Daengngoenz yaek doek bya lo, ronghndit ingj ndaej bienmbwn hoengzsadsad. Gwnz gai gij vunz bae- dauq gak boux gag gipgip muengz- muengz ganjroen.

Aen “heiqgiuz” hau hung lumj aen mbung ndeu youq gwnz gai biu hwnj, “heiqgiuz” menhmenh yiengq baihnaj biu bae, yawj hwnjdaeuj lumj siengj biu vaiq di hix vaiq mbouj ndaej ne. Ndaw “heiqgiuz” aemq rim gak cungj hunghung iqiq bingzsuliu. Aen “giuz” hung neix yienznaeuz mbouj naek, hoeng hung gvaqbouh, hawj boux aemq haenx goemz dwk mbouj raen gyaeuj mbouj raen din, youq baihlaeng yawj, aen “heiqgiuz” neix lumjbaenz gag biu nei.

Boux aemq “heiqgiuz” dwg daxbuz 70 lai bi ndeu. De din daenj gaijfanghaiz, buhvaq dwg baengzdoj, gaeuq lai yawj mbouj ok hainduj dwg saek maz. Buhgaet daep youq lajeiq, gig habndang.

Daxbuz ndang daemq iq, gij nyaeuq gwnz naj de vangvang raehraeh, yienghsiengq unqswnh. Gij byoemhau iqet de heux youq laenggyaeuj, miz di cabluenh. Daxbuz ngaemgyaeuj dwk aemq “heiqgiuz” byaij roen, gyaeuj de ngaem ndaej gig daemq, “heiqgiuz” yaek moekdimz de caez.

Gaenlaeng boux daxbuz neix byaij dwg boux daxgoeng laux doxdoengz he. De din hix daenj gaijfanghaiz, buhvaq hix dwg baengzdoj, geu buh miz 4 aen daenh, cungj dwg buh gaeuq vaq gaeuq. Ndang de haemq sang, naj fonxndaem, gij nyaeuq gwnz naj de lumj aen muengx nei, gwnz gyaeuj de byoemhau lai gvaq byoemfonx, yawj hwnjdaeuj de dwg bouxvunz lauxsaed ndeu.

Daxgoeng rag aen cifaexbenj iq ndeu, gwnz ci cang di saw gaeuq ceij gaeuq, lij miz di lanh diet lanh doengz dem. De mbouj vaiq mbouj menh dwk gaenlaeng daxbuz byaij, seiz mbouj seiz dingz roengzdaeuj gip gij ceij gij bingzbingz guenqguenq gwnz gai.

Youq aen nienzdaih seizhwng neix, gij buhvaq gaeuqgeq daxbuz daxgoeng haenx noix raen lo. Gij buh najaek gyoengqde miz di uq, lauheiq dwg gij nyapnyaj loengh baenz bw.

Song bouxgeq boux gonq boux laeng byaij haeuj ndaw diemq sou doxgaiq gaeuq rwix haenx, boux cawjdiemq baez raen daxbuz, couh dingz gij hong de cingq guh, gipmuengz gvaqdaeuj bang daxbuz dawz aen “heiqgiuz” de aemq cuengq roengz coq gwnzdieg. Seizneix daxbuz mbouj gangj coenz vah lawz, cijdwg yiengq cawjdiemq riunyumnyum. Coh aen doengjraemx henz bakdou diemq byaij gvaqbae, de mbouj cingj couh gag ndoet cenj raemx ndeu, lij dawz cenj raemx he daeuj hawj daxgoeng gwn dem.

Cawjdiemq suglienh dwk caengh gij doxgaiq songlaux, yaep ndeu couh ndenq 35 maenz ngaenz hawj daxgoeng. Gyoengqde mbouj gangj gyaqcienz, hix mbouj cam miz geijlai gaen, lumjbaenz gak boux ndawsim gag miz soq nei. Cawjdiemq ndenq cienz hawj daxgoeng seiz naeuz:“Daxgoeng daxbuz, sou youq neix gwn caeuz cij ma ba!” Song boux laux naeuz:“Mbouj lo, docih mwngz lo!”

Daxgoeng dawz cienz cuengq roengz daehvaq yo ndei le, de fwngz ndeu gaem fwngz daxbuz, fwngz ndeu rag cifaexbenj hwnj roen lo.

Songde yienznaeuz byaij ndaej gig numq, hoeng mbouj miz saek di saemxsax. Itloh daeuj, baez raen gij doxgaiq rwix baenz gai aeu cienz, songde cungj dingz roengzdaeuj gip.

Loh gvaq aendiemq Gwnjdwzgih ndeu, daxbuz naeuz: