Roeghau hau lumj nae,

Dahsau gyaez henz dah.

Doiqnaj miz vunz caj,

Yienghneix daj doxraen.

Naj dahsau hauseuq,

Vunz youh reux baenzlai.

Fwngz dawz goenh nyomx raiz,

Byoem ndaem raez baek baeh.

Daegmbauq got va gouz,

Caez haeuj dou yienzfaenh.

Caencingz muengh sau saenq,

Ndawsim caenh dwg cingz.

Dahsau ngoenzhaemh naemj,

Mbauq youh raemh gangj iu.

Bawxmoq haq najriu,

Gvanbaz niu lumj souh.

Roeghau hau lumj haeux,

Bawxmoq daeuj daengz ranz.

Vunz gaenx hoeng soujnanz.

Miz meh manz gyanh haep.

Bawxmoq daemj man maenh,

Meh hongz mbaenq neix yaez.

Swnh neix naeuz dauqbae,

Raemxda yaek lae naj.

Mehbuz seiqseiz hongz,

Hawj bawx song ngaenzceij.

“Mwngz bae lwg gaej geiq,

Yienghneix leih vuenh vunz.”

Bawx bae lwnh gvan dingq,

“Gou daeng gingq meh raeuz.

Hoeng meh doiq gou caeuz,

Siengj mwngz aeu yahnoix.”

Roeghau hau lumj fwj,

Bouxsai gwq naeuz de.

“Meh ndat aeu swnh de,

Mwngz siengj ce couh dingq.”

Bawxmoq fouz vunz bang,

Seizneix dang bawx iq.

Bawx neix baenzlawz dij,

Bouxsai lij noix ndiep.

Bawxmoq youh fatyienh,

Bouxsai lienh sau moq.

Simlai mbouj sim’onj,

Bienq sim doq mbwq bawx.

“Mwngz nyinh mbouj nyinh loeng,

Raeuz couh doengsae byaij.

Mbouj nyienh haq ranz vaih,

Gag dauq baihgyae bae.”