Bi 1977, daengx guek hoizfuk gauhgauj lo. Bihaenx, Daeglig ndaej 22 bi, de gauhgauj doekbuengj le couh ceng faen dued miux yawj saw 12 ndwen. Bi 1978, de gauj hwnj aen dayoz mingzbaiz ndeu. Daeglig dwg duzfungh daj Mbanjcuengh luegbya mbin okdaeuj ndeu, gyoengqvunz doiq de gig hozhaenz.

Dayoz bizyez, Daeglig dang hak lo, gvaqlaeng, yied guh guen yied hung.

Bihaenx, miz ngoenz ndeu, Daeglig daiq yah gyaeu de hai Cibaujmaj dauq ranzmbanj gvaqcieng. Ci hwnj mbouj ndaej lohbya, cijndei dingz youq gwnz haw aen ranz baengzyoux ndeu. Daeggo Daeglig daiq lwgnyez de gaenq ndaej 10 bi bae haw ciep daegnuengx.

Seizhaenx, gwnz haw miz dingzlai vunz comz daeuj yawj Daeglig gvanbaz. Daeglig dawz ien Cunghvaz baiz okdaeuj baen hawj caezgya, roxnaj mbouj roxnaj, de cungj faen hawj boux vunz ci ien ndeu. Daeglig baen song bau ien sat, couh daj gyaeujvaq dawz “Dagoh da” okdaeuj dwk. De naeuz:“Vei, lauxdoengz, ngoenzneix 11 diemj cung mwngz bae ranz gou……” Daeglig iet fwngzswix hwnjdaeuj yawj soujbyauj gim de, youh naeuz:“Seizneix 10 diemj lo, mwngz itdingh ciuqseiz daeuj, daengzceiz gou couh aeu dik mwngz.” Daeglig doq gangj doq yo din’gvaz hwnjdaeuj coh ndaek rin 2 cik sang dik bae. Miz geij yah coz youq henz yawj le naeuz:“Meh ha, cungj dwg mingzbaiz bw……” Daeglig laebdaeb dwk denva naeuz:“Gvaq 11 diemj mwngz mbouj daengz, gou lij dub heuj mwngz doek bae……”Daeglig fwngzswix gaem gienz aj bak guh yiengh dub heuj. Gyoengqvunz raen songbaiz heuj de sieng gim, haujlai vunz doeksaet, caezsing “cigcig” haenh mbouj dingz bae. Seizneix, daeglwg go de ndaej 10 bi bae doiq Daeglig naeuz:“Daxau, gaej gangj baenzlai lo, baema ranz gonq.” Daeglig umj Daeglwg go de hwnjdaeuj cup gemj de mbat ndeu, naeuz:“Ndei, raeuz couh baema ranz.” “Died- died……” Seiz yaek byaij, baengz- youx Daeglig daj ndaw ranz gaex aen mohdozceh gaeuq ndeu okdaeuj doiq Daeglig naeuz:“Ci gou mbouj miz youz lo, cingj daj gwnz ci mwngz hai di giyouz hawj gou.” “Ndaej, mwngz ndwn yaep he gonq.” Daeglig cuengq daeglwg go de roengzdaeuj couh bae hai youz, baengzyoux de aeu aen doengj daeuj daix, ndaej geij swngh giyouz couh dawz bae guenq ci de lo.

Dauq ranzcoj le, gwn haeux gvaq, caezgya youq laj gorungz guhcaemz. Daeglan naengh gwnz song ga Daeglig cam naeuz:“Daxau, haxbaenh youq gwnz haw mwngz vihmaz hai giyouz hawj vunzwnq?” “Daeglan, mbouj miz saeh, ci dwg ci daxau, giyouz dwg cienz goenggya cawx bw.” “Caezgya caemh haenh gwnzndang mwngz maz cungj dwg mingzbaiz. Hoeng mwngz miz yiengh ndeu mbouj dwg mingz- baiz.” “Mwngz gangjgangj, gou miz maz mbouj dwg mingzbaiz? Geu buh neix 800 maenz, geu vaq neix 1000 maenz bw.” Daeglan riu naeuz:“Ukgyaeuj daxau mbouj dwg ‘mingzbaiz’, mwngz gig simndei baen giyouz goenggya hawj baengzyoux, hoeng daxgoeng daxbuz lij youq ranznamh, mwngz guh aen ranzlaeuz moq ndeu hawj bohmeh mbouj ndaej ma?” Gyoengqvunz dingq le, cungj riu hwnjdaeuj, caemh sing naeuz:“Deng bw, ukgyaeuj hix dwg mingzbaiz cij ndei bw!” Daeglig dingq le, naj hoengz rwz dit. Daxsauj Daeglig muengz naeuz:“Daeglwg lij iq luenh gangjvah, caezgya gaej geiq haeuj ndawsim bae!”

Gvaq ndaej bi he, daeglan Daeglig caeuq goengbuz daengx ranz vunz buen haeuj ndaw mbanj daih’it aen ranzlaeuz moq bae youq lo. Daeglan Daeglig riu naeuz:“Seizneix ukgyaeuj daxau hix dwg ‘mingzbaiz’ lobw!” Caezgya dingq le riuhehe hwnjdaeuj.