoq minzcuz vahgangj vwnzyoz conhyez Luz Yungjbinh lauxsae roengzsim sonyinx.”

Guengjsae Sam Nyied Sam Cazcise cungj- benh Cinz Siengzcouh guh diemjbingz naeuz: “Seizneix, vunzcaiz saw vah siujsoq minzcuz giep- noix, maqmuengh gyoengq hagseng roengzrengz hag ndei conhyez cihsiz, daezsang conhyez gyoebgyonj suciz, daezsang suijbingz yungh saw vah minzcuz.”( 黄焕亮 梁峰阁 蓝 盛)