Miz cungj cizyez ndei ndeu dwg lauxsae; miz dauh gingjsaek gyaeu ndeu dwg hoenz lauxsae; miz cungj cingzgamj ndeu dwg aencingz lauxsae caeuq hagseng.

Lauxsae son gou rox saw, yinx gou laeb aen lijsiengj hung, son gou hag rox vwnzmingz roxsoq, son- gyauq gou baenz boux sausenhdui ndei ndeu, itcig daengz seizneix okdaeuj guh hong gaenq 30 bi le. Gwnz gyaeuj lauxsae byoem hau ngoenz beij ngoenz lai, moix baez yawj raen byoem hau lauxsae gou, ndawsim gou engq boiqfug lauxsae gou. Lauxsae gou gyaez gou lumj lwg caen de nei.

Miz baez ndeu, gou baenzbingh geij ngoenz mbouj ndaej bae hagdangz, seizhaenx gou ngamq doeg daengz seiq nienzgaep, lauxsae gou cuengqhag liux lij hawj gou boujgoq, hawj aen cwngzciz gou mbouj doek roengzdaeuj. Gyo’mbaiq lauxsae gou lai lo.

Lauxsae gou guh cungj hong neix gaenq 30 lai bi, geijcib bi gvaqdaeuj, gyangngoenz de hwnj- dangz, gyanghaemh de bwh goq, gaij cozyez daengz byonghhwnz, ciengz- seiz baeg dangqmaz, lwgda de va caez. De gig gyaez aen hong de, doiq aen hong de baenzneix nyinhcaen fucwz, gyaez hagseng de lumj lwg bonjfaenh, cungj lau hagseng de hag mbouj ndaej cihsiz, aeu rengz daengx ndang bae son, haeujsim hagseng bouxlawz ndangdaej mbouj ndei, cungj rox daezsingj gyoengqde lai bae lienhndang、lai gwn doxgaiq. Goulau lwg de cungj mbouj ndaej de baenzneix niemh youq ndawsim. De mbouj guh hong hoengq, lwghag de seizneix doh lajmbwn bae; mizmbangj doeg dayoz, mizmbangj doeg daengz cuhcungh roxnaeuz gauhcungh couh okdaeuj guh hong.

Gou yaek gangj gawq vah ndawsim hawj lauxsae gou nyi: Lauxsae, mwngz dwgrengz lo, mbouj miz mwngz baenzneix haeujsim son, gou hix byaij mbouj ok mbanj iq!