Haujlai vunz cungj rox Namz- ningz——Vujmingz Goengloh duenh Ganhhih miz aen mbanj gyaeundei ndeu heuhguh Mbanjnazvang, dwg Vujmingz Gih Ganhhih Cin Dazdung Cunh aen mbanj ndeu, gizde miz aen fai hung ndeu heuh Nazvangz Suijgu caeuq goengq bya ndeu heuh Byalouzloeg, dakdaengh aen Mbanjnazvang ciengz hau vax nding、gofaex raemhrwd neix engq gyaeundei engq yinx vunz.

Mbanjnazvang bya heu raemx saw, gingjsaek gyaeundei lumj veh. Byaij haeuj ndaw mbanj, yiengh mbanj gyaeundei yinx vunz, song henz roenmbanj gofaex raemhrwd, luengqhongh seuqcingh, gij ranzlaeuz moq dep raemx hwnjguh haenx, baizle yinzrwd, gvangqyub ronghcangx；diuz roensuijniz hopngomx aenmbanj haenx ngutngeuj iet bae gyae, aen suijgu henz mbanj aenfai sangloet mienhraemx gvangqmiengx caemdingh, hawj vunz simhaenz. Gizneix miz raemx lai, gwnz bo miz aen “Miuhgoekraemx” ndeu, dwg gizdieg beixnuengx Bouxcuengh Dazdung Cunh caeuq benq Ganhhih baiqcaeq ndeu. Aen miuh gaeuqgeq neix ndaej heuhguh “Miuhgoekraemx” dwg aenvih aende guh youq giz goekraemx Dahgojli Namzningz, caiqlij bakdah Dahgojli Namzningz couhdwg dieggaeuq ciuhgeq Senhva Cin Namzningz, dwg goek vwnzva caeuq goek caizfouq Namzningz. Bi 2010, ndaej gij cienzngaenz gaep baihgwnz yiengh singzmbanj cunghab cingjceih gunghcwngz bangbouj, ndaw mbanj gag comz ngaenz 3.1 fanh maenz, guhbaenz hong yiengh mbanj cingjceih, guh ndaej gvangjcangz、daizheiq、lanzgiuzcangz doenghgij dieg hozdung neix, aenmbanj bienq ndaej moqsag lwenqda. Bi 2011 nienzdaej, ndaw yienh bang aen mbanj neix yinxhaeuj Ciuhcauz Cizdonz Gunghswh haifat lungzsanh veihuz swnghdaiyenz lijyouz hangh- moeg, gyonjgyoeb roengzngaenz 5 ik maenz, dawz ranghdieg Mbanjnazvang guhbaenz dieg gyoebcomz lijyouz youqndwi ciengxndang comz miz bya heu raemx saw doenghnaz ndeiyawj, ndaej yawj gingj、youqndwi、ciengxndang、lienhndang、gvaq ngoenzgyaj、camgya guh、haihoih、youqninz lai cungj lai yiengh neix, caiqlij hawj gij yienghgaeuq swnghdai mbouj deng buqvaih, cunghab lijyouz fuzvu binjciz haemq ndei ndeu, hawj vunzmbanj “Ndaw mbanj rog yienh cungj ndaej dajgoeng, saedceij vunzmbanj engq hoenghvuengh”. Geij bi gvaqdaeuj, vunzlai aen mbanj neix saedceij fatseng le mbwn fan deih boek bienqvaq, vunzmbanj baengh gij ndei depgyawj Namzningz, mbeilaux dwk byaij ok rog bya guh seng’eiq banh giyez, aeu aen uk coengmingz caeuq song faj fwngz gaenxgyaek de cauxguh saedceij moq bonjfaenh, ndaej baenz Vujmingz aen mbanj haemq fouqmiz ndawde aen ndeu.

Gyoengq vunzmbanj Mbanjnazvang baenz fouq le engq ndiepgyaez ranzmbanj caeuq vwnzva minzcuz bonjfaenh, bingzciengz ndaejhoengq couh banh eu fwen yienjheiq caeuq dwk lanzgiuz doxdax doenghgij hozdung nauhyied neix. Moix bi liggaeuq ndwengouj ngeihsam dwg miuhhoih Miuhgoekraemx mizmingz neix, gij vunzmbanj ndaw mbanj nem mbanj gaenhlaenz baenz fanh vunz cungj comz daengz naj miuh guh baiqcaeq caeuq gak cungj vwnzdij hozdung, foux saeceij foux lungz、 mbauqsau doiq fwen、yienj heiq Begvah、 lanzgiuz doxdax, ciengz dem ciengz, yiengh youh yiengh, nauhyied hoenghhwd, yinx haujlai hekyouz bae caenx ra angqyangz.